Амударё тумани Назархон овулини ижтимоий-иқтисодий ривожлантириш бўйича ўрганиш ишлари олиб борилди
Амударё тумани прокурори Баҳрам Машарипов бошчилигида барча соҳалар масъуллари туманнинг энг чекка ҳудудларидан бири бўлган Назархон овулида ижтимоий-иқтисодий ҳолатни таҳлил қилиш ва мавжуд муаммоларни бартараф этиш мақсадида ўрганиш ишларини олиб боришди. Ушбу ўрганиш ишлари бевосита жойларга чиққан ҳолда, аҳоли билан очиқ мулоқот тарзида ташкил этилди. Аҳолининг турмуш шароитини яхшилаш ва уларнинг асосий эҳтиёжларини қондириш мақсадида ушбу ҳудуднинг ривожланишига алоҳида эътибор қаратилди.
Туман прокурори Баҳрам Машариповнинг Назархонга ташрифи давомида, аҳоли томонидан билдирилган мурожаатлар ва таклифлар чуқур таҳлил қилинди. Жумладан, ичимлик суви таъминотининг сифати ва узлуксизлиги, мавжуд йўл инфратузилмасининг таъмирлашга муҳтожлиги, электр энергияси таъминотидаги узилишлар, шунингдек, мактабгача таълим муассасаларининг йўқлиги ва тиббий хизматларнинг узоқлиги каби масалалар асосий эътиборда бўлди.
Масъуллар ҳудуддаги ижтимоий соҳа объектлари, умумтаълим мактаблари, оилавий поликлиника, мактабгача таълим ташкилотларининг ҳолатини ҳам кўздан кечирдилар.
Ўрганиш натижалари асосида Назархон овулини ижтимоий-иқтисодий ривожлантириш бўйича аниқ чора-тадбирлар режаси ишлаб чиқилди ва шу куннинг ўзида қатор муаммоларни бартараф қилиш ишлари бошлаб юборилди. Хусусан, мавжуд сув тармоқларини таъмирлаш ва ариқларни кенгайтириш ишлари бошланди, овул ички йўлларига шағал тўшаш ва таъмирлаш, шунингдек, электр таъминоти узилишларининг олдини олиш мақсадида электр узатиш тармоқларини модернизация қилиш чоралари кўрилмоқда.
Қолаверса, мактабгача таълим сифатини яхшилаш ва қамровини ошириш бўйича аниқ чора-тадбирлар ишлаб чиқилиб, тиббий хизматларни аҳолига яқинлаштириш, аҳоли бандлигини таъминлаш, ҳудудда кичик ва ўрта бизнесни, айниқса, чорвачилик, деҳқончилик каби қишлоқ хўжалигини турларини ривожлантириш орқали аҳолининг бандлигини ошириш бўйича лойиҳалар амалга оширилмоқда.
Бу каби амалий чора-тадбирлар Назархон овулининг ижтимоий-иқтисодий ҳолатини яхшилаш, аҳолининг турмуш сифатини ошириш ҳамда ҳудуднинг барқарор ривожланишини таъминлашга қаратилган муҳим қадам ҳисобланади. Туман прокуратураси томонидан ушбу жараён доимий назоратга олиниб, белгиланган чора-тадбирларнинг ўз вақтида ва сифатли бажарилиши устидан мунтазам мониторинг олиб борилмоқда.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
