Aholi murojaatlari qabul qilindi, muammolarga joyida yechim izlandi

Mamlakatimizda olib borilayotgan ochiq va xalqchil boshqaruv siyosatining amaliy ifodasi sifatida joylarda tashkil etilayotgan sayyor qabullar fuqarolarning ogʻriqli muammolarini bevosita joyiga chiqqan holda hal qilish, aholining davlat idoralariga boʻlgan ishonchini mustahkamlashda muhim vositaga aylanmoqda.

Amudaryo tumani hokimi Sobir Xoʻjametov boshchiligida barcha soha rahbarlari ishtirokida Jumurtov shaharchasida oʻtkazilgan navbatdagi sayyor xalq qabuli ham ana shu maqsadlarga qaratilgani bilan ahamiyatlidir. Uchrashuvda ovul aholisi, mahalla faollari, nuroniylar, yoshlar va xotin-qizlar faol ishtirok qildi.

Sayyor qabul davomida fuqarolar tomonidan koʻplab masalalar — elektr energiyasidagi uzilishlar, yoʻllarning yaroqsizligi, maktab va bogʻchalar holati, bandlik, ijtimoiy yordam, nogironlik pensiyasi, uy-joy taʼminoti va boshqa sohalardagi muammolar koʻtarildi. Har bir murojaat alohida eshitildi va masʼullar ishtirokida joyida muhokama qilindi.

Sayyor qabulni kirish soʻzi bilan ochib bergan tuman hokimi Sobir Xoʻjametov odamlar orasiga kirib, ularga quloq tutish, muammolarga hamkorlikda yechim topish bugungi islohotlarning asosiy tamoyiliga aylanganligini alohida taʼkidladi.

Uchrashuv davomida bir qancha murojaatlardagi masalalar shu yerning oʻzida ijobiy hal etildi. Jumladan, bir nafar nogironligi boʻlgan fuqaroga tibbiy koʻrikka yoʻllanma berildi, yosh tadbirkorning kredit masalasi boʻyicha tuman bank mutasaddilariga topshiriq berildi, taʼmirtalab ahvolga kelgan ichki xoʻjalik yoʻliga mahalliy byudjet hisobidan qum-shagʻal yotqizish rejalashtirildi.

Ayrim masalalar esa vaqt va tahlil talab qilganligi bois, ularni atroflicha oʻrganib, qonuniy tartibda hal etish boʻyicha masʼullarga topshiriqlar berildi va ijrosi qatʼiy nazoratga olindi. Shu bilan birga, sayyor qabul davomida joylardagi ijtimoiy obʼektlarning holati ham koʻzdan kechirilib, mavjud kamchiliklarni bartaraf etish boʻyicha mutasaddilarga aniq vazifalar yuklatildi.

Mahalla faollari va nuroniylar bu kabi sayyor qabullarni har bir hudud hayoti uchun dolzarb ahamiyatga ega ekanligini eʼtirof etib, tashabbus uchun minnatdorchilik bildirdilar.

Shuningdek, tuman hokimi Sobir Xoʻjametov boshchiligida tumandagi tegishli tashkilot va idoralar vakillari ishtirokida navbatdagi sayyor qabul Jumurtov mahallasida tashkil etildi. Ushbu uchrashuv mahalliy aholi bilan toʻgʻridan-toʻgʻri muloqot qilish, ularning muammolari, taklif va ehtiyojlarini joyiga chiqqan holda oʻrganish hamda tezkor yechim topish maqsadlariga yoʻnaltirildi.

Taʼkidlash joizki, sayyor qabullar aholining davlat organlariga boʻlgan ishonchini mustahkamlashda, ochiqlik va shaffoflikni taʼminlashda, eng muhimi, fuqarolarning ogʻzaki yoki yozma murojaatlarini bevosita eshitishda muhim vosita boʻlib xizmat qilmoqda.

Tadbir davomida fuqarolar tomonidan uy-joy masalasi, ichimlik suvi, elektr energiyasi taʼminoti, yoʻllarni taʼmirlash, ish bilan taʼminlash, ijtimoiy yordam ajratish va boshqa masalalar boʻyicha murojaatlar qabul qilinib, ularning har biri alohida koʻrib chiqildi.

Tuman hokimi va mutasaddi rahbarlar har bir murojaatchining masalasini sinchkovlik bilan oʻrganib, ayrim murojaatlarga shu joyning oʻzida yechim topildi. Vaqt talab qiladigan muammolar boʻyicha masʼullarga tegishli topshiriqlar berildi va ularning ijrosi qatʼiy nazoratga olindi.

Tuman hokimining sayyor qabullari hududlarda davom ettirilmoqda. Maqsad — aholi muammosini eshitish va imkon qadar ijobiy yechim topish. Eng muhimi esa – xalq ishonchini oqlash.

Charos Arslonova, tuman hokimligining Axborot xizmati rahbari.