Амударёлик илғор фермерлар меҳнати самараси ҳосилдор далаларда намоён

Бугун юртимизда қишлоқ хўжалиги соҳасида туб ўзгаришлар, янгиланишлар, модернизация жараёнлари жадаллик билан олиб борилмоқда. Президентимиз ташаббуслари билан яратилаётган кенг кўламли имкониятлар эса том маънода меҳнаткаш деҳқон ва фермерлар фаолиятида ўзининг ижобий самарасини бермоқда. Амударё туманида ҳам бу ислоҳотлар амалда ўз аксини топмоқда. Айниқса, тумандаги илғор фермер хўжаликларининг изчил ҳаракати, инновацияларга асосланган ёндашувлари туманда иқтисодий барқарорликни таъминламоқда.

Намуна маҳалласида жойлашган “Муродбек Зебо” фермер хўжалиги бугунги кунда нафақат Амударё тумани, балки бутун вилоят бўйича энг намунали хўжаликлардан бири сифатида танилган. 2015 йилда асос солинган ушбу хўжалик раҳбари Мансур Эшчанов ўзининг фидокорона меҳнати, пухта билим ва тажрибаси, энг муҳими, давлатимиз томонидан яратиб берилган имкониятлардан оқилона фойдаланиши орқали юксак натижаларга эришиб келмоқда.

Фермер хўжалиги тасарруфидаги 65 гектар экин майдонининг бугунги кундаги ҳолати ҳар қандай эътирофга лойиқ. 2025 йилги мавсум учун бу ерларнинг 35 гектарига пахта, 11 гектарига эса ғалла экилган. Қизиғи шундаки, агротехник тадбирлар белгиланган муддатларда, замонавий усулларда амалга оширилганлиги сабабли, ҳосилдорлик ҳам юқори даражада таъминланмоқда. Жумладан, ғалла майдонларидан 70-80 центнергача ҳосил олиниши бу соҳадаги фидокорлик ва ўз ишига садоқатли ёндашув натижасидир.

Аҳамиятлиси шундаки, жорий йил бошида имзоланган Ўзбекистон Республикаси Президентининг Қорақалпоғистон Республикасини комплекс ривожлантириш, тадбиркорликни қўллаб-қувватлаш ва аҳолининг фаровон турмушини таъминлаш борасидаги 10-сонли Фармони асосида хўжаликка қўшимча 23 гектар ер майдони ажратилди. Бу ерда мевали боғлар барпо этиш, йирик ҳажмдаги музлаткич қуриш, маҳсулотларни экспорт ҳолатида сақлаш инфратузилмасини яратиш режалаштирилган. Ер майдони 49 йил муддатга ижарага берилиши эса узоқ муддатли ва барқарор ривожланиш кафолатидир. Бугун мазкур ерда 250 киловаттли қуёш панеллари ўрнатилмоқда. Бу эса фермер хўжалигининг нафақат ҳосилдорликка, балки “яшил энергия” ташаббусига асосланган замонавий технологияларга ҳам алоҳида эътибор қаратаётганини кўрсатади.

Тош ёп овулидаги “Бекмон Аллаберганов” фермер хўжалиги эса тумандаги энг йирик ва тажрибали хўжаликлардан бири ҳисобланади. Хўжалик раҳбари     Илҳомжон Полвонов нафақат фермер, балки Қорақалпоғистон Республикаси Жўқорғи Кенгеси депутати, Амударё тумани Фермерлар Кенгаши раиси сифатида узоқ йиллардан бери туманнинг аграр тараққиётида фаол иштирок этиб келмоқда. Унинг раҳбарлигидаги хўжаликда 110 гектар экин майдони мавжуд бўлиб, унда пахта, ғалла, дуккакли экинлар, шунингдек, мевали дарахтлар етиштирилмоқда.

Ушбу хўжаликда ҳам давлатимизнинг аграр соҳадаги сиёсати доирасида ажратилаётган имкониятлар самарали қўлланилмоқда. Айниқса, 10 дан ортиқ пахта навларини парвариш қилиш орқали ҳар бир иқлим ва тупроқ шароитига мос навни топишга, энг юқори ҳосилдорликни таъминлашга эришилмоқда. Бундан ташқари, ғалла йиғиб олинганидан сўнг бўшаган ер майдонларига мош экилиб, икки карра ҳосилдорлик тизими йўлга қўйилган. Бу эса фермернинг ерга бўлган меҳри, ҳар қарич заминга барака келтириш мақсадини яққол намоён этади.

Қайд этиш жоизки, жорий йил бошида имзоланган муҳтарам Президентимизнинг Қорақалпоғистон Республикасини комплекс ривожлантириш, тадбиркорликни қўллаб-қувватлаш ва аҳолининг фаровон турмушини таъминлаш борасидаги яна бир алоҳида муҳим фармони билан қишлоқ хўжалиги соҳада ҳам қатор янги имкониятлар белгилаб берилди. Хусусан, ушбу фармон билан 2025-2026 йиллар давомида қишлоқ хўжалигига мўлжалланган ерларни ижарага бериш тартиби енгиллаштирилади, яъни, муддатини кейинчалик узайтириш имконияти билан ижара муддати 30 йилдан 49 йилга узайтирилди, 35 минг гектар бўш турган қишлоқ хўжалигига мўлжалланган ер участкалари электрон онлайн аукцион савдоларига чиқарилади.

Шунингдек, электрон онлайн аукцион савдоларида ер участкасининг бошланғич нархи ер участкаси норматив қийматининг 20 фоизи миқдорида, қайта фойдаланишга киритиладиган ер участкаларининг бошланғич нархи норматив қийматининг 10 фоизи миқдорида белгиланади, ер участкаси нархини 10 йил давомида бўлиб-бўлиб тўлашга рухсат берилади.

Қолаверса, ушбу фармон билан ижарага бериладиган ер участкалари четларида, 20 сотихгача ўлчамда мулк ҳуқуқисиз енгил конструкцияли музлаткичли омборхоналар, саралаш, қайта ишлаш ва қадоқлаш объектлари, сув тежовчи технологиялар, сув сақлаш ҳовузлари, дала шийпонлари ва техника паркларини қуришга рухсат берилди.

Таъкидлаш жоизки, бугун ушбу имкониятлардан фойдаланган юртимиз деҳқони ва фермери ўз меҳнати, фидойилиги ва замонавий ёндашуви билан юрт тараққиётига, миллий иқтисодиётимизнинг мустаҳкам пойдеворига айланмоқда.

Чарос Арслонова, туман ҳокимлигининг Ахборот хизмати раҳбари.