“Адолат” СДП Қорақалпоғистон Республикаси Кенгаши томонидан “Одам савдосига қарши курашиш ойлиги” доирасида тадбир ўтказилди

Ўзбекистон “Адолат” социал-демократик партияси томонидан июль ойи “Одам савдосига қарши курашиш ойлиги” сифатида белгиланган. Шу муносабат билан юртимиз бўйлаб кенг қамровли маънавий-маърифий тадбирлар, давра суҳбатлари ва учрашувлар ташкил этилмоқда.

Ана шундай тадбирлардан бири партиянинг Қорақалпоғистон Республикаси Кенгаши ташаббуси билан Гулзор маҳалла фуқаролар йиғини маъмурий биносида ўтказилди. Унда “Адолат” СДП Қорақалпоғистон Республикаси Кенгаши раиси Нурлибай Қайипбергенов, туман Адлия бўлими, Давлат хизматлари маркази, маҳалладаги "еттилик" аъзолари ва партиянинг туман Кенгаши масъуллари иштирок этди.

Тадбирда сўзга чиққан масъуллар томонидан, партиянинг ушбу йўналишдаги фаолияти ҳамда одам савдосига қарши курашда жамоатчиликнинг ўрни хусусида атрофлича тўхталиб ўтилди.

Айтиш жоизки, XXI асрда инсоният учун уч йўналишдаги трансмиллий ташкилий жиноятчилик – терроризм, наркобизнес ва одам савдоси энг катта таҳдидлардан бири бўлиб қолмоқда. Халқаро терроризм ва диний ниқоб ортидаги зўравонлик ҳаракатлари, гиёҳванд моддалар савдоси билан боғлиқ жиноятлар қаторида одам савдоси ҳам жаҳон ҳамжамияти учун долзарб муаммога айланган.

Одам савдоси — бу инсон шаъни, қадр-қиммати ва эркини инкор этувчи, инсонни мол-мулк сифатида кўрадиган жиноий фаолият туридир. Бу жиноят одатда шахсни алдаш, зўрлик ишлатиш, таҳдид қилиш, оғир ҳолатдан фойдаланиш ёки моддий манфаат эвазига шахс устидан назорат ўрнатиш каби усуллар орқали амалга оширилади. Шу тариқа инсонларни ташиш, яшириш, бошқаларга топшириш ёки қабул қилиш ҳолатлари рўй беради.

Мазкур жараёнлар оқибатида фуқаролар мажбурий меҳнатга жалб этилади, фоҳишаликка мажбурланади, уларнинг хизматидан зўравонлик асосида фойдаланилади, ҳаттоки баъзи ҳолларда инсон аъзолари ноқонуний равишда олинади. Одам савдосининг энг даҳшатли жиҳати — инсон ҳуқуқларини тўлиқ инкор қилиш ва товар сифатида муомалага киритишдир.

Афсуски, бу жиноят туридан жабрланувчилар орасида аёллар, болалар ва ночор аҳволдаги шахслар сони юқори. Маълумотларга кўра, ҳар йили дунё бўйича тахминан 2 миллион 700 минг киши одам савдосининг қурбонига айланмоқда. Жаҳон миқёсида бундай жиноятлардан тушаётган йиллик ноқонуний даромад ҳажми 7 миллиард АҚШ долларидан ошиб кетган. Ачинарли жиҳати шундаки, жабрланувчиларнинг 80 фоизини аёллар ва болалар ташкил этади. Ҳар йили 600–800 минг аёллар ва болалар алдов йўли билан бошқа мамлакатларга олиб кетилиб, турли мақсадларда сотиб юборилаётгани маълум қилинган.

Мамлакатимизда одам савдосининг олдини олиш, унга қарши курашиш, жабрланувчиларни ҳимоя қилиш ва реабилитация қилишга қаратилган ҳуқуқий ва институционал механизмлар яратилган. Шу жумладан, тегишли давлат органлари ва фуқаролик жамияти институтлари ўртасида ҳамкорлик асосида тарғибот ишлари олиб борилмоқда. Бу жараёнда партиялар, айниқса, “Адолат” СДП каби сиёсий кучларнинг фаол иштироки муҳим аҳамият касб этяпти.

Тадбир иштирокчилари томонидан ушбу таҳликали жиноят ҳақида тўлиқ маълумотга эга бўлиш, шахсий ҳуқуқларни билиш ва зарурат туғилганда тегишли ҳуқуқни муҳофаза қилувчи органларга мурожаат этиш муҳимлиги таъкидланди. Шунингдек, одам савдосига қарши кураш фақат давлат ёки мутасадди идоралар эмас, балки ҳар бир фуқаронинг шахсий масъулияти эканига алоҳида эътибор қаратилди.

Тадбир якунида “Адолат” СДП Қорақалпоғистон Республикаси Кенгаши томонидан партиянинг фаол аъзолари “Ташаккурнома” билан тақдирланди.

Шоҳзод Қурбонбоев тайёрлади.