Tarbiyachi-pedagoglar mahoratini oshirish – bolalar kamoloti garovi

Maktabgacha taʼlim tashkilotlari tarbiyachi-pedagoglarining bilim va malakalarini tizimli turda oshirib borish, ayniqsa, tarbiyalanuvchilarni yilning toʻrt fasliga monand ravishda taʼlimiy va tarbiyaviy mashgʻulotlar bilan qamrab olish maqsadida Amudaryo tuman Maktabgacha va maktab taʼlimi boʻlimi mutaxassislari tomonidan seminar-oʻquv mashgʻulotlari tashkillashtirilmoqda. Bu kabi oʻzaro tajriba almashuv tadbirlari muhim tarbiyalanuvchilarni xavfsiz ovqatlantirish va shu asosda ularning yosh toifalariga mutanosib ravishda oʻyin mashgʻulotlariga jalb etilishini taʼminlash, chiniqtirish imkonini bermoqda.

Ayni paytda maktabgacha taʼlim tashkilotlarida “Dolzarb 90 kun” loyihasi doirasidagi yozgi sogʻlomlashtirish oyligi uchun rejalashtirilgan seminar-oʻquv mashgʻulotlari olib borilib, bu mashgʻulotlarda tarbiyachi-pedagoglarning kasbiy mahoratlarini oshirishga alohida eʼtibor qaratilmoqda.

Joriy yilning 13-avgust sanasida Amudaryo tuman Maktabgacha va maktab taʼlimi boʻlimi tasarrufidagi 23-sonli davlat maktabgacha taʼlim tashkilotida boʻlib oʻtgan seminar ham maktabgacha taʼlim tashkilotlarida taʼlim va tarbiya sifatini yanada yaxshilash va tarbiyachilarning kasbiy mahoratini oshirish masalalariga bagʻishlandi.

Koʻrgazmali oʻquv- seminarda bolalarni yoz mavsumiga mos xavfsiz ovqatlantirish, turli jismoniy va aqliy mashqlarni bajarishlarida yoz mavsumining oʻziga xos iqlim sharoitidan kelib chiqqan holda oʻyinlarni rejalashtirish, ularning issiq haroratda toliqib qolishlarining oldini olish, aqlan va jismonan chiniqishlari uchun zarur shart-sharoitlar yaratish borasida oʻzaro tajriba almashuvlar hamda mahoratli tarbiyachi-pedagoglarning foydali tavsiyalari boʻyicha mashgʻulotlar olib borildi.

Tadbirda Maktabgacha va maktab taʼlimi boʻlimining metodisti Saule Patullayeva, davlat maktabgacha taʼlim tashkilotlari rahbarlari, tumanning Qipchoq hududida faoliyat olib boruvchi davlat maktabgacha taʼlim tashkilotlarining tarbiyachi-pedagoglari va yordamchi tarbiyachilari ishtirok etishdi.

Koʻrgazmali oʻquv seminarni Maktabgacha taʼlim tashkilotlari faoliyatini muvofiqlashtirish shuʼbasi metodisti Saule Patullayeva ochdi va tadbirni oʻtkazishdan koʻzlangan maqsad hamda kutilayotgan natijalar xususida ishtirokchilarga batafsil maʼlumotlar berdi. Xususan, maktabgacha yoshdagi bolalarning oʻquv-tarbiyaviy jarayonini tashkil etish va amalga oshirish boʻyicha belgilangan reja va topshiriqlarning mazmun-mohiyati yuzasidan batafsil maʼlumotlar berildi. Shuningdek, ushbu vazifalarni amalga oshirishda tarbiyachilarning amaliy koʻnikmalarini rivojlantirish muhim ahamiyat kasb etishi taʼkidlandi.

Maʼlumot oʻrnida aytish joizki, 23-sonli maktabgacha taʼlim tashkiloti tumandagi namunali taʼlim-tarbiya muassasalaridan biri boʻlib, bu yerda 6ta guruhda 170 nafar kichkintoy tarbiyalanmoqda. Ulardan 4 tasi asosiy, 2 tasi qisqa guruhlar boʻlib, bolajonlarning yayrab oʻsishlari uchun barcha zarur sharoitlar yaratilgan. Muassasada 28 nafar malakali xodimlar zamon talablari darajasida taʼlim-tarbiya berishmoqda. 7nafar tarbiyachi-pedagog va 6 nafar yordamchi tarbiyachilar, shuningdek, 2 nafar ingliz va rus tili oʻqituvchilari, malakali musiqa oʻqituvchisi, jismoniy tarbiya yoʻriqchisi ham samarali faoliyat olib bormoqda. Muassasada yoʻlga qoʻyilgan oʻziga xos tartib-intizom tufayli yil davomida mavsumiy oʻyin-mashgʻulotlari, bolalarni xavfsiz ovqatlantirishga qaratilgan rejaviy chora-tadbirlarning sifatli amalga oshirilishiga alohida eʼtibor qaratiladi.

Boʻlib oʻtgan koʻrgazmali oʻquv- seminari davomida ishtirokchilar mazkur muassasada tarbiyachi-pedagoglar tomonidan amalga oshirilayotgan taʼlim-tarbiya ishlari bilan yaqindan tanishdilar. “Dolzarb 90 kun” loyihasi doirasida, yozgi sogʻlomlashtirish oyligi uchun belgilangan rejaviy-mashgʻulotlarni tashkillashtirish, oʻtkazilayotgan mavsumiy oʻyin-mashgʻulotlarining turlari, mavsumga mos ravishda mashgʻulotlarni rejalashtirish boʻyicha shaxsiy tajribalari, qimmatli maslahattlari hamda tavsiyalari seminar ishtirokchilarida katta taassurot qoldirdi.

Yozgi davr bolalar uchun nafaqat miriqib dam olish, balki ularning sogʻligini mustahkamlash, tabiat bilan yaqindan aloqa qilish, ekologik madaniyatini shakllantirish, yangi koʻnikmalarni egallash va ijtimoiy munosabatlarini mustahkamlash uchun qulay imkoniyatdir. Bu borada soha vazirligi tomonidan yoz mavsumida amalga oshiriladigan taʼlim-tarbiya ishlari, amaliy mashgʻulotlarni toʻgʻri tashkil etish boʻyicha zarur qoʻllanma va tavsiyalar ishlab chiqilgan boʻlib, koʻrgazmali oʻquv-seminarida ushbu qoʻllanma va tavsiyalar asosida 23-sonli maktabgacha taʼlim tashkiloti tarbiyachilarining olib borayotgan taʼlimiy va tarbiyaviy ishlari ham oʻrganildi.

Ishtirokchilar 5 ta guruhga boʻlinib yozgi sogʻlomlashtirish ishlari hamda yoz mavsumida oʻtkazilayotgan aqliy va jismoniy mashgʻulotlarni, musiqiy dam olish soatlarini tashkillashtirish jarayonlarini kuzatdilar hamda bu borada oʻzaro tajriba almashdilar.

Robiya YOʻLDOShEVA.