3-СОНЛИ ДАВЛАТ МАКТАБГАЧА ТАЪЛИМ ТАШКИЛОТИНИНГ "WUNDERKIND" БОЛАЛАР" ЖАМОАСИ ҚОРАҚАЛПОҒИСТОНДА 2-ЎРИННИ ЭГАЛЛАШДИ
Амударё тумани Мактабгача ва мактаб таълими бўлими тасарруфидаги 3-сонли давлат мактабгача таълим ташкилоти намунали таълим-тарбия муассасаларидан бири саналади. Муассасанинг қуввати 50 ўринга мўлжалланган бўлиб, айни пайтда 3 та тўлиқ кунлик гуруҳларда 90 нафар бола тарбияланмоқда. Болажонларнинг мириқиб дам олишлари, табиат қўйнида сайр қилишлари, ўйин майдончаларида болаларбоп спорт машғулотларида иштирок этиб, қизиқарли ўйинлар билан шуғулланишлари учун барча зарур шароитлар яратилган. Улар ўз қизиқишлари доирасида шахмат-шашка ўйнашлари, хорижий тил ўрганишлари, "Қувноқлар ва зукколар" спорт мусобақаларида иштирок этиш орқали жисмонан чиниқиб боришларида малакали тарбиячи-педагоглар масъул. Кичкинтойларга ўз ёш тоифалари доирасида таълим-тарбия беришда интерфаол усуллардан фойдаланишга асосий эътибор қаратилади. Хусусан, болажонларнинг фикрлаш қобилиятини, нутқини ривожлантириш ва хотирасини мустаҳкамлашга қаратилган машғулотлардаги узвийлик туфайли, айниқса, 5-6-7 ёшдаги болалар орасида ҳиссий билиш қобилиятининг шаклланишини таъминлаб, алоҳида иқтидорга эга болаларни кашф этиш имконини бермоқда.
Ўзбекистон Республикаси Президентининг 2021 йил 19 майдаги "Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида"ги Қарори ижросини таъминлаш ҳамда Қорақалпоғистон Республикаси Жўқорғи Кенгесининг 2024 йил 26 январдаги тегишли буйруғи билан тасдиқланган Қорақалпоғистон Республикаси мактабгача ва мактаб таълими соҳасини ривожлантириш бўйича тасдиқланган иш-режасига мувофиқ мактабгача таълим ташкилотлари тарбияланувчилари орасида инглиз тилида "Wunderkind" танловини ташкил этиш белгиланган эди. Унга кўра, танловнинг биринчи, туман босқичини юқори савияда ўтказиш, биринчи босқичда ғолибликни қўлга киритган МТТлар жамоаларининг кейинги босқичда муваффақиятли иштирокини таъминлаш орқали алоҳида иқтидорли болаларни аниқлаш ҳамда болаларни мазкур танловга тайёрлашда намунали фаолият олиб борган педагогларни рағбатлантириш назарда тутилганди.
Яқинда "Wunderkind" танловининг туман босқичида фахрли 1-ўринни эгаллаган Амударё тумани Мактабгача ва мактаб таълими бўлими тасарруфидаги 3-сонли давлат мактабгача таълим ташкилотининг "Wunderkind" болалар" жамоаси аъзолари мазкур танловнинг Қорақалпоғистон Республикаси босқичида ҳам муваффақиятли иштирок этиб, ғолиблик шоҳсупасидан жой олдилар. ДМТТнинг жажжи билағонлари Абдумалик Солийбоев, Афруза Раҳимбоева, Умида Атаханова, Равшанбек Тўраев ва Комрон Саъдуллаевлардан иборат жамоаси ўзларининг мустаҳкам хотирага эга, билағон ва эпчилликлари билан танлов ҳакамлар ҳайъати аъзоларининг юксак эътибор ва эътирофига сазовор бўлдилар ҳамда фахрли 2-ўринни эгалладилар.
Танловда ғолибликни қўлга киритган болажонлар ташкилотчилар томонидан муносиб тақдирландилар. Шунингдек, 3-сонли ДМТТниниг "Wunderkind" болалар" жамоасини танлов Низоми талаблари даражасида, юқори савияда тайёрлаганликлари учун муассасанинг хорижий тил ўқитувчиси Дилнура Бабаниязова, ташкилот тарбиячиси Нилуфар Ешимбетовалар Амударё тумани Мактабгача ва мактаб таълими бўлими томонидан Фахрий ёрлиқ билан мукофотландилар.
Мактабгача ва мактаб таълими тизимида таълим-тарбиявий ишларнинг ўзаро уйғунлиги асосида амалга оширилаётган бу каби тадбирлар нафақат бола шахсининг ривожланишида, балки уларнинг алоҳида қобилият ва иқтидорларини эрта аниқлаш ва ижобий шакллантириш имконини бермоқда.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
