“Юзда юрма – юзга кир” шиори остида “Тарғибот автокарвони” кўргазмали тадбири ташкил этилди

Мамлакатимизда аҳолининг турмуш даражаси ошиб бораётгани натижасида шахсий автомашинага эга фуқаролар сони ҳам кун сайин ортиб бормоқда. Бу эса одамлар ҳаётида янги имкониятлар ва қулайликлар яратиб, узоқ масофаларнинг яқинлашишига, оғир ишлар осонлашишига хизмат қилмоқда. Бироқ транспорт воситалари оқимининг кўпайиши билан бирга йўлларда тирбандликлар ва йўл-транспорт ҳодисаларининг олдини олиш масаласи долзарб аҳамият касб этмоқда. Шу боис йўл ҳаракати хавфсизлигини таъминлашда йўл-патруль хизмати ходимлари ва ҳаракат иштирокчиларининг масъулиятини янада ошириш талаб этиляпти.

Шу мақсадда Амударё туманида “Хавфсиз ва соғлом юрт” кенг қамровли тезкор профилактик тадбири доирасида “Тарғибот автокарвони” кўргазмали тадбири ташкил этилди. Туман ҳокимлиги биноси олдида масъул идоралар раҳбарлари ҳамда ҳамкор ташкилотлар вакиллари иштирокида йиғилиш бўлиб ўтди. Унда йўл ҳаракати қоидаларига риоя этиш маданиятини ошириш, йўл-транспорт ҳодисаларининг олдини олишга қаратилган чора-тадбирлар атрофлича муҳокама қилинди.

Маълумотларга кўра, 2024 йилда юртимизда 9364 та йўл-транспорт ҳодисаси расман қайд этилган. Улардан 3045 таси юк машиналари ва йўловчи ташувчи транспорт воситалари иштирокида содир бўлган. Ачинарлиси 351 та ҳодиса ҳайдовчилар иш ва дам олиш тартибига риоя қилмагани, аниқроғи, рулда ухлаб қолгани сабабли юз берган. Бундай ҳолатлар 189 нафар инсоннинг ҳаётига зомин бўлган, 285 нафар фуқаро эса турли даражада тан жароҳати олган.

Ҳайдовчилар томонидан автомобиль бошқараётган пайтда ухлаб қолиш ҳолати нафақат мамлакатимизда, балки жаҳон миқёсида ҳам кенг тарқалган фожиали омиллардан бири ҳисобланади. Шу боис мутахассислар узоқ сафарлар олдидан мажбурий дам олиш ва ҳушёрликни таъминлаш тартибига қатъий амал қилишни тавсия этмоқда.

Йўл-транспорт ҳодисаларининг аянчли оқибатларини кенг жамоатчиликка яқиндан тушунтириш мақсадида “Тарғибот автокарвони” йўл-транспорт ҳодисаларида техник шикастланган автомашиналар ортилган махсус эвакуаторлар таркибида туманнинг марказий кўчалари бўйлаб ҳаракатланди. Бу кўргазмали тадбир орқали фуқароларни ҳушёрликка чақириш, қоидаларга риоя қилмаслик қандай оқибатларга олиб келиши мумкинлигини англатиш кўзда тутилди.

Автокарвон “Юзда юрма – юзга кир” шиори остида ташкил этилиб, туманнинг аҳоли гавжум ва серқатнов кўчаларидан ўтди. Тадбир чоғида аҳолига пиёда сифатида ҳаракатланиш қоидалари батафсил тушунтирилди. Шу билан бирга, фуқаролар томонидан берилган саволларга мутахассислар томонидан атрофлича жавоблар берилди.

Қорақалпоғистон Республикаси Ички ишлар вазирлигининг Жамоат хавфсизлиги хизмати Йўл ҳаракати хавсизлиги бошқармаси масъуллари ва туман ИИБ Йўл патруль хизмати гуруҳи ҳамкорлигида ташкил этилган учрашувларда ҳайдовчилар билан жамоат транспорт воситаларини бошқаришда хавфсизлик, ҳаракат тезлиги, пиёдалар ҳуқуқлари хусусида очиқ мулоқотлар ўтказилди. Шунингдек, тажрибали ҳайдовчилар томонидан ёш авлодга амалий тавсиялар берилди.

Сўнгги йилларда аҳоли ўртасида скутер, мопед ва электросамокатлардан фойдаланиш кенг тарқалмоқда. Аммо айрим ҳолларда ушбу транспорт воситаларини ёш болалар ёки тажрибасиз аёллар бошқараётгани натижасида йўл-транспорт ҳодисалари юз бермоқда. Шу боис тарғибот тадбирлари доирасида аҳолига бу воситалар ҳам тўлақонли транспорт экани ва уларда ҳаракатланишда ҳам йўл ҳаракати қоидаларига амал қилиш шарт экани тушунтирилмоқда.

Йўлларда ҳаракатланиш вақтида транспорт бошқарувчилари ва пиёдаларнинг ҳар бир ҳаракати инсон ҳаётига дахлдор. Шу сабабли йўл қоидаларига амал қилиш, диққат ва ҳушёрлик билан ҳаракатланиш барчамиз учун масъулиятдир. “Тарғибот автокарвони” каби тадбирлар айнан шу масъулиятни аҳоли, айниқса, болалар ва ёшлар онгига сингдиришда муҳим ўрин тутади. Йўлларда хавфсизликни таъминлаш фақатгина давлат идораларининг эмас, балки ҳар бир фуқаронинг фаол иштироки ва ҳаракатланиш маданиятига боғлиқдир.

Шоҳзод Қурбонбоев тайёрлади.