Тарбиячи-педагоглар маҳоратини ошириш – болалар камолоти гарови

Мактабгача таълим ташкилотлари тарбиячи-педагогларининг билим ва малакаларини тизимли турда ошириб бориш, айниқса, тарбияланувчиларни йилнинг тўрт фаслига монанд равишда таълимий ва тарбиявий машғулотлар билан қамраб олиш мақсадида Амударё туман Мактабгача ва мактаб таълими бўлими мутахассислари томонидан семинар-ўқув машғулотлари ташкиллаштирилмоқда. Бу каби ўзаро тажриба алмашув тадбирлари муҳим тарбияланувчиларни хавфсиз овқатлантириш ва шу асосда уларнинг ёш тоифаларига мутаносиб равишда ўйин машғулотларига жалб этилишини таъминлаш, чиниқтириш имконини бермоқда.

Айни пайтда мактабгача таълим ташкилотларида “Долзарб 90 кун” лойиҳаси доирасидаги ёзги соғломлаштириш ойлиги учун режалаштирилган семинар-ўқув машғулотлари олиб борилиб, бу машғулотларда тарбиячи-педагогларнинг касбий маҳоратларини оширишга алоҳида эътибор қаратилмоқда.

Жорий йилнинг 13 август санасида Амударё туман Мактабгача ва мактаб таълими бўлими тасарруфидаги 23-сонли давлат мактабгача таълим ташкилотида бўлиб ўтган семинар ҳам мактабгача таълим ташкилотларида таълим ва тарбия сифатини янада яхшилаш ва тарбиячиларнинг касбий маҳоратини ошириш масалаларига бағишланди.

Кўргазмали ўқув- семинарда болаларни ёз мавсумига мос хавфсиз овқатлантириш, турли жисмоний ва ақлий машқларни бажаришларида ёз мавсумининг ўзига хос иқлим шароитидан келиб чиққан ҳолда ўйинларни режалаштириш, уларнинг иссиқ ҳароратда толиқиб қолишларининг олдини олиш, ақлан ва жисмонан чиниқишлари учун зарур шарт-шароитлар яратиш борасида ўзаро тажриба алмашувлар ҳамда маҳоратли тарбиячи-педагогларнинг фойдали тавсиялари бўйича машғулотлар олиб борилди.

Тадбирда Мактабгача ва мактаб таълими бўлимининг методисти Сауле Патуллаева, давлат мактабгача таълим ташкилотлари раҳбарлари, туманнинг Қипчоқ ҳудудида фаолият олиб борувчи давлат мактабгача таълим ташкилотларининг тарбиячи-педагоглари ва ёрдамчи тарбиячилари иштирок этишди.

Кўргазмали ўқув семинарни Мактабгача таълим ташкилотлари фаолиятини мувофиқлаштириш шуъбаси методисти Сауле Патуллаева очди ва тадбирни ўтказишдан кўзланган мақсад ҳамда кутилаётган натижалар хусусида иштирокчиларга батафсил маълумотлар берди. Хусусан, мактабгача ёшдаги болаларнинг ўқув-тарбиявий жараёнини ташкил этиш ва амалга ошириш бўйича белгиланган режа ва топшириқларнинг мазмун-моҳияти юзасидан батафсил маълумотлар берилди. Шунингдек, ушбу вазифаларни амалга оширишда тарбиячиларнинг амалий кўникмаларини ривожлантириш муҳим аҳамият касб этиши таъкидланди.

Маълумот ўрнида айтиш жоизки, 23-сонли мактабгача таълим ташкилоти тумандаги намунали таълим-тарбия муассасаларидан бири бўлиб, бу ерда 6та гуруҳда 170 нафар кичкинтой тарбияланмоқда. Улардан 4 таси асосий, 2 таси қисқа гуруҳлар бўлиб, болажонларнинг яйраб ўсишлари учун барча зарур шароитлар яратилган. Муассасада 28 нафар малакали ходимлар замон талаблари даражасида таълим-тарбия беришмоқда. 7нафар тарбиячи-педагог ва 6 нафар ёрдамчи тарбиячилар, шунингдек, 2 нафар инглиз ва рус тили ўқитувчилари, малакали мусиқа ўқитувчиси, жисмоний тарбия йўриқчиси ҳам самарали фаолият олиб бормоқда. Муассасада йўлга қўйилган ўзига хос тартиб-интизом туфайли йил давомида мавсумий ўйин-машғулотлари, болаларни хавфсиз овқатлантиришга қаратилган режавий чора-тадбирларнинг сифатли амалга оширилишига алоҳида эътибор қаратилади.

Бўлиб ўтган кўргазмали ўқув- семинари давомида иштирокчилар мазкур муассасада тарбиячи-педагоглар томонидан амалга оширилаётган таълим-тарбия ишлари билан яқиндан танишдилар. “Долзарб 90 кун” лойиҳаси доирасида, ёзги соғломлаштириш ойлиги учун белгиланган режавий-машғулотларни ташкиллаштириш, ўтказилаётган мавсумий ўйин-машғулотларининг турлари, мавсумга мос равишда машғулотларни режалаштириш бўйича шахсий тажрибалари, қимматли маслаҳаттлари ҳамда тавсиялари семинар иштирокчиларида катта таассурот қолдирди.

Ёзги давр болалар учун нафақат мириқиб дам олиш, балки уларнинг соғлигини мустаҳкамлаш, табиат билан яқиндан алоқа қилиш, экологик маданиятини шакллантириш, янги кўникмаларни эгаллаш ва ижтимоий муносабатларини мустаҳкамлаш учун қулай имкониятдир. Бу борада соҳа вазирлиги томонидан ёз мавсумида амалга ошириладиган таълим-тарбия ишлари, амалий машғулотларни тўғри ташкил этиш бўйича зарур қўлланма ва тавсиялар ишлаб чиқилган бўлиб, кўргазмали ўқув-семинарида ушбу қўлланма ва тавсиялар асосида 23-сонли мактабгача таълим ташкилоти тарбиячиларининг олиб бораётган таълимий ва тарбиявий ишлари ҳам ўрганилди.

Иштирокчилар 5 та гуруҳга бўлиниб ёзги соғломлаштириш ишлари ҳамда ёз мавсумида ўтказилаётган ақлий ва жисмоний машғулотларни, мусиқий дам олиш соатларини ташкиллаштириш жараёнларини кузатдилар ҳамда бу борада ўзаро тажриба алмашдилар.

Робия ЙЎЛДОШЕВА.