Tashabbuskor ayol – yurt farovonligi yoʻlida doim harakatda

Amudaryo tumanida bugun yuksak saʼy-harakatlari, mehnatkashligi va qatʼiyati bilan nafaqat oilasini, balki koʻplab yurtdoshlarini ish bilan taʼminlab, ularga hayot uchun mustahkam tayanch boʻlayotgan tadbirkor ayol Dildora Xayitboyevaning faoliyati har qanday tahsinga sazovor.

Uning tadbirkorlik yoʻli 2008-yilda, onasi bilan birga kuniga bor-yoʻgʻi 100 dona non va patir yopishdan boshlangan. Vaqt oʻtishi bilan bu kichik ishbilarmonlik tashabbusi ulkan maqsad va keng miqyosdagi ishlab chiqarish korxonasiga aylandi. Bugun u rahbarlik qilayotgan korxonalar non va non mahsulotlari ishlab chiqarishga ixtisoslashgan “Ravshanbek Yulduzxon” MChJ va sut mahsulotlari ishlab chiqaradigan “Kamron Gold Media” MChJlarda 33 nafar yurtdoshimiz, ayniqsa, ijtimoiy himoyaga muhtoj ayollar va ishsiz fuqarolar uchun doimiy ish oʻrni yaratilgan muhim maskanga aylangan.

Dildora Xayitboyeva mamlakat rahbariyatining tadbirkorlikni rivojlantirish borasidagi eʼtibor va qoʻllovini toʻgʻri tushunib, amalda foydalana oldi. Oʻzbekiston Respublikasi Prezidentining “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi 213-sonli Farmoni asosida ajratilgan 200 ming AQSh dollari miqdoridagi imtiyozli kredit hisobiga Xitoy Xalq Respublikasidan zamonaviy dastgoh va asbob-uskunalarni olib keldi. Bu esa korxonaning texnik quvvatini oshirib, mahsulot turini kengaytirish va sifatini yaxshilash imkonini berdi.

Bugungi kunda korxonada 10 xildan ortiq sifatli sut mahsulotlari ishlab chiqarilmoqda. Har kuni 600 litrdan ziyod sut qayta ishlanadi. Eng eʼtiborlisi, ishlab chiqarilgan mahsulotlar tumandagi davlat maktabgacha taʼlim tashkilotlariga shartnoma asosida yetkazib beriladi. Korxonaning oʻziga qarashli 4 ta yetkazib berish avtomobili mavjud boʻlib, mahsulotlar isteʼmolchilarga shu kunning oʻzida yetkaziladi. Mangʻit dehqon bozorida tashkil etilgan doʻkon va yarmarkalarda esa aholiga mahsulotlar arzon va hamyonbop narxlarda sotilmoqda.

Tadbirkor Dildora Xayitboyevaning kelgusidagi rejalari ham katta. Tumandagi har bir mahallada aholi uchun qulay va sifatli xizmat koʻrsatish maqsadida sut mahsulotlari, non va un mahsulotlarini sotuvchi shoxobchalar tashkil etish niyatida. Bu esa, bir tarafdan, aholiga qulaylik yaratsa, boshqa tarafdan yangi ish oʻrinlari ochilishiga xizmat qiladi.

Alohida taʼkidlash lozimki, Dildora Xayitboyeva faqat iqtisodiy muvaffaqiyatlar bilan emas, balki ijtimoiy masʼuliyat bilan ham namuna boʻla oladi. Onalar va bolalar salomatligini mustahkamlash, ayniqsa, yod tanqisligining oldini olish maqsadida yodlangan funktsional un mahsulotlarini ishlab chiqarishni yoʻlga qoʻydi va bu un mahsulotini Amudaryo tumani aholisi orasida keng yoyishga kirishdi.

Uning tashabbuslari, ijtimoiy loyihalardagi faolligi, “Ayollar daftari”ga kiritilgan ayollarni ish bilan taʼminlash borasidagi harakati tahsinga loyiq. Bundan tashqari, Dildora Xayitboyeva “Hamroh” tadbirkor ayollar maktabi aʼzosi sifatida doimiy ravishda oʻz bilim va tajribasini oshirib bormoqda. U koʻplab respublika va xalqaro investitsiya forumlarining faol ishtirokchisi boʻlib, xorijiy mutaxassislar bilan tajriba almashmoqda.

Bugun Dildora Xayitboyeva singari mehnatsevar, fidoyi, tashabbuskor ayollar tufayli Qoraqalpogʻiston iqtisodiyoti va ijtimoiy hayotida ijobiy oʻzgarishlar roʻy bermoqda. Ularning har biri jamiyatning har bir qatlamiga, ayniqsa, ayollar va yoshlar hayotiga yangi yoʻnalish, yangi imkoniyat olib kiryapti.

Charos Arslonova, tuman hokimligining Axborot xizmati rahbari.