Амударё туманида Халқлар дўстлиги куни кенг нишонланди

2021 йилдан буён Ўзбекистонда ҳар йили 30 июль санаси Халқлар дўстлиги куни сифатида кенг нишонланади. Бу байрам мамлакатимизда яшовчи 130 дан ортиқ миллат ва элат вакиллари ўртасидаги дўстлик, ўзаро ҳурмат ва ҳамжиҳатликни мустаҳкамлашга, “Ўзбекистон – умумий уйимиз” шиорини жамиятимизда янада кенг қулоч ёйдиришга хизмат қилмоқда.

31 июль куни ушбу сана бутун мамлакатимизда бўлгани каби Амударё туманида ҳам кенг нишонланди. Тадбирда туманда яшовчи турли миллат ва элат вакиллари, муассаса ва корхона-ташкилотлар раҳбарлари ҳамда кенг жамоатчилик вакиллари иштирок этди.

Тадбирни туман ҳокимининг ўринбосари Нодирбек Камолов очди ва йиғилганларни Халқлар дўстлиги куни муносабати билан самимий табриклади.

Президентимизнинг Халқлар дўстлиги куни муносабати билан халқимизга йўллаган байрам табригида таъкидланганидек, сўнгги йилларда давлатимиз раҳбарининг қатъий сиёсий иродаси билан минтақамиздаги қардош давлатлар ўртасидаги дўстона алоқалар янги босқичга кўтарилиб, дунё сиёсатида “Марказий Осиё руҳи” деган ибора ва воқелик пайдо бўлгани барчамизнинг умумий ютуғимиздир.

Чиндан ҳам дунёнинг турли минтақаларида миллий ва диний асосда турли низолар давом этаётган ҳозирги ўта таҳликали шароитда ягона Ўзбекистон ғояси асосида энг катта бойлигимиз – юртимиздаги осойишталик ва барқарорлик, ўзаро ҳурмат ва тотувликдир.

Тадбирнинг бадиий қисми жуда бой ва рангбаранг бўлди. Туман Маданият бўлими санъаткорлари ҳамда таълим муассасаларининг жамоалари ватан, дўстлик, тинчлик ва аҳилликни тараннум қилувчи куй-қўшиқлар куйладилар ва миллий рақслар ижро этдилар.

Концерт дастурида турли миллатларнинг фольклор қўшиқлари, анъанавий рақслари ва мусиқий асарлари йиғилганлар эътиборига тақдим этилди. Бу эса туманда яшовчи барча миллат вакилларининг ўз маданиятини намоён этиш имкониятини берди. Қўшиқчилар ва раққосалар ўз ижодлари орқали халқлар ўртасидаги дўстлик ва ҳамжиҳатлик ғояларини тарғиб қилдилар.

Ўзбекистон Республикаси кўп миллатли давлат бўлиб, бу ерда 130 дан ортиқ миллат ва элат вакиллари бир оила бўлиб, тинч-тотув яшаб келмоқда. Халқлар дўстлиги кунининг нишонланиши ҳам айнан шундай кўп миллатли жамиятда тинчлик, барқарорлик ва ўзаро ҳамжиҳатликни таъминлашга қаратилган давлат сиёсатининг ёрқин намунасидир. Бу кун ҳар бир фуқаронинг миллати, дини, тилидан қатъи назар, ягона Ватан фарзанди эканлигини ҳис қилиш имконини беради.

Амударё тумани ҳам худди шундай кўп миллатли ҳудудлардан бири. Бу ерда ўзбеклар, қорақалпоқлар, қозоқлар, туркманлар, руслар, корейслар ва бошқа миллат вакиллари асрлар давомида ёнма-ён яшаб, бир-бирларининг урф-одатлари, маданияти ва анъаналарини ҳурмат қилиб келадилар. Бундай тадбирлар эса улар ўртасидаги алоқаларни янада мустаҳкамлашга, ёш авлодни бағрикенглик руҳида тарбиялашга хизмат қилади.

Халқлар дўстлиги куни муносабати билан ўтказилган тадбир нафақат байрам шукуҳини улашди, балки жамиятда ўзаро ишонч, ҳамжиҳатлик ва бирдамлик муҳитини мустаҳкамлашда муҳим восита бўлди. Бу эса мамлакатимизнинг барқарор ривожланиши, халқимизнинг фаровон ҳаёт кечириши учун мустаҳкам замин яратади.

Халқлар дўстлиги куни фақатгина байрам эмас, балки барча миллат ва элат вакилларининг бирлик ва ҳамжиҳатлигини кўрсатувчи муҳим воқеадир. Амударё туманида ўтказилган тадбир ҳам ушбу олий мақсадларга хизмат қилгани ва аҳоли ўртасида дўстлик руҳини янада мустаҳкамлашга ҳисса қўшгани билан аҳамиятли бўлди.