INShOLAR TANLOVLARINING GʻOLIBLARI TAQDIRLANDI

Mamlakatimizda korruptsiyaga qarshi kurash umummilliy harakatga aylangan. Chunki korruptsiya davlat va jamiyat taraqqiyotiga tahdid, barcha sohalarda amalga oshirilayotgan islohotlar yoʻlidagi jiddiy toʻsiqdir. Shu bois, jamiyatimizni ijobiy tomonga oʻzgartirish, hayotimizni yanada farovon qilishdek ezgu niyatlarimizni amalga oshirishga kirishar ekanmiz, birinchi galda fuqarolar, ayniqsa, oʻsib kelayotgan yosh avlod ongida korruptsiyaga nisbatan murosasizlik tuygʻusini uygʻotish muhim ahamiyatga ega.

Bu boradagi ishlarga ommaviy axborot vositalari tahririyatlari ham faol ravishda hissa qoʻshib kelmoqda. Oliy Majlis huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Taraqqiyot koʻzgusi” gazetasi tahririyatining “Biz korruptsiyaga qarshimiz!” nomli va Amudaryo televideniyesi tahririyatining “Korruptsiya — davlat va jamiyat taraqqiyotiga tahdid” nomli grant loyihalari ham ana shu illatning oldini olish borasidagi tizimli ishlarga hissa qoʻshishga qaratilgandir.

Grant loyihalari ish rejasiga asosan Amudaryo tumani Maktabgacha va maktab taʼlimi boʻlimi bilan hamkorlikda oʻquvchi-yoshlarda korruptsiyaga nisbatan murosasizlik tuygʻusini shakllantirish maqsadida insholar tanlovi eʼlon qilingan edi.

Amudaryo televideniyesi tahririyatining grant loyihasi doirasida “Kelajakda xalqimga halol xizmat qilaman” mavzusidagi va “Taraqqiyot koʻzgusi” gazetasi tahririyatining grant loyihasi doirasida “Korruptsiyasiz jamiyat quramiz!” mavzusidagi insholar tanlovlari tuman Maktabgacha va maktab taʼlimi boʻlimi bilan hamkorlikda yuqori saviyada oʻtkazildi.

Mazkur tanlovlarda umumtaʼlim maktablarining 100 nafardan ortiq oʻquvchilari faol ishtirok etdilar. Tanlovlarni oʻtkazishdan koʻzlangan maqsad — oʻsib kelayotgan yosh avlod ongida korruptsiyaga qarshi murosasizlik kayfiyatini uygʻotish orqali korruptsiyadan xoli, halollik, adolat va barqaror taraqqiyot tamoyillariga asoslangan jamiyat barpo etishga hissa qoʻshishdir.

Tahririyatlarga kelib tushgan insholar hakamlar hayʼati tomonidan oʻrganilib, baholandi. Tanlov yakunlariga koʻra jami 12 nafar eng sara insholar mualliflari Amudaryo televideniyesi tahririyatiga taklif qilindi.

Taqdirlash marosimida loyiha koordinatorlari tanlov gʻoliblari bilan dildan, samimiy suhbatlashib, oʻquvchi-yoshlarning korruptsiyaga qarshi kurash borasidagi fikrlari, kelajakdagi orzulari bilan yaqindan tanishdilar.

Hakamlar hayʼatining xulosalariga koʻra Amudaryo televideniyesi tahririyati tomonidan eʼlon qilingan “Kelajakda xalqimga halol xizmat qilaman” mavzusidagi insholar tanlovida birinchi oʻrin 50-sonli maktabning 10-sinf oʻquvchisi Xosiyat Rajabovaga nasib etdi. 3-sonli maktabning 10-sinf oʻquvchisi Jazira Bazarbayeva hamda 50-sonli maktabning 6-sinf oʻquvchisi Shahlo Baxtiyorovalar yozgan insholar 2-oʻringa loyiq koʻrildi. 1-sonli maktabning 6-sinf oʻquvchilari Suhrob Karimboyev va Zilola Hayitboyevalar hamda 50-sonli maktabning 10-sinf oʻquvchisi Sevinchoy Poʻlatovalar esa tanlovda 3-oʻrinni egalladilar.

“Taraqqiyot koʻzgusi” gazetasi tahririyati tomonidan oʻtkazilgan “Korruptsiyasiz jamiyat quramiz!” mavzusidagi insholar tanlovida esa 1-oʻrin 14-sonli maktabning 7-sinf oʻquvchisi Charos Tursunboyevaga nasib qildi. 40-sonli maktabning 10-sinf oʻquvchisi Kamola Yoʻldosheva hamda 3-sonli maktabning 10-sinf oʻquvchisi Aysuluv Muratbayevalar yozgan insholar 2-oʻringa munosib koʻrildi. 3-oʻrin esa 50-sonli maktabning 9-sinf oʻquvchisi Aynura Bazarbayeva, 1-sonli maktab oʻquvchisi Gulruh Ibrohimova hamda 14-sonli maktabning 9-sinf oʻquvchisi Jayna Oʻrazmuxambetovalarga nasib etdi.

Tadbir davomida tanlov gʻoliblariga faxriy yorliqlar, sovgʻalar topshirildi.

ROBIYa YOʻLDOShEVA.