24-SONLI MAKTABGAChA TAʼLIM TAShKILOTIDA “OChIQ EShIKLAR KUNI” OʻTKAZILDI

Amudaryo tuman Maktabgacha va maktab taʼlimi boʻlimi tasarrufidagi 24-sonli Davlat maktabgacha taʼlim tashkilotida taʼlim-tarbiya jarayonlari yuqori saviyada olib borilmoqda. Mazkur muassasada 235 nafar kichkintoy tarbiyalanmoqda, shundan 135 nafari asosiy guruhlarda, 75 nafari qisqa muddatli guruhlarda va 25 nafari maktabga tayyorlov guruhida.

Muassasaga koʻp yillik tajribaga ega Munavvar Toʻrayeva rahbarlik qiladi. Maktabgacha taʼlim tashkilotida faoliyat yuritayotgan barcha tarbiyachi-pedagoglar oliy maʼlumotli mutaxassislar boʻlib, ular taʼlim-tarbiya jarayonlarida innovatsion pedagogik usullardan foydalanadilar. Bolajonlarning qiziqishlarini hisobga olgan holda ingliz, rus tillari, musiqa va badiiy gimnastika toʻgaraklari ham tashkil etilgan. Muassasa hududidagi obodonlashtirilgan bogʻ va gulzorlar, ekologik yoʻlakchalar bolalarda tabiatga boʻlgan mehr-muhabbatni oshirishga xizmat qiladi.

Tashkilot rahbarining oʻrinbosari Oynur Oqmanova tarbiyachi-pedagoglar bilan deyarli har haftada uslubiy mashgʻulotlar oʻtkazib, xodimlarning malakasini oshirib boradi. Bu boradagi yangiliklar va innovatsion gʻoyalar taʼlim-tarbiya jarayoniga tatbiq etiladi.

11-sentyabr kuni mazkur muassasada “Ochiq eshiklar kuni” oʻtkazildi. Tadbir davomida mamlakatimizda maktabgacha taʼlim tizimida amalga oshirilayotgan keng qamrovli islohotlar xususida maʼlumotlar berildi. Xususan, soʻnggi yillarda olib borilayotgan tizimli ishlar natijasida 6-7 yoshgacha boʻlgan bolalarni maktabgacha taʼlim tashkilotlariga qamrab olish darajasi yildan-yilga oshib bormoqda. Kelgusida bu koʻrsatkichni 100 foizga yetkazish rejalashtirilgan.

Bu haqda 9-sentyabr kuni Prezidentimiz rahbarligida oʻtkazilgan videoselektor yigʻilishida ham soʻz yuritildi. Unga koʻra, bu yil maktabgacha taʼlim tizimida oʻrinlar sonini 182 mingtaga koʻpaytirish rejalashtirilgan boʻlib, ularning 82 mingtasi yangi tashkil etilgan muassasalar, 100 ming oʻrini esa mavjud bogʻchalarni taʼmirlash hisobiga amalga oshiriladi.

“Ochiq eshiklar kuni”da tarbiyachi-pedagoglar tomonidan oʻtkazilgan mashgʻulotlar ota-onalar tomonidan yuqori baholandi. Jumladan, tarbiyachi-pedagog Dilfuza Yoʻldoshevaning “Bolalarda matematik qobiliyatni rivojlantirish” mavzusidagi, Marjona Davlatboyevaning “Elementar matematika boʻyicha predmetlarni 4 va 8 ga boʻlish” mavzusidagi, Munavvar Olloniyozovaning “Bolaning nutqiy faoliyatini oʻstirish” mavzusidagi, Zilola Tursunboyevaning “Mening shahrim, mening mahallam” mavzusidagi va Sharofat Rajabovaning “Mahalla koʻchalari va uylar” mavzusidagi dars-mashgʻulotlarida ota-onalar kuzatuvchi sifatida ishtirok etdilar.

Shuningdek, Guliston Yeshchanova rahbarligidagi rus tili, Sarvinoz Sogʻindikova rahbarligidagi ingliz tili, Sabohat Karimboyeva rahbarligidagi badiiy gimnastika, Eldor Xolmirzayev rahbarlik qilayotgan ashula va musiqa toʻgaraklaridagi mashgʻulotlar ham yuqori saviyada oʻtdi. Bolajonlar tomonidan namoyish etilgan sheʼrlar, ashulalar va raqslar ota-onalarning olqishlariga sazovor boʻldi.

Tadbir yakunida ota-onalar muassasa rahbariyati va tarbiyachi-pedagoglarga farzandlariga berilayotgan mehr va sifatli taʼlim-tarbiya uchun chin dildan minnatdorlik bildirdilar.

Robiya YOʻLDOShEVA.