Amudaryolik ilgʻor fermerlar mehnati samarasi hosildor dalalarda namoyon

Bugun yurtimizda qishloq xoʻjaligi sohasida tub oʻzgarishlar, yangilanishlar, modernizatsiya jarayonlari jadallik bilan olib borilmoqda. Prezidentimiz tashabbuslari bilan yaratilayotgan keng koʻlamli imkoniyatlar esa tom maʼnoda mehnatkash dehqon va fermerlar faoliyatida oʻzining ijobiy samarasini bermoqda. Amudaryo tumanida ham bu islohotlar amalda oʻz aksini topmoqda. Ayniqsa, tumandagi ilgʻor fermer xoʻjaliklarining izchil harakati, innovatsiyalarga asoslangan yondashuvlari tumanda iqtisodiy barqarorlikni taʼminlamoqda.

Namuna mahallasida joylashgan “Murodbek Zebo” fermer xoʻjaligi bugungi kunda nafaqat Amudaryo tumani, balki butun viloyat boʻyicha eng namunali xoʻjaliklardan biri sifatida tanilgan. 2015-yilda asos solingan ushbu xoʻjalik rahbari Mansur Eshchanov oʻzining fidokorona mehnati, puxta bilim va tajribasi, eng muhimi, davlatimiz tomonidan yaratib berilgan imkoniyatlardan oqilona foydalanishi orqali yuksak natijalarga erishib kelmoqda.

Fermer xoʻjaligi tasarrufidagi 65 gektar ekin maydonining bugungi kundagi holati har qanday eʼtirofga loyiq. 2025-yilgi mavsum uchun bu yerlarning 35 gektariga paxta, 11 gektariga esa gʻalla ekilgan. Qizigʻi shundaki, agrotexnik tadbirlar belgilangan muddatlarda, zamonaviy usullarda amalga oshirilganligi sababli, hosildorlik ham yuqori darajada taʼminlanmoqda. Jumladan, gʻalla maydonlaridan 70-80 tsentnergacha hosil olinishi bu sohadagi fidokorlik va oʻz ishiga sadoqatli yondashuv natijasidir.

Ahamiyatlisi shundaki, joriy yil boshida imzolangan Oʻzbekiston Respublikasi Prezidentining Qoraqalpogʻiston Respublikasini kompleks rivojlantirish, tadbirkorlikni qoʻllab-quvvatlash va aholining farovon turmushini taʼminlash borasidagi 10-sonli Farmoni asosida xoʻjalikka qoʻshimcha 23 gektar yer maydoni ajratildi. Bu yerda mevali bogʻlar barpo etish, yirik hajmdagi muzlatkich qurish, mahsulotlarni eksport holatida saqlash infratuzilmasini yaratish rejalashtirilgan. Yer maydoni 49-yil muddatga ijaraga berilishi esa uzoq muddatli va barqaror rivojlanish kafolatidir. Bugun mazkur yerda 250 kilovattli quyosh panellari oʻrnatilmoqda. Bu esa fermer xoʻjaligining nafaqat hosildorlikka, balki “yashil energiya” tashabbusiga asoslangan zamonaviy texnologiyalarga ham alohida eʼtibor qaratayotganini koʻrsatadi.

Tosh yop ovulidagi “Bekmon Allaberganov” fermer xoʻjaligi esa tumandagi eng yirik va tajribali xoʻjaliklardan biri hisoblanadi. Xoʻjalik rahbari     Ilhomjon Polvonov nafaqat fermer, balki Qoraqalpogʻiston Respublikasi Joʻqorgʻi Kengesi deputati, Amudaryo tumani Fermerlar Kengashi raisi sifatida uzoq yillardan beri tumanning agrar taraqqiyotida faol ishtirok etib kelmoqda. Uning rahbarligidagi xoʻjalikda 110 gektar ekin maydoni mavjud boʻlib, unda paxta, gʻalla, dukkakli ekinlar, shuningdek, mevali daraxtlar yetishtirilmoqda.

Ushbu xoʻjalikda ham davlatimizning agrar sohadagi siyosati doirasida ajratilayotgan imkoniyatlar samarali qoʻllanilmoqda. Ayniqsa, 10 dan ortiq paxta navlarini parvarish qilish orqali har bir iqlim va tuproq sharoitiga mos navni topishga, eng yuqori hosildorlikni taʼminlashga erishilmoqda. Bundan tashqari, gʻalla yigʻib olinganidan soʻng boʻshagan yer maydonlariga mosh ekilib, ikki karra hosildorlik tizimi yoʻlga qoʻyilgan. Bu esa fermerning yerga boʻlgan mehri, har qarich zaminga baraka keltirish maqsadini yaqqol namoyon etadi.

Qayd etish joizki, joriy yil boshida imzolangan muhtaram Prezidentimizning Qoraqalpogʻiston Respublikasini kompleks rivojlantirish, tadbirkorlikni qoʻllab-quvvatlash va aholining farovon turmushini taʼminlash borasidagi yana bir alohida muhim farmoni bilan qishloq xoʻjaligi sohada ham qator yangi imkoniyatlar belgilab berildi. Xususan, ushbu farmon bilan 2025-2026-yillar davomida qishloq xoʻjaligiga moʻljallangan yerlarni ijaraga berish tartibi yengillashtiriladi, yaʼni, muddatini keyinchalik uzaytirish imkoniyati bilan ijara muddati 30-yildan 49-yilga uzaytirildi, 35 ming gektar boʻsh turgan qishloq xoʻjaligiga moʻljallangan yer uchastkalari elektron onlayn auktsion savdolariga chiqariladi.

Shuningdek, elektron onlayn auktsion savdolarida yer uchastkasining boshlangʻich narxi yer uchastkasi normativ qiymatining 20 foizi miqdorida, qayta foydalanishga kiritiladigan yer uchastkalarining boshlangʻich narxi normativ qiymatining 10 foizi miqdorida belgilanadi, yer uchastkasi narxini 10-yil davomida boʻlib-boʻlib toʻlashga ruxsat beriladi.

Qolaversa, ushbu farmon bilan ijaraga beriladigan yer uchastkalari chetlarida, 20 sotixgacha oʻlchamda mulk huquqisiz yengil konstruktsiyali muzlatkichli omborxonalar, saralash, qayta ishlash va qadoqlash obʼektlari, suv tejovchi texnologiyalar, suv saqlash hovuzlari, dala shiyponlari va texnika parklarini qurishga ruxsat berildi.

Taʼkidlash joizki, bugun ushbu imkoniyatlardan foydalangan yurtimiz dehqoni va fermeri oʻz mehnati, fidoyiligi va zamonaviy yondashuvi bilan yurt taraqqiyotiga, milliy iqtisodiyotimizning mustahkam poydevoriga aylanmoqda.

Charos Arslonova, tuman hokimligining Axborot xizmati rahbari.