Ташаббускор аёл – юрт фаровонлиги йўлида доим ҳаракатда

Амударё туманида бугун юксак саъй-ҳаракатлари, меҳнаткашлиги ва қатъияти билан нафақат оиласини, балки кўплаб юртдошларини иш билан таъминлаб, уларга ҳаёт учун мустаҳкам таянч бўлаётган тадбиркор аёл Дилдора Хайитбоеванинг фаолияти ҳар қандай таҳсинга сазовор.

Унинг тадбиркорлик йўли 2008-йилда, онаси билан бирга кунига бор-йўғи 100 дона нон ва патир ёпишдан бошланган. Вақт ўтиши билан бу кичик ишбилармонлик ташаббуси улкан мақсад ва кенг миқёсдаги ишлаб чиқариш корхонасига айланди. Бугун у раҳбарлик қилаётган корхоналар нон ва нон маҳсулотлари ишлаб чиқаришга ихтисослашган “Равшанбек Юлдузхон” МЧЖ ва сут маҳсулотлари ишлаб чиқарадиган “Камрон Голд Медиа” МЧЖларда 33 нафар юртдошимиз, айниқса, ижтимоий ҳимояга муҳтож аёллар ва ишсиз фуқаролар учун доимий иш ўрни яратилган муҳим масканга айланган.

Дилдора Хайитбоева мамлакат раҳбариятининг тадбиркорликни ривожлантириш борасидаги эътибор ва қўлловини тўғри тушуниб, амалда фойдалана олди. Ўзбекистон Республикаси Президентининг “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги 213-сонли Фармони асосида ажратилган 200 минг АҚШ доллари миқдоридаги имтиёзли кредит ҳисобига Хитой Халқ Республикасидан замонавий дастгоҳ ва асбоб-ускуналарни олиб келди. Бу эса корхонанинг техник қувватини ошириб, маҳсулот турини кенгайтириш ва сифатини яхшилаш имконини берди.

Бугунги кунда корхонада 10 хилдан ортиқ сифатли сут маҳсулотлари ишлаб чиқарилмоқда. Ҳар куни 600 литрдан зиёд сут қайта ишланади. Энг эътиборлиси, ишлаб чиқарилган маҳсулотлар тумандаги давлат мактабгача таълим ташкилотларига шартнома асосида етказиб берилади. Корхонанинг ўзига қарашли 4 та етказиб бериш автомобили мавжуд бўлиб, маҳсулотлар истеъмолчиларга шу куннинг ўзида етказилади. Манғит деҳқон бозорида ташкил этилган дўкон ва ярмаркаларда эса аҳолига маҳсулотлар арзон ва ҳамёнбоп нархларда сотилмоқда.

Тадбиркор Дилдора Хайитбоеванинг келгусидаги режалари ҳам катта. Тумандаги ҳар бир маҳаллада аҳоли учун қулай ва сифатли хизмат кўрсатиш мақсадида сут маҳсулотлари, нон ва ун маҳсулотларини сотувчи шохобчалар ташкил этиш ниятида. Бу эса, бир тарафдан, аҳолига қулайлик яратса, бошқа тарафдан янги иш ўринлари очилишига хизмат қилади.

Алоҳида таъкидлаш лозимки, Дилдора Хайитбоева фақат иқтисодий муваффақиятлар билан эмас, балки ижтимоий масъулият билан ҳам намуна бўла олади. Оналар ва болалар саломатлигини мустаҳкамлаш, айниқса, йод танқислигининг олдини олиш мақсадида ёдланган функционал ун маҳсулотларини ишлаб чиқаришни йўлга қўйди ва бу ун маҳсулотини Амударё тумани аҳолиси орасида кенг ёйишга киришди.

Унинг ташаббуслари, ижтимоий лойиҳалардаги фаоллиги, “Аёллар дафтари”га киритилган аёлларни иш билан таъминлаш борасидаги ҳаракати таҳсинга лойиқ. Бундан ташқари, Дилдора Хайитбоева “Ҳамроҳ” тадбиркор аёллар мактаби аъзоси сифатида доимий равишда ўз билим ва тажрибасини ошириб бормоқда. У кўплаб республика ва халқаро инвестиция форумларининг фаол иштирокчиси бўлиб, хорижий мутахассислар билан тажриба алмашмоқда.

Бугун Дилдора Хайитбоева сингари меҳнатсевар, фидойи, ташаббускор аёллар туфайли Қорақалпоғистон иқтисодиёти ва ижтимоий ҳаётида ижобий ўзгаришлар рўй бермоқда. Уларнинг ҳар бири жамиятнинг ҳар бир қатламига, айниқса, аёллар ва ёшлар ҳаётига янги йўналиш, янги имконият олиб киряпти.

Чарос Арслонова, туман ҳокимлигининг Ахборот хизмати раҳбари.