Аҳоли мурожаатлари қабул қилинди, муаммоларга жойида ечим изланди

Мамлакатимизда олиб борилаётган очиқ ва халқчил бошқарув сиёсатининг амалий ифодаси сифатида жойларда ташкил этилаётган сайёр қабуллар фуқароларнинг оғриқли муаммоларини бевосита жойига чиққан ҳолда ҳал қилиш, аҳолининг давлат идораларига бўлган ишончини мустаҳкамлашда муҳим воситага айланмоқда.

Амударё тумани ҳокими Собир Хўжаметов бошчилигида барча соҳа раҳбарлари иштирокида Жумуртов шаҳарчасида ўтказилган навбатдаги сайёр халқ қабули ҳам ана шу мақсадларга қаратилгани билан аҳамиятлидир. Учрашувда овул аҳолиси, маҳалла фаоллари, нуронийлар, ёшлар ва хотин-қизлар фаол иштирок қилди.

Сайёр қабул давомида фуқаролар томонидан кўплаб масалалар — электр энергиясидаги узилишлар, йўлларнинг яроқсизлиги, мактаб ва боғчалар ҳолати, бандлик, ижтимоий ёрдам, ногиронлик пенсияси, уй-жой таъминоти ва бошқа соҳалардаги муаммолар кўтарилди. Ҳар бир мурожаат алоҳида эшитилди ва масъуллар иштирокида жойида муҳокама қилинди.

Сайёр қабулни кириш сўзи билан очиб берган туман ҳокими Собир Хўжаметов одамлар орасига кириб, уларга қулоқ тутиш, муаммоларга ҳамкорликда ечим топиш бугунги ислоҳотларнинг асосий тамойилига айланганлигини алоҳида таъкидлади.

Учрашув давомида бир қанча мурожаатлардаги масалалар шу ернинг ўзида ижобий ҳал этилди. Жумладан, бир нафар ногиронлиги бўлган фуқарога тиббий кўрикка йўлланма берилди, ёш тадбиркорнинг кредит масаласи бўйича туман банк мутасаддиларига топшириқ берилди, таъмирталаб аҳволга келган ички хўжалик йўлига маҳаллий бюджет ҳисобидан қум-шағал ётқизиш режалаштирилди.

Айрим масалалар эса вақт ва таҳлил талаб қилганлиги боис, уларни атрофлича ўрганиб, қонуний тартибда ҳал этиш бўйича масъулларга топшириқлар берилди ва ижроси қатъий назоратга олинди. Шу билан бирга, сайёр қабул давомида жойлардаги ижтимоий объектларнинг ҳолати ҳам кўздан кечирилиб, мавжуд камчиликларни бартараф этиш бўйича мутасаддиларга аниқ вазифалар юклатилди.

Маҳалла фаоллари ва нуронийлар бу каби сайёр қабулларни ҳар бир ҳудуд ҳаёти учун долзарб аҳамиятга эга эканлигини эътироф этиб, ташаббус учун миннатдорчилик билдирдилар.

Шунингдек, туман ҳокими Собир Хўжаметов бошчилигида тумандаги тегишли ташкилот ва идоралар вакиллари иштирокида навбатдаги сайёр қабул Жумуртов маҳалласида ташкил этилди. Ушбу учрашув маҳаллий аҳоли билан тўғридан-тўғри мулоқот қилиш, уларнинг муаммолари, таклиф ва эҳтиёжларини жойига чиққан ҳолда ўрганиш ҳамда тезкор ечим топиш мақсадларига йўналтирилди.

Таъкидлаш жоизки, сайёр қабуллар аҳолининг давлат органларига бўлган ишончини мустаҳкамлашда, очиқлик ва шаффофликни таъминлашда, энг муҳими, фуқароларнинг оғзаки ёки ёзма мурожаатларини бевосита эшитишда муҳим восита бўлиб хизмат қилмоқда.

Тадбир давомида фуқаролар томонидан уй-жой масаласи, ичимлик суви, электр энергияси таъминоти, йўлларни таъмирлаш, иш билан таъминлаш, ижтимоий ёрдам ажратиш ва бошқа масалалар бўйича мурожаатлар қабул қилиниб, уларнинг ҳар бири алоҳида кўриб чиқилди.

Туман ҳокими ва мутасадди раҳбарлар ҳар бир мурожаатчининг масаласини синчковлик билан ўрганиб, айрим мурожаатларга шу жойнинг ўзида ечим топилди. Вақт талаб қиладиган муаммолар бўйича масъулларга тегишли топшириқлар берилди ва уларнинг ижроси қатъий назоратга олинди.

Туман ҳокимининг сайёр қабуллари ҳудудларда давом эттирилмоқда. Мақсад — аҳоли муаммосини эшитиш ва имкон қадар ижобий ечим топиш. Энг муҳими эса – халқ ишончини оқлаш.

Чарос Арслонова, туман ҳокимлигининг Ахборот хизмати раҳбари.