МЕҲНАТ ЯРМАРКАСИ — АҲОЛИ БАНДЛИГИНИ ТАЪМИНЛАШДА ИЖОБИЙ ЕЧИМ

Жорий йилнинг 27 август куни Амударё тумани Камбағалликни қисқартириш ва бандликка кўмаклашиш бўлими томонидан туман ҳокимлиги ва туман Прокуратураси билан ҳамкорликда бўш иш ўринлари меҳнат ярмаркаси ҳамда олий таълим битирувчилари учун “Карьера куни” тадбири ўтказилди.

Ярмарка ишида Амударё тумани ҳокими ўринбосари, инвестиция ва ташқи савдо бўлими бошлиғи Ҳамза Ҳайтимбетов, Амударё тумани прокурори, адлия маслаҳатчиси Баҳрам Машарипов, туман прокурори ёрдамчиси Санжар Абдуллаев, Ўзбекистон Республикаси Бош прокуратураси ҳузуридаги Мажбурий ижро бюроси Амударё тумани бўлими бошлиғи, 2-даражали ҳуқуқшунос Медетбай Исметуллаев, Бердақ номидаги Қорақалпоқ давлат университети филология факультети декани Маҳсуд Қурбаниязов, Амударё тумани ИИБ ҳузуридаги Пробация бўлими бошлиғи Азамат Ортиқов, ИИБ хотин-қизлар билан ишлаш бўйича инспектори Инобат Ўразматова ҳамда Ажиниёз номидаги Нукус давлат педагогика институти вакиллари, Амударё туманидаги 1- ва 2-сонли политехникумлар ўқитувчилари ҳамда бошқа ҳамкор ташкилотлар ва тижорат банклари вакиллари қатнашдилар.

Шунингдек, меҳнат ярмаркасида 48 нафар ишсиз фуқаролар, пробация ҳисобида турган фуқаролар, алимент тўловчилар, ногиронлиги бўлган шахслар, мактаб, олий ўқув юртлари ва техникумлар битирувчи ёшлар учун тумандаги 50 та корхона ва ташкилотлар томонидан 190 та бўш иш ўринлари тақдим этилди.

ТАДБИРНИНГ АСОСИЙ МАҚСАДЛАРИ

Ярмаркани Амударё тумани Камбағалликни қисқартириш ва бандликка кўмаклашиш бўлими бошлиғи вазифасини вақтинча бажарувчи Раҳмонжон Шомуратов очди. У аҳоли бандлигини таъминлаш мақсадида бўлим мутахассислари томонидан олиб борилаётган ишлар, давлатимизнинг беқиёс ғамхўрлиги, яратилаётган имкониятлар, имтиёзли кредитлар, субсидиялар ҳамда ссудалар тўғрисида батафсил маълумот берди.

Тадбир давомида туман прокурори, адлия маслаҳатчиси Б. Машарипов ярмарка иштирокчиларига юртимизда амалга оширилаётган демократик ислоҳотлар мазмун-моҳиятига кўра, бутунлай янги босқичга кўтарилганлигини, ўтган даврда инсон қадрини улуғлаш, фуқароларнинг меҳнат қилиш ва тадбиркорлик фаолиятини амалга ошириши учун яратилаётган шароитлар, берилаётган имтиёзлар бугун юқори натижа бераётганини алоҳида эътироф этди. Айниқса, яқин вақтларгача аҳолининг эҳтиёжманд қатламига, айнан уларни иш билан таъминлаш масаласига етарлича эътибор берилмаганлиги тўғрисида сўз юритди. Аҳоли, айниқса, ёшлар ва хотин-қизларда замонавий касб ва тадбиркорлик кўникмаларини шакллантиришда ҳамда касбларга ўқитиш тизимида туб ўзгаришлар амалга оширилаётганини мамнуният билан таъкидлади. Жумладан, Камбағалликни қисқартириш ва бандлик вазирлиги тасарруфида кўплаб касб-ҳунарга ўқитиш марказлари, касб-ҳунарга ўқитиш маскани, “Ишга марҳамат” мономаркази фаолияти йўлга қўйилганлиги аҳоли учун қулайлик яратаётгани ҳақида кенг тўхталди.

Шундан сўнг ярмарка иштирокчиларига Камбағалликни қисқартириш ва бандликка кўмаклашиш бўлими ходимлари томонидан бўш иш ўринлари ва уларга аҳолини ишга жойлаштириш, ишсиз аҳолини касб-ҳунарга ўқитиш, ўз хоҳиш-истакларига кўра, хорижий давлатларга ишга жойлаштириш, уларнинг меҳнат ҳуқуқлари ва меҳнат муҳофазасини таъминлаш масалалари бўйича ҳуқуқий маслаҳат ва маълумотлар олишлари учун барча шароитлар, жумладан, видеороликлар, баннерлар, брошюралар, буклетлар ташкил қилинди.

ЯРМАРКА НАТИЖАЛАРИ

Ярмаркада 28 нафар фуқаро доимий ишга жойлаштирилди. Улардан 1 нафари меҳнат муҳожири, 17 нафари олий таълим битирувчилари, 1 нафар фуқаро жазони ижро этиш муассасасидан озод қилинган шахс, 9 нафари ишсиз фуқаролар бўлиб, барчасининг ишончли тарзда бандлиги таъминланди.

Бундан ташқари, 20 нафар фуқароларга меҳнат қонунчилигига оид ҳамда vacancy.argos.uz сайтларида эълон қилинган бўш иш ўринларига ўтказиладиган танловлар бўйича ҳуқуқий маслаҳат ва ёрдамлар берилди.

Ярмарка давомида бўлим ходимлари томонидан бўш иш ўринлари, уларга аҳолини ишга жойлаштириш бўйича 18 нафар фуқарога, ишсиз аҳолини касб-ҳунар ва тадбиркорликка ўқитиш бўйича 11 фуқарога, аҳолини хорижий давлатларда ишга жойлаштириш бўйича 12 фуқарога, аҳолининг меҳнат ҳуқуқлари ва меҳнат муҳофазасини таъминлаш бўйича 6 фуқарога ҳуқуқий маслаҳатлар, керакли маълумот ва тавсиялар тақдим этилди.

Аҳолининг ижтимоий фаоллигини ошириш, ўзлари учун маъқул бўлган касб-корларни эгаллаб, ўзи ва оиласининг доимий даромадга эга бўлишларини таъминлаш борасидаги интилишларини қўллаб-қувватлаш, пировардида уларнинг ҳаётдан рози яшашларига кўмаклашиш борасидаги бу каби хайрли ишлар Амударё туман Камбағалликни қисқартириш ва бандликка кўмаклашиш бўлими томонидан 2025 йил давомида тизимли равишда амалга оширилиши режалаштирилган.

Бундан ташқари, шу куни аҳолини қийнаб келаётган ҳуқуқий муаммоларга ечим топиш мақсадида Камбағалликни қисқартириш ва бандликка кўмаклашиш бўлими бошлиғи вазифасини вақтинча бажарувчи Раҳмонжон Шомуратов томонидан туман Камбағалликни қисқартириш ва бандликка кўмаклашиш бўлими биносида сайёр қабул ҳам ўтказилди.

Сайёр қабулда фуқароларнинг меҳнат низолари, бандлик, кредит, субсидия ва ссуда масалалари бўйича мурожаатлари қабул қилиниб, барча мурожаатларга ҳуқуқий ечим топиш чоралари кўрилди.

РАВШАН БАҲРОМОВ.