24-СОНЛИ МАКТАБГАЧА ТАЪЛИМ ТАШКИЛОТИДА “ОЧИҚ ЭШИКЛАР КУНИ” ЎТКАЗИЛДИ
Амударё туман Мактабгача ва мактаб таълими бўлими тасарруфидаги 24-сонли Давлат мактабгача таълим ташкилотида таълим-тарбия жараёнлари юқори савияда олиб борилмоқда. Мазкур муассасада 235 нафар кичкинтой тарбияланмоқда, шундан 135 нафари асосий гуруҳларда, 75 нафари қисқа муддатли гуруҳларда ва 25 нафари мактабга тайёрлов гуруҳида.
Муассасага кўп йиллик тажрибага эга Мунаввар Тўраева раҳбарлик қилади. Мактабгача таълим ташкилотида фаолият юритаётган барча тарбиячи-педагоглар олий маълумотли мутахассислар бўлиб, улар таълим-тарбия жараёнларида инновацион педагогик усуллардан фойдаланадилар. Болажонларнинг қизиқишларини ҳисобга олган ҳолда инглиз, рус тиллари, мусиқа ва бадиий гимнастика тўгараклари ҳам ташкил этилган. Муассаса ҳудудидаги ободонлаштирилган боғ ва гулзорлар, экологик йўлакчалар болаларда табиатга бўлган меҳр-муҳаббатни оширишга хизмат қилади.
Ташкилот раҳбарининг ўринбосари Ойнур Оқманова тарбиячи-педагоглар билан деярли ҳар ҳафтада услубий машғулотлар ўтказиб, ходимларнинг малакасини ошириб боради. Бу борадаги янгиликлар ва инновацион ғоялар таълим-тарбия жараёнига татбиқ этилади.
11 сентябрь куни мазкур муассасада “Очиқ эшиклар куни” ўтказилди. Тадбир давомида мамлакатимизда мактабгача таълим тизимида амалга оширилаётган кенг қамровли ислоҳотлар хусусида маълумотлар берилди. Хусусан, сўнгги йилларда олиб борилаётган тизимли ишлар натижасида 6-7 ёшгача бўлган болаларни мактабгача таълим ташкилотларига қамраб олиш даражаси йилдан-йилга ошиб бормоқда. Келгусида бу кўрсаткични 100 фоизга етказиш режалаштирилган.
Бу ҳақда 9 сентябрь куни Президентимиз раҳбарлигида ўтказилган видеоселектор йиғилишида ҳам сўз юритилди. Унга кўра, бу йил мактабгача таълим тизимида ўринлар сонини 182 мингтага кўпайтириш режалаштирилган бўлиб, уларнинг 82 мингтаси янги ташкил этилган муассасалар, 100 минг ўрини эса мавжуд боғчаларни таъмирлаш ҳисобига амалга оширилади.
“Очиқ эшиклар куни”да тарбиячи-педагоглар томонидан ўтказилган машғулотлар ота-оналар томонидан юқори баҳоланди. Жумладан, тарбиячи-педагог Дилфуза Йўлдошеванинг “Болаларда математик қобилиятни ривожлантириш” мавзусидаги, Маржона Давлатбоеванинг “Элементар математика бўйича предметларни 4 ва 8 га бўлиш” мавзусидаги, Мунаввар Оллониёзованинг “Боланинг нутқий фаолиятини ўстириш” мавзусидаги, Зилола Турсунбоеванинг “Менинг шаҳрим, менинг маҳаллам” мавзусидаги ва Шарофат Ражабованинг “Маҳалла кўчалари ва уйлар” мавзусидаги дарс-машғулотларида ота-оналар кузатувчи сифатида иштирок этдилар.
Шунингдек, Гулистон Ешчанова раҳбарлигидаги рус тили, Сарвиноз Соғиндикова раҳбарлигидаги инглиз тили, Сабоҳат Каримбоева раҳбарлигидаги бадиий гимнастика, Элдор Холмирзаев раҳбарлик қилаётган ашула ва мусиқа тўгаракларидаги машғулотлар ҳам юқори савияда ўтди. Болажонлар томонидан намойиш этилган шеърлар, ашулалар ва рақслар ота-оналарнинг олқишларига сазовор бўлди.
Тадбир якунида ота-оналар муассаса раҳбарияти ва тарбиячи-педагогларга фарзандларига берилаётган меҳр ва сифатли таълим-тарбия учун чин дилдан миннатдорлик билдирдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
