"АЁЛЛАР ДАФТАРИ": ИҚТИСОДИЙ МУСТАҚИЛЛИКДАН – ИЖТИМОИЙ ФАРОВОНЛИК САРИ

Мамлакатимизда ижтимоий ҳимояга муҳтож хотин-қизларни ҳар томонлама қўллаб-қувватлаш, уларнинг ижтимоий фаоллигини ошириш, иш билан бандлигини таъминлаш орқали жамиятдаги ва оиладаги нуфузини мустаҳкамлаш, ўз ҳаётларидан рози яшашларини таъминлаш борасида олиб борилаётган тизимли ишлар туфайли бугунги аёллар маънавий-маърифий, иқтисодий-маданий ҳаётининг фаол иштирокчисига айланди.

Маълумки, 2022 йил 31 мартда “Хотин-қизлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги Вазирлар Маҳкамасининг Қарори қабул қилиниб, ижтимоий аҳволи ва турмуш шароити оғир, ишсиз ва ижтимоий фаол бўлмаган хотин-қизлар билан “Аёллар дафтари”ни юритиш орқали ишлаш тизимини янада такомиллаштириш, уларни ижтимоий-ҳуқуқий, психологик, тиббий ва моддий қўллаб-қувватлаш чора-тадбирлари белгиланган эди.

Қарорга кўра, “Аёллар дафтари” рўйхатига киритилган ҳар бир аёл-қиз билан тизимли ишлаш, уларнинг қизиқиш ва интилишларини рағбатлантириш орқали ижтимоий фаоллигини ошириш ҳудудлардаги Оила ва хотин-қизлар бўлимларининг биринчи галдаги вазифасига айланган. Бу борада Ўзбекистон Республикаси Оила ва хотин-қизлар қўмитаси томонидан илгари сурилган “Иқтисодий мустақилликдан ижтимоий фаровонлик сари” мавзусидаги ташаббус доирасидаги амалий чора-тадбирлар муҳим аҳамият касб этмоқда.

Ушбу ташаббус доирасида Амударё тумани Оила ва хотин-қизлар бўлими томонидан амалга оширилаётган манзилли ишлар туфайли эндиликда кўплаб аёл-қизлар ҳаётда ўз ўринларини топиб, нафақат ўзларининг, балки қийин вазиятга тушиб қолган, ижтимоий ҳимояга муҳтож маҳалладошларининг ҳам доимий даромад манбаларига эга бўлишларига яқин кўмакчи бўлишмоқда.

Яқинда бўлим томонидан муқаддам “Аёллар дафтари” рўйхатида бўлган ва айни пайтда дафтардан чиқарилиб, ўзларининг тадбиркорлик йўналишларини йўлга қўйган ва оиласи учун доимий даромад манбаига эга бўлган хотин-қизларнинг фаолиятлари ўрганилди.

Ана шундай аёл-қизлардан бири Насиба Собирова Холимбег овулида истиқомат қилади. 2021 йилда “Аёллар дафтари” рўйхатига киритилган Насиба Собирова туман Оила ва хотин-қизлар қўмитасининг қўллаб-қувватлови билан 10 млн. сўм имтиёзли кредит маблағи ҳисобига ўз тадбиркорлик фаолиятини йўлга қўйди. Тўғри, аввалига бироз қийинчиликлар бўлди, тадбиркорлигини бошлаш учун махсус хона ажратиш ва уни жиҳозлашда оила аъзолари ҳам унга яқиндан ёрдам беришди. Замонавий тикувчилик машинасини олиб келиб ўрнатгач, ишлари юришиб кетди. Айни пайтда у тадбиркорлик фаолиятини кенгайтириб, оилавий корхона ташкил этди ва доимий даромад манбаига эга бўлишдан ташқари, жамиятнинг ижтимоий фаол аъзосига, атрофидагиларга ибрат ва намуна бўлиш даражасидаги тадбиркорга айланди.

Тошёп овулида истиқомат қилувчи Шаҳодат Юсупова ҳам 2025 йилнинг бошида “Аёллар дафтари” рўйхатига киритилган эди. У ҳам мазкур дафтар рўйхатидан чиқиш ва мустақил равишда ўз тадбиркорлик фаолиятини йўлга қўйиш ниятида. У шу мақсадда 10 млн. сўмлик имтиёзли кредит маблағи ҳисобига тикув машинаси сотиб олди ва тикувчилик йўналишида ишини бошлаб юборди. Айни кунда Шаҳодат Юсупова ҳамқишлоқларининг буюртмалари асосида чеварлик фаолиятини юритиб, мустақил равишда даромад топмоқда.

Феруза Тажибаева эса 33 млн. сўмлик имтиёзли банк кредити олиб, оилавий мактабгача таълим ташкилоти фаолиятини йўлга қўйиш орқали бир неча маҳалладошининг доимий бандлигини таъминлади.

Амударё туман Оила ва хотин-қизлар бўлими томонидан қўллаб-қувватланиб, “Аёллар дафтари” рўйхатидан чиқарилган ва айни пайтда тадбиркорлик фаолиятларини бошлаб, ўз маҳаллаларидаги ижтимоий ҳимояга муҳтож хотин-қизларга намуна бўлаётган бундай аёл-қизлар талайгина. Уларнинг аксарияти ишсиз, ижтимоий ҳимояга муҳтож ёшларга чеварлик сирларини ўргатиш орқали ўз даромад манбаларини мустақил равишда яратишларида яқиндан ёрдам беришмоқда.

Оила ва хотин-қизлар бўлими томонидан Оила масканида “Аёллар дафтари”га киритилган, тазйиқ ва зўравонликка учраган, турмуш муаммоларидан қийналган, ўз ҳаётидан норози аёл-қизлар учун психологик семинар-тренинг ҳам ташкил этилиб, олдин жуда бир қийин аҳволда “Аёллар дафтари” рўйхатига киритилган, маълум муддатдан сўнг имтиёзли кредит маблағи олиб, ўзларининг тадбиркорлик йўналишларини бошлаган, бугунги кунда ибратли ишлари билан эл-юрт эътиборини қозонаётган аёл-қизлар, уларнинг қийинчиликларни енгиб ўтишдаги ҳаётий тажрибалари семинар-тренинг иштирокчиларига ибрат қилиб кўрсатилди.

Семинар-тренинг давомида тазйиқ ва зўравонликка учраган, турмуш зиддиятларидан чарчаган ва ўзларининг ҳаётларидан норози аёл-қизлар билан малакали психологлар индивидуал асосда суҳбатлар олиб бордилар ва уларни қизиқтирган саволларга жавоблар бердилар.

Оиладаги тазйиқ ва зўравонликлар аёл учун ҳукм эмас. У давлат ва жамият ҳимоясида эканини унутмаслиги керак. Ўз навбатида “Аёллар дафтари” рўйхатида бўлиш — бу ўзини билган хотин-қизлар учун шу дафтар рўйхатида доимий қолиш, давлатнинг ижтимоий ҳимоясига кўз тикиб ўтириш дегани эмас. Аксинча, “Аёллар дафтари” орқали маълум даромад манбаига эга бўлган, молиявий мустақилликка эришган хотин-қизларни ижтимоий фаол шахсларга айлантириш Оила ва хотин-қизлар қўмитасининг энг катта мақсади, давлатимиз ва жамиятимизнинг умидидир.

Робия Йўлдошева.