"Yuzda yurma – yuzga kir": Amudaryoda mudhish avariyalar oqibatlari aks etgan avtokarvon tadbiri oʻtkazildi

Bugungi kunda koʻchalarimiz fayzli, yoʻllarimiz ravon, eng muhimi, shaxsiy avtotransport vositasiga ega boʻlgan yurtdoshlarimiz safi soat sayin kengayib boryapti. Bu, albatta, quvonarli hol. Zero, avtomobil uzogʻimizni yaqin, ogʻirimizni yengil qiluvchi, zamonaviy hayot surʼatiga mos ravishda harakatlanishimizni taʼminlovchi eng muhim vositalardan biriga aylanib ulgurgan. Biroq, bu qulayliklarning oʻziga yarasha masʼuliyati va xavotirli tomonlari ham yoʻq emas. Transport oqimining keskin ortishi tabiiyki, avtomobil yoʻllaridagi tirbandliklarni keltirib chiqarish bilan birga, yoʻl-transport hodisalarining koʻpayishidek oʻta dolzarb va ogʻriqli masalani kun tartibiga chiqarmoqda.

Mana shunday masalaga jamoatchilik eʼtiborini qaratish, odamlarni hushyorlikka va masʼuliyatga chorlash maqsadida Amudaryo tumanida “Targʻibot avtokarvoni” tadbiri tashkil etildi. Tadbirning maqsadi tomoshabinlarga achchiq haqiqatni, qoidabuzarlikning mudhish oqibatlarini jonli ravishda, ochiq-oydin koʻrsatishdan iborat boʻldi. Yoʻl-transport hodisalari oqibatida ayanchli holatga kelib qolgan, majaqlangan va texnik shikastlangan avtomashinalar maxsus evakuatorlarga ortilgan holda tumanning markaziy va gavjum koʻchalari boʻylab harakatlandi. Evakuatorlar ustidagi temir parchasiga aylangan mashinalarni koʻrgan har bir yoʻlovchi, har bir haydovchi beixtiyor chuqur oʻyga toladi, meʼyordan ortiq tezlikning va masʼuliyatsizlikning oxiri qanday fojia bilan tugashi mumkinligini oʻz koʻzi bilan koʻrib, tegishli xulosa chiqaradi. “Yuzda yurma – yuzga kir” shiori ostida oʻtkazilgan tadbir davomida aholiga ham piyoda sifatida harakatlanish qoidalari yana bir bor batafsil tushuntirildi.

Amudaryo tumani Ichki ishlar boʻlim Jamoat xavfsizligi xizmati Yoʻl harakati xavfsizligi boʻlinmasi boshligʻi, leytenant Bekzod Qozoqov va katta leytenant Anvar Yusupovlar tomonidan haydovchilar, ayniqsa, koʻplab insonlar taqdiriga javobgar boʻlgan jamoat transporti haydovchilari bilan ochiq va samimiy muloqotlar oʻtkazildi. Bu uchrashuvlarda transport vositasini boshqarish vaqtidagi xavfsizlik choralari, belgilangan harakat tezligiga qatʼiy rioya etish, shuningdek, piyodalarning haq-huquqlarini hurmat qilish masalalari kun tartibining asosiy mavzusiga aylandi. Qolaversa, koʻp yillik tajribaga ega boʻlgan faxriy haydovchilar oʻzlarining boy hayotiy tajribalari bilan oʻrtoqlashib, rul boshqaruviga endigina oʻtirgan yosh avlod vakillariga yoʻllardagi kutilmagan vaziyatlarda qanday toʻgʻri qaror qabul qilish boʻyicha oʻta muhim amaliy tavsiyalarini berib oʻtdilar.

Profilaktik tadbirlar koʻlami faqatgina koʻchalar va chorrahalar bilan chegaralanib qolmadi. Yoʻl harakati xavfsizligi xizmati inspektorlari muammoning ildiziga chuqurroq kirib borish maqsadida tuman hududida faoliyat koʻrsatayotgan kuzov taʼmirlash ustaxonalari va avtomobillarni yuvish shoxobchalarida ham boʻlishdi.

Ustaxona mutasaddilari bilan oʻtkazilgan suhbatlar chogʻida shikastlangan, ayniqsa, avariya holatidagi avtotransport vositalarini taʼmirlashga qabul qilishdan oldin, albatta tegishli maʼlumotnomani talab qilish shartligi taʼkidlandi. Baʼzida haydovchilar yoʻl-transport hodisasi sodir etib, voqea joyidan yashirinishga va mashinani yashirincha taʼmirlatib olishga urinishadi. Inspektorlar ustalarga bunday noqonuniy xatti-harakatlarning oqibatlarini tushuntirar ekan, qonunchilikka koʻra, yoʻl-transport hodisasi sodir qilgan avtomobilni yashirincha taʼmirlash — huquqbuzarlikka va hatto jinoyatga bevosita sherik boʻlish sifatida baholanishini va buning uchun javobgarlik muqarrarligini eslatib oʻtdilar.

Avtomobillarni yuvish shoxobchalarining rahbarlari va ishchi-xodimlariga esa xizmat koʻrsatish uchun olib kelingan transport vositalarini koʻzdan kechirishda hushyor boʻlish, agarda avtomashina salonida yoki sirtida shubhali qon izlari, yoxud kelib chiqishi nomaʼlum boʻlgan jiddiy shikastlanish belgilari koʻzga tashlansa, darhol holatga aniqlik kiritish hamda bu haqda huquq-tartibot organlariga xabar berish zarurligi alohida taʼkidlandi. Bunday eʼtibor va hushyorlik koʻplab qoidabuzarliklarning oldi olinishiga xizmat qilishi shubhasiz.