"Инсон" ижтимоий хизматлар маркази: маҳаллаларда меҳр-мурувват ва эътибор манбаи

Бугунги кунда Ўзбекистонда ижтимоий давлат тамойилларини ҳаётга татбиқ этиш, аҳолининг эҳтиёжманд қатламларини қўллаб-қувватлаш давлат сиёсатининг устувор йўналишига айланган. Президентимиз ташаббуси билан ташкил этилган Ижтимоий ҳимоя миллий агентлиги ва унинг ҳудудий бўлинмалари – “Инсон” ижтимоий хизматлар марказлари айнан шу мақсадларга хизмат қилмоқда.

Амударё туманининг Олмазор маҳалласида фаолият юритаётган ижтимоий ходим Шарофат Қурбониязованинг фаолияти мисолида ҳам бу тизимнинг самарадорлигини яққол кўриш мумкин.

Ҳар бир оила эътиборда

2024 йилнинг сентябрь ойидан мазкур лавозимда иш бошлаган Шарофат Қурбониязова қисқа вақт ичида кенг қамровли ишларни амалга оширди. Маҳалладаги 656 та хонадон ва 1 минг 25 та оила, умумий 3 минг 242 нафар аҳолининг ижтимоий аҳволи чуқур ўрганилди. Натижада, 140 нафар ногиронлиги бор шахслар, 68 та кам таъминланган оилалар, 37 та камбағал оилалар, 9 нафар васийликка олинган болалар ҳамда 3 нафар тазйиқ ва зўравонликка учраган аёллар аниқланиб, улар билан алоҳида иш олиб бориш тартиби йўлга қўйилди.

Ижтимоий ходим маҳалла раиси билан ҳамкорликда эҳтиёжманд фуқароларга манзилли ёрдам кўрсатишни ҳам тизимли равишда йўлга қўйди. Мисол учун, 19 нафар ногиронлиги бор шахсга турли хил мосламалар – ногиронлик аравачаси, ҳасса, қўлтиқ таёқ ва эшитиш мосламалари берилди. Шунингдек, 3 нафар биринчи гуруҳ ногиронлиги бор шахсларга уларнинг фарзандлари қаровчи этиб бириктирилди ва уларга иш стажи ҳисобланмоқда. Бу чора нафақат моддий, балки маънавий кўмак беришнинг ҳам ёрқин намунасидир.

Ҳам моддий, ҳам руҳий ёрдам

Олмазор маҳалласида ҳозирда 66 та оилага болалар нафақаси, 2 та оилага эса моддий ёрдам кўрсатилмоқда. Бундан ташқари, 4 нафар фуқарога ногиронлик гуруҳи тайинланишига эришилди. Ўзбекистон Республикаси Вазирлар Маҳкамасининг 2024 йил 16 апрелдаги қарорига асосан, 80 та эҳтиёжманд оила учун электр энергияси ва табиий газ истеъмолидаги қўшимча харажатларни қоплаш мақсадида рўйхат шакллантирилиб, “Инсон” ижтимоий хизматлар марказига тақдим этилди.

Ижтимоий ходимнинг фаолияти фақатгина моддий ёрдам билан чекланиб қолмайди. Тазйиқ ва зўравонликдан жабрланган 6 нафар аёлга маҳалла фаоллари ва марказ психологлари ёрдамида руҳий маслаҳатлар ҳам бериб борилмоқда. Маҳаллада яшовчи Гулбахор Матиякубова, Янгибой Собиров ва Соҳида Кўкланова каби яна кўплаб биринчи гуруҳ ногиронларининг хонадонларига ижтимоий ходим тез-тез ташриф буюриб, уларнинг ҳолидан хабар олади. Бундай эътибор аҳолининг давлатга бўлган ишончини янада мустаҳкамлашга, ижтимоий ҳимоянинг манзилли бўлишини таъминлашга хизмат қилмоқда.

Маҳалла даражасида комплекс хизматлар кўрсатиш орқали ҳар бир эҳтиёжманд фуқарога индивидуал  ёндашув қўлланилмоқда. Бу фақат моддий ёрдам эмас, балки инсонларнинг ижтимоий интеграциясини таъминлаш, уларнинг ўз кучига бўлган ишончини қайтариш ва мустақил ҳаёт кечиришга тайёрлашни ўз ичига оладиган яхлит тизимдир.

Хулоса қилиб айтганда, “Инсон” ижтимоий хизматлар маркази ходимлари маҳалладаги ҳар бир фуқаронинг муаммосига эътибор қаратиб, уларни ҳал этишга амалий ёрдам бермоқдалар. Бу эса мамлакатимизда ижтимоий ҳимоя тизими ҳақиқатдан ҳам янги сифат босқичига кўтарилганидан далолат беради.