ТУМАН ПРОКУРОРИ Б. МАШАРИПОВ ҚОРАМОН МАҲАЛЛАСИДАГИ ИЖТИМОИЙ ҲИМОЯГА МУҲТОЖ АҲОЛИГА БАЙРАМОНА КАЙФИЯТ УЛАШДИ

Юртимизда ҳамиша ўзаро меҳр-оқибат, саховат, мурувват каби азалий қадриятларимиз, халқимизга хос эзгу фазилатлар улуғлаб келинган. Эҳтиёжманд кишилар, ногиронлиги бўлган шахсларни ҳамда оғир аҳволга тушиб қолган аҳолини ҳар томонлама қўллаб-қувватлаш, оила ва маҳаллаларда меҳр-оқибат муҳитини мустаҳкамлаш, ёши улуғ инсонларга ғамхўрлик кўрсатишга алоҳида эътибор қаратилган.

Бугунги кунда ҳам бу каби эзгу ишлар давом этмоқда ва аҳоли билан доимий мулоқот қилиш, уларни қийнаётган муаммоларни ҳал этишнинг янги механизм ва самарали усулларини жорий этиш олиб борилаётган ислоҳотларнинг устувор йўналишига айланди.

Сўнгги йилларда аҳолининг ижтимоий ҳимоясини кучайтириш, давлат томонидан фуқароларга ижтимоий хизмат ва ёрдамлар кўрсатиш кўлами ҳамда турларини кенгайтириш бўйича тизимли ишлар амалга оширилмоқда. Бугунги кунда аҳолига ижтимоий ёрдам кўрсатиш бўйича эзгу ҳаракатлар энг чекка ҳудудларгача етиб бораётганидан аёнки, “Ҳамма нарса инсон қадри учун!” тамойили асосида амалга оширилаётган барча эзгу ишлар ҳар бир инсоннинг ҳаётдан рози яшашини таъминлашга қаратилган.

Ўзбекистон Республикаси Мустақиллигининг 34 йиллиги муносабати билан Амударё туман прокурори Баҳром Машарипов Қорамон маҳалласидаги оғир ижтимоий вазиятга тушиб қолган, ногиронлиги бўлган фуқаролар истиқомат қилувчи хонадонларга, шунингдек, кам таъминланган, боқувчисини йўқотган оилаларга ташриф буюриб, уларнинг турмуш шароитлари билан яқиндан танишди. Ҳар бир хонадон ва оила ҳаётига доир муаммоларни ўрганиб, фуқароларнинг таклиф ва истакларини эшитди. Ўзгалар парваришига муҳтож, кам таъминланган ва ногиронлиги бўлган фуқароларга қувончли кайфият улашиб, уларнинг байрам дастурхонлари учун сархил озиқ-овқат маҳсулотларини берди.

Шунингдек, туман прокурори маҳаллада фаолият олиб борувчи комплекс ижтимоий хизмат кўрсатиш ходими томонидан амалга оширилаётган ишлар билан ҳам яқиндан танишди.

Амударё тумани марказидан 34 чақирим масофа узоқликдаги Қорамон маҳалласида аҳолининг ижтимоий ҳимояга муҳтож қатламига комплекс ижтимоий хизмат кўрсатиш йўналишида тизимли ишлар йўлга қўйилган. Айни пайтда маҳалла ҳудудидаги хонадонларда 4456 нафар аҳоли истиқомат қилади. Жорий йил бошида “Маҳалла еттилиги” аъзолари билан ҳамкорликда “Инсон” ижтимоий хизмат кўрсатиш маркази Амударё туман бўлимининг маҳалладаги комплекс хизмат кўрсатувчи ижтимоий ходими Севара Исмоилова томонидан уйма-уй кириб бориб ўтказилган хатлов натижаларига кўра, 139 та оила кам таъминланган, камбағал оилалар рўйхатига киритилди. Шунингдек, 144 нафар ўзгалар парваришига муҳтож, ногиронлиги бор бўлган фуқаролар рўйхати шакллантирилди.

Президентимиз ташаббуси билан маҳаллаларда комплекс хизмат кўрсатувчи ижтимоий ходим лавозими жорий этилиб, ижтимоий хизматлар маҳалла даражасигача туширилгани ўзгалар парваришига муҳтож, ногиронлиги бўлган фуқаролар ҳаёт тарзини ижобий ва яхши томонга ўзгартириш имконини яратди.

Ушбу тизим фаолиятини самарали йўлга қўйиш мақсадида Қорамон маҳалласидаги ижтимоий ҳимояга муҳтож аҳолининг тўлиқ базасини шакллантириш бўйича тизимли ишлар амалга оширилди. Унга кўра, аҳоли хонадонларида яшовчи 12 тоифадаги фуқаролар алоҳида рўйхатга олинди ва уларнинг турмуш тарзи индивидуал тарзда ўрганилиб, ижтимоий хизматлар кўрсатиш чоралари кўрилди. Чунки оддий инсонлар билан юзма-юз учрашиб, уларнинг турмушида учраётган чигал масалаларини ҳал этиб бериш, кўмак кўрсатиш, айниқса, инсонларнинг дард-у ташвишларига елкадош бўлиб, муаммоларига ечим қидириш – олий қадрият ҳисобланади.

Ушбу йўналишда жорий йилнинг бугунги кунигача ижтимоий ҳимояга муҳтож, ишсиз ва ногиронлиги бўлган шахсларнинг ота-оналарининг бандлигини таъминлаш мақсадида улардан 12 нафарига 80 ёшга тўлган кексаларга ҳамда 1-гуруҳ ногиронлиги бўлган шахсларга қараб туриш ҳақиқий ҳолатларини текшириш далолатномалари расмийлаштирилди. Шунингдек, 3 нафар ногиронлиги бўлган фуқароларга протез-ортопедия мосламалари етказиб берилди. Бу тарзда аҳолига кўрсатилаётган ижтимоий хизматлар ва ёрдамлар натижасида оғир аҳволдаги шахсларнинг ижтимоийлашувига эришилмоқда.

Туман прокурори Баҳром Машарипов шу куни маҳалладаги кам таъминланган, ижтимоий ҳимояга, ўзгалар парваришига муҳтож инсонларнинг оилаларида бўлиб, улар билан самимий, дилдан суҳбатлашди, Мустақиллигимизнинг 34 йиллиги байрами билан табриклаб, байрамона кайфият улашди.

РАВШАН БАҲРОМОВ.