Самарали ҳосил – илғор технологиялар билан бирга

Жорий йилнинг 14 сентябрь куни Амударё туманида пахтачиликда замонавий техника ва технологиялардан самарали фойдаланиш, уларнинг ҳодилдорлик ва иш унумдорлигидаги аҳамиятига бағишланган кўргазмали амалий семинар бўлиб ўтди. Янги авлод пахта териш машиналарини бошқариш бўйича ўтказилган амалий кўргазмали семинар нафақат техника янгиликларини намойиш қилди, балки ҳудуд пахтачилигини самарадорлик ва сифат жиҳатидан янги босқичга олиб чиқишда муҳим тажриба майдони бўлиб хизмат қилди.

Тадбирда Қорақалпоғистон Республикаси Вазирлар Кенгаши Раиси Фарҳод Эрманов, республикадаги барча туманлар ҳокимлари, қишлоқ хўжалигининг барча тармоқлари масъул раҳбарлари, фермерлар ҳамда пахта териш машиналари операторлари ва механизаторлар иштирок этди.

Семинар дастлаб Тўлқин овули ҳудудидаги “Хидиров Самад” фермер хўжалиги пахта майдонида ўтказилди. Барча семинар иштирокчилари янги пахта териш мавсумини беталафот, уюшқоқлик билан ўтказиш, ҳосилни нест-нобуд қилмасдан йиғиб териб олиш ҳамда юқори хирмон яратишни тилаб дуога қўл очдилар.

Бу ерда Туркия Республикасининг “Cansa tarim makinalari” компанияси томонидан ишлаб чиқарилган 2 та пахта териш машиналари иш жараёнида синовдан ўтказилди. Машинанинг майдондаги ҳаракати, толани ажратиш ва тозалаш босқичлари, ишлаб чиқариш суръати ва бошқарув элементлари операторларга амалий мисоллар билан намойиш этилди. Иштирокчилар машинанинг қулай бошқарув панели, кам ёқилғи сарфи ва меҳнатни енгиллаштиришдаги афзалликларини кузатиб, аграр технологиялар қандай қилиб ҳосилдорликни оширишга хизмат қилиши ҳақида ўз фикрларини билдирди.

Мулоқотлар давомида операторлар ўзларининг амалий тажрибаларини баҳам кўрди, фермерлар эса техниканинг реал шароитдаги ишлашини эътибор билан кузатиб, келгусида қандай усуллар орқали самарадорликни ошириш мумкинлиги ҳақида маълумотларга эга бўлдилар.

Семинар иштирокчиларининг кейинги манзили Чойкўл овули ҳудудидаги “Чойкўл Дўстлик” фермер хўжалигининг пахта экин майдони бўлди. Бу ерда Хитойнинг “Fm Word” компанияси томонидан ишлаб чиқарилган пахта териш машинаси таништирилди. Майдон бўйлаб ҳаракатланаётган техника қолдиқ толаларни самарали ажратиши, майдондаги қўшимча ишларни тез амалга ошириши ва операторлар учун қулай эканлиги билан эътирофга сазовор бўлди. Ҳар икки майдондаги техникалар намойиши шуни кўрсатдики, замонавий машиналар пахта йиғим-теримини нафақат тезлаштиради, балки сифатни сақлаган ҳолда маҳсулотни минимал йўқотиш билан териб олишда ҳам муҳим рол ўйнайди.

Семинар мобайнида Қорақалпоғистон Республикаси Вазирлар Кенгаши Раиси Фарҳод Эрманов бошчилигида пахта машина ишлаб чиқарувчи компанияларнинг Ўзбекистондаги вакиллари, туманлар ҳокимлари ва фермерлар иштирокида мажлис бўлиб ўтди. Мажлис давомида пахта йиғим-терим мавсумини уюшқоқлик билан ўтказиш, техникалардан самарали фойдаланиш ва уларга хизмат кўрсатиш тизимини йўлга қўйиш орқали узлуксиз ишлашини таъминлаш бўйича аниқ вазифалар белгиланди. Шунингдек, йиғилиш қатнашчилари ишлаб чиқарувчиларга техник хизмат, эҳтиёт қисмлар етказиб бериш ва операторларни ўқитиш бўйича ўзларини қизиқтирган саволларни берди ва батафсил жавоблар олди.

Амударё туманидаги ушбу амалий кўргазма — пахтачиликда технологик янгиланишнинг амалий намойиши, билим, тажриба алмашиш ва келажакни режалаштириш учун муҳим восита бўлди. Энди асосий вазифа — олинган билимларни амалиётга тезда татбиқ этиш, техника ва инсон ресурсларини мувофиқлаштириш ҳамда мавсумни самарали ўтказишдир.

Чарос Арсонова, туман ҳокимлигининг Ахборот хизмати раҳбари.