"Юзда юрма – юзга кир": Амударёда мудҳиш авариялар оқибатлари акс этган автокарвон тадбири ўтказилди

Бугунги кунда кўчаларимиз файзли, йўлларимиз равон, энг муҳими, шахсий автотранспорт воситасига эга бўлган юртдошларимиз сафи соат сайин кенгайиб боряпти. Бу, албатта, қувонарли ҳол. Зеро, автомобиль узоғимизни яқин, оғиримизни енгил қилувчи, замонавий ҳаёт суръатига мос равишда ҳаракатланишимизни таъминловчи энг муҳим воситалардан бирига айланиб улгурган. Бироқ, бу қулайликларнинг ўзига яраша масъулияти ва хавотирли томонлари ҳам йўқ эмас. Транспорт оқимининг кескин ортиши табиийки, автомобиль йўлларидаги тирбандликларни келтириб чиқариш билан бирга, йўл-транспорт ҳодисаларининг кўпайишидек ўта долзарб ва оғриқли масалани кун тартибига чиқармоқда.

Мана шундай масалага жамоатчилик эътиборини қаратиш, одамларни ҳушёрликка ва масъулиятга чорлаш мақсадида Амударё туманида “Тарғибот автокарвони” тадбири ташкил этилди. Тадбирнинг мақсади томошабинларга аччиқ ҳақиқатни, қоидабузарликнинг мудҳиш оқибатларини жонли равишда, очиқ-ойдин кўрсатишдан иборат бўлди. Йўл-транспорт ҳодисалари оқибатида аянчли ҳолатга келиб қолган, мажақланган ва техник шикастланган автомашиналар махсус эвакуаторларга ортилган ҳолда туманнинг марказий ва гавжум кўчалари бўйлаб ҳаракатланди. Эвакуаторлар устидаги темир парчасига айланган машиналарни кўрган ҳар бир йўловчи, ҳар бир ҳайдовчи беихтиёр чуқур ўйга толади, меъёрдан ортиқ тезликнинг ва масъулиятсизликнинг охири қандай фожиа билан тугаши мумкинлигини ўз кўзи билан кўриб, тегишли хулоса чиқаради. “Юзда юрма – юзга кир” шиори остида ўтказилган тадбир давомида аҳолига ҳам пиёда сифатида ҳаракатланиш қоидалари яна бир бор батафсил тушунтирилди.

Амударё тумани Ички ишлар бўлим Жамоат хавфсизлиги хизмати Йўл ҳаракати хавфсизлиги бўлинмаси бошлиғи, лейтенант Бекзод Қозоқов ва катта лейтенант Анвар Юсуповлар томонидан ҳайдовчилар, айниқса, кўплаб инсонлар тақдирига жавобгар бўлган жамоат транспорти ҳайдовчилари билан очиқ ва самимий мулоқотлар ўтказилди. Бу учрашувларда транспорт воситасини бошқариш вақтидаги хавфсизлик чоралари, белгиланган ҳаракат тезлигига қатъий риоя этиш, шунингдек, пиёдаларнинг ҳақ-ҳуқуқларини ҳурмат қилиш масалалари кун тартибининг асосий мавзусига айланди. Қолаверса, кўп йиллик тажрибага эга бўлган фахрий ҳайдовчилар ўзларининг бой ҳаётий тажрибалари билан ўртоқлашиб, рул бошқарувига эндигина ўтирган ёш авлод вакилларига йўллардаги кутилмаган вазиятларда қандай тўғри қарор қабул қилиш бўйича ўта муҳим амалий тавсияларини бериб ўтдилар.

Профилактик тадбирлар кўлами фақатгина кўчалар ва чорраҳалар билан чегараланиб қолмади. Йўл ҳаракати хавфсизлиги хизмати инспекторлари муаммонинг илдизига чуқурроқ кириб бориш мақсадида туман ҳудудида фаолият кўрсатаётган кузов таъмирлаш устахоналари ва автомобилларни ювиш шохобчаларида ҳам бўлишди.

Устахона мутасаддилари билан ўтказилган суҳбатлар чоғида шикастланган, айниқса, авария ҳолатидаги автотранспорт воситаларини таъмирлашга қабул қилишдан олдин, албатта тегишли маълумотномани талаб қилиш шартлиги таъкидланди. Баъзида ҳайдовчилар йўл-транспорт ҳодисаси содир этиб, воқеа жойидан яширинишга ва машинани яширинча таъмирлатиб олишга уринишади. Инспекторлар усталарга бундай ноқонуний хатти-ҳаракатларнинг оқибатларини тушунтирар экан, қонунчиликка кўра, йўл-транспорт ҳодисаси содир қилган автомобилни яширинча таъмирлаш — ҳуқуқбузарликка ва ҳатто жиноятга бевосита шерик бўлиш сифатида баҳоланишини ва бунинг учун жавобгарлик муқаррарлигини эслатиб ўтдилар.

Автомобилларни ювиш шохобчаларининг раҳбарлари ва ишчи-ходимларига эса хизмат кўрсатиш учун олиб келинган транспорт воситаларини кўздан кечиришда ҳушёр бўлиш, агарда автомашина салонида ёки сиртида шубҳали қон излари, ёхуд келиб чиқиши номаълум бўлган жиддий шикастланиш белгилари кўзга ташланса, дарҳол ҳолатга аниқлик киритиш ҳамда бу ҳақда ҳуқуқ-тартибот органларига хабар бериш зарурлиги алоҳида таъкидланди. Бундай эътибор ва ҳушёрлик кўплаб қоидабузарликларнинг олди олинишига хизмат қилиши шубҳасиз.