Пахта уруғчилиги бўйича республика семинарига Амударё тумани мезбонлик қилди

Амударё туманининг Тошёп овулидаги “Бекмон Аллаберганов” фермер хўжалигида 2025 йилги мавсум олдидан республика миқёсида кенг кўламли ўқув-амалий кўргазмали семинар бўлиб ўтди. Тадбирнинг асосий мақсади – ғўза майдонларида уруғлик учун экилган пахта экинларида апробация ўтказиш жараёнини чуқур ўрганиш ва мамлакатимиз учун сифатли уруғлик жамғармасини яратиш бўйича тажриба алмашишдир.

Семинарда Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев, Амударё тумани ҳокими Собир Хўжаметов, республика бўйича туманлар ҳокимларининг қишлоқ ва сув хўжалиги масалалари бўйича ўринбосарлари, қишлоқ хўжалиги бўлимларининг агротехнология бўйича масъуллари, Ўзагроинспекция ҳамда Ўсимликлар карантини ва ҳимояси агентлиги туман бўлими бошлиқлари, “Қишлоқ хўжалиги экинлари уруғлари сифатини баҳолаш маркази” давлат унитар корхонасининг туман бўлими вакиллари, пахта-тўқимачилик кластерлари раҳбарлари, шунингдек, хорижий навли пахта етиштираётган ва уруғчилик билан шуғулланаётган илғор фермер хўжаликлари раҳбарлари қатнашди.

Семинар давомида иштирокчиларга апробация жараёнининг техник талаблари, нав тозалигини таъминлаш усуллари, уруғлик сифатини баҳолаш мезонлари, шунингдек, селекция ютуқларидан самарали фойдаланиш бўйича батафсил маълумотлар берилди. Далада амалий кўргазмалар ўтказилиб, ҳар бир босқич бўйича тажрибали мутахассислар томонидан изоҳлар берилди.

Семинарда сўзга чиққанлар сифатли уруғлик жамғармасини яратиш масаласида қатъий ёндашув зарурлигини таъкидлади: “Апробация – бу фақат назорат жараёни эмас, балки келажак ҳосилининг кафолатидир. Агар биз бугун уруғлик сифатига эътибор бермасак, эртанги ҳосил ҳажми ва сифати ҳақида гапириш қийин бўлади. Ҳар бир фермер уруғ танлашдан тортиб, йиғим-теримгача бўлган жараёнда аниқлик ва масъулиятни биринчи ўринга қўйиши шарт”, - деди Шуҳрат Тешаев.

Шундан сўнг Амударё тумани ҳокими Собир Хўжаметов сўзга чиқиб, туманда уруғчилик соҳасида амалга оширилаётган ишлар ҳақида батафсил тўхталди. Қайд этилишича, сўнгги йилларда туман далаларида замонавий агротехнологиялар кенг жорий этилмоқда, уруғлик майдонларида нав тозалигини таъминлаш учун қатъий назорат тизими йўлга қўйилган. Шунингдек, пахта экинларида сув тежовчи томчилатиб суғориш усуллари ва минерал ўғитлардан меъёрида фойдаланиш технологиялари кенг қўлланмоқда.

“Бугунги апробация жараёни бизнинг амалий ишларимизни янада мукаммаллаштириш, уруғчилик хўжаликларининг тажрибасини умумлаштиришга хизмат қилади. Мақсадимиз — туманда етиштирилаётган уруғлик пахтанинг ҳар бир дони сифат жиҳатидан халқаро талабга жавоб беришига эришишдир. Бу нафақат Амударё тумани, балки бутун республикамиз аграр салоҳиятини оширади,” — дея таъкидлади туман ҳокими ўз нутқида.

Тадбир давомида хорижий навли пахтанинг афзалликлари, уларни маҳаллий иқлим шароитига мослаштириш тажрибалари, сув тежовчи технологиялар билан уйғунлаштириш имкониятлари ҳам муҳокама қилинди. Иштирокчилар ғўза апробацияси бўйича янги методик қўлланмалар, агротехник меъёрлар ва халқаро тажрибалар билан танишдилар.

Семинар якунида соҳа вакиллари ўзаро тажриба алмашиб, уруғлик хўжаликлари ва кластер корхоналари ўртасида ҳамкорлик алоқаларини мустаҳкамлаш бўйича келишувларга эришилди. Бу эса, келгуси мавсумда юқори сифатли, нави тоза ва рақобатбардош пахта ҳосилини етиштиришга мустаҳкам замин яратади.

Амударё далаларидан бошланган бу ташаббус — бутун республика миқёсида қишлоқ хўжалиги самарадорлигини оширишга хизмат қилувчи муҳим қадамлардан биридир.

Чарос Арслонова, туман ҳокимлигининг Ахборот хизмати раҳбари.