ИНШОЛАР ТАНЛОВЛАРИНИНГ ҒОЛИБЛАРИ ТАҚДИРЛАНДИ

Мамлакатимизда коррупцияга қарши кураш умуммиллий ҳаракатга айланган. Чунки коррупция давлат ва жамият тараққиётига таҳдид, барча соҳаларда амалга оширилаётган ислоҳотлар йўлидаги жиддий тўсиқдир. Шу боис, жамиятимизни ижобий томонга ўзгартириш, ҳаётимизни янада фаровон қилишдек эзгу ниятларимизни амалга оширишга киришар эканмиз, биринчи галда фуқаролар, айниқса, ўсиб келаётган ёш авлод онгида коррупцияга нисбатан муросасизлик туйғусини уйғотиш муҳим аҳамиятга эга.

Бу борадаги ишларга оммавий ахборот воситалари таҳририятлари ҳам фаол равишда ҳисса қўшиб келмоқда. Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Тараққиёт кўзгуси” газетаси таҳририятининг “Биз коррупцияга қаршимиз!” номли ва Амударё телевидениеси таҳририятининг “Коррупция — давлат ва жамият тараққиётига таҳдид” номли грант лойиҳалари ҳам ана шу иллатнинг олдини олиш борасидаги тизимли ишларга ҳисса қўшишга қаратилгандир.

Грант лойиҳалари иш режасига асосан Амударё тумани Мактабгача ва мактаб таълими бўлими билан ҳамкорликда ўқувчи-ёшларда коррупцияга нисбатан муросасизлик туйғусини шакллантириш мақсадида иншолар танлови эълон қилинган эди.

Амударё телевидениеси таҳририятининг грант лойиҳаси доирасида “Келажакда халқимга ҳалол хизмат қиламан” мавзусидаги ва “Тараққиёт кўзгуси” газетаси таҳририятининг грант лойиҳаси доирасида “Коррупциясиз жамият қурамиз!” мавзусидаги иншолар танловлари туман Мактабгача ва мактаб таълими бўлими билан ҳамкорликда юқори савияда ўтказилди.

Мазкур танловларда умумтаълим мактабларининг 100 нафардан ортиқ ўқувчилари фаол иштирок этдилар. Танловларни ўтказишдан кўзланган мақсад — ўсиб келаётган ёш авлод онгида коррупцияга қарши муросасизлик кайфиятини уйғотиш орқали коррупциядан холи, ҳалоллик, адолат ва барқарор тараққиёт тамойилларига асосланган жамият барпо этишга ҳисса қўшишдир.

Таҳририятларга келиб тушган иншолар ҳакамлар ҳайъати томонидан ўрганилиб, баҳоланди. Танлов якунларига кўра жами 12 нафар энг сара иншолар муаллифлари Амударё телевидениеси таҳририятига таклиф қилинди.

Тақдирлаш маросимида лойиҳа координаторлари танлов ғолиблари билан дилдан, самимий суҳбатлашиб, ўқувчи-ёшларнинг коррупцияга қарши кураш борасидаги фикрлари, келажакдаги орзулари билан яқиндан танишдилар.

Ҳакамлар ҳайъатининг хулосаларига кўра Амударё телевидениеси таҳририяти томонидан эълон қилинган “Келажакда халқимга ҳалол хизмат қиламан” мавзусидаги иншолар танловида биринчи ўрин 50-сонли мактабнинг 10-синф ўқувчиси Хосият Ражабовага насиб этди. 3-сонли мактабнинг 10-синф ўқувчиси Жазира Базарбаева ҳамда 50-сонли мактабнинг 6-синф ўқувчиси Шаҳло Бахтиёровалар ёзган иншолар 2-ўринга лойиқ кўрилди. 1-сонли мактабнинг 6-синф ўқувчилари Суҳроб Каримбоев ва Зилола Ҳайитбоевалар ҳамда 50-сонли мактабнинг 10-синф ўқувчиси Севинчой Пўлатовалар эса танловда 3-ўринни эгалладилар.

“Тараққиёт кўзгуси” газетаси таҳририяти томонидан ўтказилган “Коррупциясиз жамият қурамиз!” мавзусидаги иншолар танловида эса 1-ўрин 14-сонли мактабнинг 7-синф ўқувчиси Чарос Турсунбоевага насиб қилди. 40-сонли мактабнинг 10-синф ўқувчиси Камола Йўлдошева ҳамда 3-сонли мактабнинг 10-синф ўқувчиси Айсулув Муратбаевалар ёзган иншолар 2-ўринга муносиб кўрилди. 3-ўрин эса 50-сонли мактабнинг 9-синф ўқувчиси Айнура Базарбаева, 1-сонли мактаб ўқувчиси Гулруҳ Иброҳимова ҳамда 14-сонли мактабнинг 9-синф ўқувчиси Жайна Ўразмухамбетоваларга насиб этди.

Тадбир давомида танлов ғолибларига фахрий ёрлиқлар, совғалар топширилди.

РОБИЯ ЙЎЛДОШЕВА.