Картошкачиликда янги босқич - Амударёда уруғчилик йўлга қўйилмоқда

Сўнгги йилларда мамлакатимиз қишлоқ хўжалиги соҳасида сифатли ва маҳаллий иқлимга мос экин уруғчилиги тизимини йўлга қўйиш бўйича бир қатор ислоҳотлар амалга оширилмоқда. Айниқса, аҳоли томорқаларидан оқилона ва самарали фойдаланиш юртимизда озиқ-овқат хавфсизлигини таъминлашда муҳим аҳамият касб этмоқда.

Шу мақсадда Амударё туманида ҳам ижобий тажрибалар йўлга қўйилмоқда. Жумладан, Холимбег овулида истиқомат қилувчи илғор томорқа ер эгаси Эркин Қўшаев ташаббуси билан туманда илк бор картошка уруғчилиги амалиётга татбиқ қилина бошлади. Унга Қишлоқ хўжалиги вазирлиги ва бошқа масъул ташкилотлар кўмагида 300 килограмм “Тошкент” нави картошка уруғлиги етказиб берилди. Ушбу уруғликлар 10 сотих ер майдонига экилиб, натижада 3,4 тоннагача юқори ҳосил олинди. Бу эса биргина томорқада қисқа муддатда юқори ҳосилдорликка эришиш мумкинлигини яна бир бор исботлади.

Эркин Қўшаевнинг саъй-ҳаракатлари нафақат ўз томорқасининг ҳосилдорлигини оширди, балки туман миқёсида янги йўналишни бошлаб берди. У яратган бу тажриба ҳозирда туман аҳолисида катта қизиқиш уйғотмоқда. Бундан руҳланган мутасадди ташкилотлар томонидан эндиликда Амударё тумани мисолида картошка уруғчилигини ривожлантириш бўйича махсус чора-тадбирлар режаси ишлаб чиқилмоқда. Хусусан, босқичма-босқич бошқа маҳаллалардаги томорқа ер эгалари ҳамда фермер хўжаликлари раҳбарлари ушбу тажрибани ўз фаолиятларига татбиқ этишлари режалаштирилмоқда.

Республика миқёсида эса бу тажриба нафақат Амударё туманида, балки бошқа ҳудудларда ҳам амалиётга жорий қилиниши мўлжалланмоқда. Мутахассисларнинг таъкидлашича, “Тошкент” навли картошка уруғлиги иқлим ўзгаришларига бардошли, касалликларга чидамли ва серҳосил бўлиб, Қорақалпоғистон иқлим шароитига ҳам мос келганлиги республика қишлоқ хўжалигида янги босқични бошлаб бериши кутилмоқда.

“Тошкент” навли картошка уруғчилиги юртимизда истиқболга эга. У тез пишувчи, касалликларга чидамли бўлса-да, унумдорлиги юқори ва агротехника жиҳатдан самарали. Ушбу навли картошкачиликни янада ривожлантириш мақсадида давлат томонидан тадқиқотлар, инфратузилма, халқаро тажрибалар ёрдамида картошкачиликни оммалаштириш бўйича комплекс чора-тадбирлар режалаштирилган.

Амударё тумани ҳокимлиги, туман қишлоқ хўжалиги бўлими ҳамда тажрибали агрономлар ҳамкорлигида мазкур ташаббусни кенгайтириш, уруғчиликни илмий ёндашув асосида йўлга қўйиш, зарур агротехник тадбирлар ва ўқув-семинарлар ташкил этиш орқали бу соҳада янги ютуқларга эришиш мақсад қилинган.

Бу каби ташаббуслар шубҳасиз, нафақат туман иқтисодиётига, балки бутун республика миқёсида озиқ-овқат таъминоти барқарорлигига ҳам катта ҳисса қўшади. Энг муҳими, оддий томорқа эгасининг ғайрати ва меҳнатига асосланган бундай тажрибалар бошқа юртдошларимизга ҳам ибрат бўлиб хизмат қилмоқда.

Чарос Арслонова, туман ҳокимлигининг Ахборот хизмати раҳбари.