Қангли овулида давлат-хусусий шериклик асосида янги тўйхона фойдаланишга топширилди
Ўзбекистон Республикасининг "Давлат-хусусий шериклик тўғрисида"ги қонуни асосида ижтимоий инфратузилмани яхшилаш ва янги иш ўринлари яратиш бўйича муҳим лойиҳалар амалга оширилмоқда. Ушбу қонуннинг ёрқин намунаси Амударё туманининг олис Қангли овулида ҳам амалий ифодасини топди. Кўп йиллардан бери фойдаланилмай келган ва таъмирга муҳтож бўлиб қолган "Садо" маданият маркази биноси давлат-хусусий шериклик асосида тўлиқ қайта таъмирланиб, замонавий тўйхонага айлантирилди. Лойиҳа тадбиркор Рашид Турсунбоев томонидан амалга оширилди.
Қайта реконструкция қилинган бинонинг тантанали очилиш маросими катта шодиёна билан ўтди. Унда туман ҳокими ўринбосари, инвестиция ва ташқи савдо бўлими бошлиғи Ҳамза Ҳайтимбетов, Ўзбекистон Маҳаллалар уюшмаси Амударё тумани бўлими бошлиғи Алишер Юлдашев, "Маҳалла еттилиги" аъзолари, нуронийлар, маҳалла имоми ва кенг жамоатчилик вакиллари иштирок этди.
Сўзга чиққанлар юртимизда кичик бизнес ва хусусий тадбиркорликни қўллаб-қувватлаш, аҳоли бандлигини таъминлаш ва янги иш ўринларини яратиш, шунингдек, олис ҳудудларда ҳам ижтимоий инфратузилма объектлари барпо қилишга катта эътибор қаратилаётганини алоҳида таъкидлаб ўтдилар.
Айтиш жоизки, ушбу лойиҳанинг умумий қиймати 2.5 миллиард сўмни ташкил этди. Тадбиркорнинг саъй-ҳаракатлари натижасида дастлабки режада кўзда тутилган 20 та янги иш ўрнидан ҳозирда 10 таси яратилди. Демак, Қангли овулидаги 10 та хонадон қўшимча даромад манбаига эга бўлди. Тадбиркор келажакда тўйхонани янада кенгайтириб, меҳмонлар учун қўшимча шароитлар ва қулайликлар яратишни режалаштирмоқда.
Маданият вазирлиги билан 2024 йил 13 ноябрда имзоланган келишувга кўра, лойиҳани ишга тушириш муддати 2 йил этиб белгиланган эди. Бироқ, тадбиркорнинг саъй-ҳаракатлари туфайли объект бир йилга яқин муддат ичида фойдаланишга топширилди. Бу эса тадбиркорлик субъектлари учун яратилган имкониятлар ва қулайликларнинг, берилган имкониятдан тадбиркорлар қай даражада унумли фойдаланишининг амалдаги намунаси бўлди.
Шу ўринда таъкидлаш керакки, давлат-хусусий шериклик лойиҳалари давлат бюджетига юкламани камайтиради. Хусусий инвесторлар лойиҳаларга ўз маблағларини киритади, бу эса давлат томонидан кўп йиллик бюджет ажратмаларини талаб қилмайди. Натижада, ижтимоий объектлар, яъни мактаблар, боғчалар, спорт мажмуалари, соғлиқни сақлаш ва маданият муассасалари қурилиши ва реконструкцияси тезлашади.
Қолаверса, хусусий сектор лойиҳаларни амалга оширишда давлатга қараганда кўпроқ самарадорлик ва мослашувчанликка эга. Тадбиркорлар ўз маблағларини киритгани сабабли, улар иш жараёнини оптималлаштириш, харажатларни камайтириш ва лойиҳаларни белгиланган муддатдан олдин якунлашдан манфаатдор бўлишади. Бу ўз навбатида, қурилиш ва хизмат кўрсатиш сифатининг ошишига ҳам олиб келади.
Давлат-хусусий шериклик асосида иш бошлаган янги тўйхона сабабли эндиликда Қангли овули аҳолиси тўй ва бошқа оилавий маросимларни ўтказиш учун узоқ йўл босиб, Қипчоқ шаҳарчаси ёки туман марказига боришга мажбур бўлмайди. Замонавий ва шинам тўйхонанинг ўз овулларида иш бошлаши уларга катта қулайлик яратди. Ушбу лойиҳа нафақат инфратузилма муаммосини ҳал қилди, балки ҳудудда тадбиркорликни ривожлантириш ва янги иш ўринларини яратиш орқали аҳоли фаровонлигини оширишда ҳам муҳим восита бўлди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
