"AYoLLAR DAFTARI": IQTISODIY MUSTAQILLIKDAN – IJTIMOIY FAROVONLIK SARI

Mamlakatimizda ijtimoiy himoyaga muhtoj xotin-qizlarni har tomonlama qoʻllab-quvvatlash, ularning ijtimoiy faolligini oshirish, ish bilan bandligini taʼminlash orqali jamiyatdagi va oiladagi nufuzini mustahkamlash, oʻz hayotlaridan rozi yashashlarini taʼminlash borasida olib borilayotgan tizimli ishlar tufayli bugungi ayollar maʼnaviy-maʼrifiy, iqtisodiy-madaniy hayotining faol ishtirokchisiga aylandi.

Maʼlumki, 2022-yil 31-martda “Xotin-qizlar muammolarini oʻrganish va hal etish tizimini yanada takomillashtirish chora-tadbirlari toʻgʻrisida”gi Vazirlar Mahkamasining Qarori qabul qilinib, ijtimoiy ahvoli va turmush sharoiti ogʻir, ishsiz va ijtimoiy faol boʻlmagan xotin-qizlar bilan “Ayollar daftari”ni yuritish orqali ishlash tizimini yanada takomillashtirish, ularni ijtimoiy-huquqiy, psixologik, tibbiy va moddiy qoʻllab-quvvatlash chora-tadbirlari belgilangan edi.

Qarorga koʻra, “Ayollar daftari” roʻyxatiga kiritilgan har bir ayol-qiz bilan tizimli ishlash, ularning qiziqish va intilishlarini ragʻbatlantirish orqali ijtimoiy faolligini oshirish hududlardagi Oila va xotin-qizlar boʻlimlarining birinchi galdagi vazifasiga aylangan. Bu borada Oʻzbekiston Respublikasi Oila va xotin-qizlar qoʻmitasi tomonidan ilgari surilgan “Iqtisodiy mustaqillikdan ijtimoiy farovonlik sari” mavzusidagi tashabbus doirasidagi amaliy chora-tadbirlar muhim ahamiyat kasb etmoqda.

Ushbu tashabbus doirasida Amudaryo tumani Oila va xotin-qizlar boʻlimi tomonidan amalga oshirilayotgan manzilli ishlar tufayli endilikda koʻplab ayol-qizlar hayotda oʻz oʻrinlarini topib, nafaqat oʻzlarining, balki qiyin vaziyatga tushib qolgan, ijtimoiy himoyaga muhtoj mahalladoshlarining ham doimiy daromad manbalariga ega boʻlishlariga yaqin koʻmakchi boʻlishmoqda.

Yaqinda boʻlim tomonidan muqaddam “Ayollar daftari” roʻyxatida boʻlgan va ayni paytda daftardan chiqarilib, oʻzlarining tadbirkorlik yoʻnalishlarini yoʻlga qoʻygan va oilasi uchun doimiy daromad manbaiga ega boʻlgan xotin-qizlarning faoliyatlari oʻrganildi.

Ana shunday ayol-qizlardan biri Nasiba Sobirova Xolimbeg ovulida istiqomat qiladi. 2021-yilda “Ayollar daftari” roʻyxatiga kiritilgan Nasiba Sobirova tuman Oila va xotin-qizlar qoʻmitasining qoʻllab-quvvatlovi bilan 10 mln. soʻm imtiyozli kredit mablagʻi hisobiga oʻz tadbirkorlik faoliyatini yoʻlga qoʻydi. Toʻgʻri, avvaliga biroz qiyinchiliklar boʻldi, tadbirkorligini boshlash uchun maxsus xona ajratish va uni jihozlashda oila aʼzolari ham unga yaqindan yordam berishdi. Zamonaviy tikuvchilik mashinasini olib kelib oʻrnatgach, ishlari yurishib ketdi. Ayni paytda u tadbirkorlik faoliyatini kengaytirib, oilaviy korxona tashkil etdi va doimiy daromad manbaiga ega boʻlishdan tashqari, jamiyatning ijtimoiy faol aʼzosiga, atrofidagilarga ibrat va namuna boʻlish darajasidagi tadbirkorga aylandi.

