Таълим – жамият тараққиётининг асоси

Бугунги кунда ҳар қандай ривожланган давлат ёки миллат тараққиётининг пойдевори сифатида таълим тизими эътироф этилмоқда. Зеро, жамият тараққиёти тўғридан-тўғри инсон салоҳияти, дунёқараши, билим даражаси ва фикрлаш қобилиятига боғлиқ. Айнан таълим маърифатли, масъулиятли, юксак тафаккурга эга билимдон шахсларни жамиятга етказиб беради. Шу боис таълим — бу қисқа вақтда эмас, балки узоқ муддатда ўз самарасини берувчи муҳим ижтимоий сармоядир.

Юртимизда таълим соҳасини замон талаблари асосида ислоҳ қилиш, ёш авлодга чуқур ва пухта билим бериш, уларни ҳар томонлама баркамол инсон қилиб тарбиялаш йўлида кенг кўламли ишлар амалга оширилмоқда. Таълим тизимининг барча босқичларида янгиланишлар ва изчил ислоҳотлар кузатилмоқда. Энг муҳими, ёшларнинг таълим олиши, илмга қизиқиши ва орзуларини рўёбга чиқариши учун имкониятлар кенгаймоқда.

Президентимиз Шавкат Мирзиёев нутқларидан бирида шундай деган эдилар:

“Келгусида Учинчи Ренессанс пойдеворини яратадиган янги Хоразмийлар, Берунийлар, Ибн Синолар, Мирзо Улуғбек ва Алишер Навоийлар қаердан пайдо бўлади? Бу улкан вазифаларни ким бажаради? Мен қайта-қайта такрорлашдан чарчамайман: албатта, бу эзгу ғояларни сизлар – бугунги Янги Ўзбекистон ёшлари амалга оширасизлар.”

Ушбу сўзлар биз — ёшларда юрт олдидаги масъулиятимизни янада чуқурроқ англаш, ўз устида тинимсиз ишлаш ва келажак учун сидқидилдан ҳаракат қилиш туйғусини оширади.

Шу ўринда таълимда устоз шахсининг ўрнига алоҳида тўхталиб ўтиш лозим. Ўқитувчи фақат дарс ўтувчи эмас, балки йўл кўрсатувчи, руҳлантирувчи ва ҳаётга тайёрловчи инсондир. Ўқувчи устозидан нафақат билим, балки муносабат, масъулият, сабр ва ҳаётий қарашларни ҳам ўрганади. Шу сабабли, устозлик касби жамиятда муносиб эътироф ва эҳтиромга сазовор бўлиши шарт.

Бугунги кунда таълим жараёнига замонавий технологиялар кенг татбиқ этилмоқда. Рақамли платформалар, онлайн дарслар, электрон кутубхоналар – буларнинг барчаси ёшлар учун янги имконият эшикларини очмоқда. Бироқ шуни унутмаслик лозимки, ҳеч қандай технология инсон қалби ва меҳрига эга бўлган устоз ўрнини босолмайди. Таълимда қалб, самимий мулоқот ва меҳр ҳар доим энг муҳим омил бўлиб қолади.

Олиб борилаётган ислоҳотлар ўз самарасини бермоқда. Сўнгги йилларда минглаб ўзбекистонлик ёшлар дунёнинг нуфузли олий таълим муассасаларида таҳсил олиш имкониятига эга бўлмоқда. Уларнинг айримлари халқаро танловларда ғолибликни қўлга киритаётган, бошқалари эса етакчи компанияларда меҳнат фаолиятини бошлаган. Бу эса таълим соҳасига қаратилаётган эътибор, яратилаётган шароит ва энг муҳими, ёшларга бўлган ишонч самарасидир. Бугунги кунда дунёдаги етакчи олийгоҳларда 1,5 мингдан зиёд талабаларимиз таҳсил олмоқда. Бу – мамлакатимиз таълим тарихи учун юксак натижадир.

Хулоса қилиб айтганда, бугун таълимга қаратилаётган эътибор — эртанги кунга қўйилаётган мустаҳкам пойдевордир. Бу вазифа нафақат давлат, балки ҳар бир оила ва ҳар бир фуқаро зиммасига тушадиган масъулиятли бурчдир. Мен, талабалардан бири сифатида, таълим жараёнида фаол иштирок этиш билан бирга, келажакда олган билимларимни бошқаларга етказиш, ёш авлодни ўқитиш ва тарбиялашдек шарафли вазифага тайёрланмоқдаман. Чунки мен учун таълим — фақат шахсий тараққиёт эмас, балки бутун жамиятга хизмат қилишнинг энг юксак йўлидир.

Чин дилдан ишонаман: таълим — жамият тараққиётининг энг мустаҳкам таянчи ва энг бардавом йўлидир.

Диёрбек Бозорбоев, Ўзбекистон Миллий университети Жиззах филиали талабаси.