Samarali hosil – ilgʻor texnologiyalar bilan birga

Joriy yilning 14-sentyabr kuni Amudaryo tumanida paxtachilikda zamonaviy texnika va texnologiyalardan samarali foydalanish, ularning hodildorlik va ish unumdorligidagi ahamiyatiga bagʻishlangan koʻrgazmali amaliy seminar boʻlib oʻtdi. Yangi avlod paxta terish mashinalarini boshqarish boʻyicha oʻtkazilgan amaliy koʻrgazmali seminar nafaqat texnika yangiliklarini namoyish qildi, balki hudud paxtachiligini samaradorlik va sifat jihatidan yangi bosqichga olib chiqishda muhim tajriba maydoni boʻlib xizmat qildi.

Tadbirda Qoraqalpogʻiston Respublikasi Vazirlar Kengashi Raisi Farhod Ermanov, respublikadagi barcha tumanlar hokimlari, qishloq xoʻjaligining barcha tarmoqlari masʼul rahbarlari, fermerlar hamda paxta terish mashinalari operatorlari va mexanizatorlar ishtirok etdi.

Seminar dastlab Toʻlqin ovuli hududidagi “Xidirov Samad” fermer xoʻjaligi paxta maydonida oʻtkazildi. Barcha seminar ishtirokchilari yangi paxta terish mavsumini betalafot, uyushqoqlik bilan oʻtkazish, hosilni nest-nobud qilmasdan yigʻib terib olish hamda yuqori xirmon yaratishni tilab duoga qoʻl ochdilar.

Bu yerda Turkiya Respublikasining “Cansa tarim makinalari” kompaniyasi tomonidan ishlab chiqarilgan 2 ta paxta terish mashinalari ish jarayonida sinovdan oʻtkazildi. Mashinaning maydondagi harakati, tolani ajratish va tozalash bosqichlari, ishlab chiqarish surʼati va boshqaruv elementlari operatorlarga amaliy misollar bilan namoyish etildi. Ishtirokchilar mashinaning qulay boshqaruv paneli, kam yoqilgʻi sarfi va mehnatni yengillashtirishdagi afzalliklarini kuzatib, agrar texnologiyalar qanday qilib hosildorlikni oshirishga xizmat qilishi haqida oʻz fikrlarini bildirdi.

Muloqotlar davomida operatorlar oʻzlarining amaliy tajribalarini baham koʻrdi, fermerlar esa texnikaning real sharoitdagi ishlashini eʼtibor bilan kuzatib, kelgusida qanday usullar orqali samaradorlikni oshirish mumkinligi haqida maʼlumotlarga ega boʻldilar.

Seminar ishtirokchilarining keyingi manzili Choykoʻl ovuli hududidagi “Choykoʻl Doʻstlik” fermer xoʻjaligining paxta ekin maydoni boʻldi. Bu yerda Xitoyning “Fm Word” kompaniyasi tomonidan ishlab chiqarilgan paxta terish mashinasi tanishtirildi. Maydon boʻylab harakatlanayotgan texnika qoldiq tolalarni samarali ajratishi, maydondagi qoʻshimcha ishlarni tez amalga oshirishi va operatorlar uchun qulay ekanligi bilan eʼtirofga sazovor boʻldi. Har ikki maydondagi texnikalar namoyishi shuni koʻrsatdiki, zamonaviy mashinalar paxta yigʻim-terimini nafaqat tezlashtiradi, balki sifatni saqlagan holda mahsulotni minimal yoʻqotish bilan terib olishda ham muhim rol oʻynaydi.

Seminar mobaynida Qoraqalpogʻiston Respublikasi Vazirlar Kengashi Raisi Farhod Ermanov boshchiligida paxta mashina ishlab chiqaruvchi kompaniyalarning Oʻzbekistondagi vakillari, tumanlar hokimlari va fermerlar ishtirokida majlis boʻlib oʻtdi. Majlis davomida paxta yigʻim-terim mavsumini uyushqoqlik bilan oʻtkazish, texnikalardan samarali foydalanish va ularga xizmat koʻrsatish tizimini yoʻlga qoʻyish orqali uzluksiz ishlashini taʼminlash boʻyicha aniq vazifalar belgilandi. Shuningdek, yigʻilish qatnashchilari ishlab chiqaruvchilarga texnik xizmat, ehtiyot qismlar yetkazib berish va operatorlarni oʻqitish boʻyicha oʻzlarini qiziqtirgan savollarni berdi va batafsil javoblar oldi.

Amudaryo tumanidagi ushbu amaliy koʻrgazma — paxtachilikda texnologik yangilanishning amaliy namoyishi, bilim, tajriba almashish va kelajakni rejalashtirish uchun muhim vosita boʻldi. Endi asosiy vazifa — olingan bilimlarni amaliyotga tezda tatbiq etish, texnika va inson resurslarini muvofiqlashtirish hamda mavsumni samarali oʻtkazishdir.

Charos Arsonova, tuman hokimligining Axborot xizmati rahbari.