Toshyop ovulida istiqomat qiluvchi Shahodat Yusupova ham 2025-yilning boshida “Ayollar daftari” roʻyxatiga kiritilgan edi. U ham mazkur daftar roʻyxatidan chiqish va mustaqil ravishda oʻz tadbirkorlik faoliyatini yoʻlga qoʻyish niyatida. U shu maqsadda 10 mln. soʻmlik imtiyozli kredit mablagʻi hisobiga tikuv mashinasi sotib oldi va tikuvchilik yoʻnalishida ishini boshlab yubordi. Ayni kunda Shahodat Yusupova hamqishloqlarining buyurtmalari asosida chevarlik faoliyatini yuritib, mustaqil ravishda daromad topmoqda.

Feruza Tajibayeva esa 33 mln. soʻmlik imtiyozli bank krediti olib, oilaviy maktabgacha taʼlim tashkiloti faoliyatini yoʻlga qoʻyish orqali bir necha mahalladoshining doimiy bandligini taʼminladi.

Amudaryo tuman Oila va xotin-qizlar boʻlimi tomonidan qoʻllab-quvvatlanib, “Ayollar daftari” roʻyxatidan chiqarilgan va ayni paytda tadbirkorlik faoliyatlarini boshlab, oʻz mahallalaridagi ijtimoiy himoyaga muhtoj xotin-qizlarga namuna boʻlayotgan bunday ayol-qizlar talaygina. Ularning aksariyati ishsiz, ijtimoiy himoyaga muhtoj yoshlarga chevarlik sirlarini oʻrgatish orqali oʻz daromad manbalarini mustaqil ravishda yaratishlarida yaqindan yordam berishmoqda.

Oila va xotin-qizlar boʻlimi tomonidan Oila maskanida “Ayollar daftari”ga kiritilgan, tazyiq va zoʻravonlikka uchragan, turmush muammolaridan qiynalgan, oʻz hayotidan norozi ayol-qizlar uchun psixologik seminar-trening ham tashkil etilib, oldin juda bir qiyin ahvolda “Ayollar daftari” roʻyxatiga kiritilgan, maʼlum muddatdan soʻng imtiyozli kredit mablagʻi olib, oʻzlarining tadbirkorlik yoʻnalishlarini boshlagan, bugungi kunda ibratli ishlari bilan el-yurt eʼtiborini qozonayotgan ayol-qizlar, ularning qiyinchiliklarni yengib oʻtishdagi hayotiy tajribalari seminar-trening ishtirokchilariga ibrat qilib koʻrsatildi.

Seminar-trening davomida tazyiq va zoʻravonlikka uchragan, turmush ziddiyatlaridan charchagan va oʻzlarining hayotlaridan norozi ayol-qizlar bilan malakali psixologlar individual asosda suhbatlar olib bordilar va ularni qiziqtirgan savollarga javoblar berdilar.

Oiladagi tazyiq va zoʻravonliklar ayol uchun hukm emas. U davlat va jamiyat himoyasida ekanini unutmasligi kerak. Oʻz navbatida “Ayollar daftari” roʻyxatida boʻlish — bu oʻzini bilgan xotin-qizlar uchun shu daftar roʻyxatida doimiy qolish, davlatning ijtimoiy himoyasiga koʻz tikib oʻtirish degani emas. Aksincha, “Ayollar daftari” orqali maʼlum daromad manbaiga ega boʻlgan, moliyaviy mustaqillikka erishgan xotin-qizlarni ijtimoiy faol shaxslarga aylantirish Oila va xotin-qizlar qoʻmitasining eng katta maqsadi, davlatimiz va jamiyatimizning umididir.

Robiya Yoʻldosheva.