"Inson" ijtimoiy xizmatlar markazi: mahallalarda mehr-muruvvat va eʼtibor manbai

Bugungi kunda Oʻzbekistonda ijtimoiy davlat tamoyillarini hayotga tatbiq etish, aholining ehtiyojmand qatlamlarini qoʻllab-quvvatlash davlat siyosatining ustuvor yoʻnalishiga aylangan. Prezidentimiz tashabbusi bilan tashkil etilgan Ijtimoiy himoya milliy agentligi va uning hududiy boʻlinmalari – “Inson” ijtimoiy xizmatlar markazlari aynan shu maqsadlarga xizmat qilmoqda.

Amudaryo tumanining Olmazor mahallasida faoliyat yuritayotgan ijtimoiy xodim Sharofat Qurboniyazovaning faoliyati misolida ham bu tizimning samaradorligini yaqqol koʻrish mumkin.

Har bir oila eʼtiborda

2024-yilning sentyabr oyidan mazkur lavozimda ish boshlagan Sharofat Qurboniyazova qisqa vaqt ichida keng qamrovli ishlarni amalga oshirdi. Mahalladagi 656 ta xonadon va 1 ming 25 ta oila, umumiy 3 ming 242 nafar aholining ijtimoiy ahvoli chuqur oʻrganildi. Natijada, 140 nafar nogironligi bor shaxslar, 68 ta kam taʼminlangan oilalar, 37 ta kambagʻal oilalar, 9 nafar vasiylikka olingan bolalar hamda 3 nafar tazyiq va zoʻravonlikka uchragan ayollar aniqlanib, ular bilan alohida ish olib borish tartibi yoʻlga qoʻyildi.

Ijtimoiy xodim mahalla raisi bilan hamkorlikda ehtiyojmand fuqarolarga manzilli yordam koʻrsatishni ham tizimli ravishda yoʻlga qoʻydi. Misol uchun, 19 nafar nogironligi bor shaxsga turli xil moslamalar – nogironlik aravachasi, hassa, qoʻltiq tayoq va eshitish moslamalari berildi. Shuningdek, 3 nafar birinchi guruh nogironligi bor shaxslarga ularning farzandlari qarovchi etib biriktirildi va ularga ish staji hisoblanmoqda. Bu chora nafaqat moddiy, balki maʼnaviy koʻmak berishning ham yorqin namunasidir.

Ham moddiy, ham ruhiy yordam

Olmazor mahallasida hozirda 66 ta oilaga bolalar nafaqasi, 2 ta oilaga esa moddiy yordam koʻrsatilmoqda. Bundan tashqari, 4 nafar fuqaroga nogironlik guruhi tayinlanishiga erishildi. Oʻzbekiston Respublikasi Vazirlar Mahkamasining 2024-yil 16-apreldagi qaroriga asosan, 80 ta ehtiyojmand oila uchun elektr energiyasi va tabiiy gaz isteʼmolidagi qoʻshimcha xarajatlarni qoplash maqsadida roʻyxat shakllantirilib, “Inson” ijtimoiy xizmatlar markaziga taqdim etildi.

Ijtimoiy xodimning faoliyati faqatgina moddiy yordam bilan cheklanib qolmaydi. Tazyiq va zoʻravonlikdan jabrlangan 6 nafar ayolga mahalla faollari va markaz psixologlari yordamida ruhiy maslahatlar ham berib borilmoqda. Mahallada yashovchi Gulbaxor Matiyakubova, Yangiboy Sobirov va Sohida Koʻklanova kabi yana koʻplab birinchi guruh nogironlarining xonadonlariga ijtimoiy xodim tez-tez tashrif buyurib, ularning holidan xabar oladi. Bunday eʼtibor aholining davlatga boʻlgan ishonchini yanada mustahkamlashga, ijtimoiy himoyaning manzilli boʻlishini taʼminlashga xizmat qilmoqda.

Mahalla darajasida kompleks xizmatlar koʻrsatish orqali har bir ehtiyojmand fuqaroga individual  yondashuv qoʻllanilmoqda. Bu faqat moddiy yordam emas, balki insonlarning ijtimoiy integratsiyasini taʼminlash, ularning oʻz kuchiga boʻlgan ishonchini qaytarish va mustaqil hayot kechirishga tayyorlashni oʻz ichiga oladigan yaxlit tizimdir.

Xulosa qilib aytganda, “Inson” ijtimoiy xizmatlar markazi xodimlari mahalladagi har bir fuqaroning muammosiga eʼtibor qaratib, ularni hal etishga amaliy yordam bermoqdalar. Bu esa mamlakatimizda ijtimoiy himoya tizimi haqiqatdan ham yangi sifat bosqichiga koʻtarilganidan dalolat beradi.