"Ижтимоий ҳимояга муҳтож аҳоли қатламларига ҳуқуқий кўмак" акцияси ўтказилди
Ўзбекистонда ижтимоий давлат тамойилларини амалга ошириш, аҳолининг ижтимоий ҳимояга муҳтож қатламига ҳар томонлама ёрдам кўрсатиш борасида кенг кўламли ишлар амалга оширилмоқда. Бугунги кунда давлат сиёсатининг устувор йўналишларидан бири аҳолининг эҳтиёжманд қатламларини қўллаб-қувватлаш, уларнинг турмуш шароитини яхшилаш ва жамиятда адолат тамойилларини мустаҳкамлашга қаратилган. Бу борада нафақат моддий ёрдам, балки ҳуқуқий кўмак ҳам муҳим аҳамият касб этади. Чунки кўпинча бундай фуқаролар ўз ҳуқуқларини билмаслиги ёки уларни ҳимоя қилиш учун етарли имкониятларга эга бўлмаслиги сабабли турли муаммоларга дуч келишади. Ҳуқуқий кўмак эса уларга ўз муаммоларини қонуний йўл билан ҳал этишда ва давлат томонидан берилган имтиёзлардан самарали фойдаланишда катта ёрдам беради.
Адлия вазирининг 2025 йил 8 сентябрдаги “Ижтимоий ҳимояга муҳтож аҳоли қатламларига ҳуқуқий кўмак” акциясини ўтказиш тўғрисида”ги буйруғи ижросини таъминлаш мақсадида Амударё туманининг Гулзор маҳалла фуқаролар йиғини биносида ҳамкор ташкилотлар, жумладан туман Прокуратураси, Адлия бўлими, Юридик хизмат кўрсатиш маркази ва “Инсон” ижтимоий хизматлар маркази туман бўлими томонидан кенг қамровли ҳуқуқий акция ўтказилди.
Тадбирда ижтимоий ҳимояга муҳтож аҳоли вакиллари иштирок этиб, уларга қонунчилик ҳужжатларида белгиланган инсон ҳуқуқлари кафолатлари ва имтиёзлар юзасидан ҳуқуқий тушунтириш берилди. Уларнинг ҳуқуқий саводхонлигини ошириш мақсадида 100 дан ортиқ ҳуқуқий тарғибот материаллари тарқатилди.
Акция давомида фуқаролардан тушган мурожаатларнинг деярли барчаси жойида ҳал этилди. Жумладан, аксарият фуқароларга қонунчилик ҳужжатларида белгиланган ҳуқуқлар, кафолатлар ва имтиёзлар юзасидан ҳуқуқий тушунтириш берилди. Бир нафар фуқаронинг мурожаатига асосан унинг хонадони туман Санитария-эпидемиологик осойишталик ва жамоат саломатлиги бўлими ходимлари томонидан дезинфекция қилиб берилди.
Тадбир доирасида 30 нафар фуқаролар бепул тиббий кўрикдан ўтказилди. 20 нафар фуқароларга бепул дори-дармонлар тарқатилди. 3 нафар фуқаролар ультратовуш диагностикаси текширувидан, 2 нафар фуқаро эса электрокардиограмма кўригидан ўтказилиб, лаборатория текширувидан ўтказилган 5 нафар фуқароларга тегишли тартибда шифохоналарга йўлланмалар берилди. Бундай амалий ёрдамлар аҳолининг саломатлигини мустаҳкамлашга ва уларнинг ижтимоий ҳимоясини таъминлашга қаратилган муҳим қадамдир.
Хулоса қилиб айтганда, Амударё туманида ўтказилган “Ижтимоий ҳимояга муҳтож аҳоли қатламларига ҳуқуқий кўмак” акцияси давлатнинг аҳолига ғамхўрлигининг яна бир ёрқин намунаси бўлди. Бу каби тадбирлар фуқароларнинг ҳуқуқий онги ва маданиятини оширишга, уларнинг муаммоларини жойида ҳал этишга ва ижтимоий адолатни қарор топтиришга хизмат қилади.
Ҳамкор ташкилотларнинг биргаликдаги саъй-ҳаракатлари туфайли кўплаб эҳтиёжманд фуқаролар ўз ҳуқуқларини ҳимоя қилиш ва ҳаётий муаммоларини ҳал этишда амалий ёрдам олдилар. Бу эса жамиятда ўзаро ишонч ва ҳамжиҳатликни мустаҳкамлашга хизмат қилади. Бундай тадбирларни мунтазам равишда ташкил қилиш аҳолининг ҳуқуқий онгини оширишда ва уларни ўз ҳуқуқларидан хабардор қилишда муҳим аҳамият касб этиши шубҳасиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
