ЖИНОЯТ ИШЛАРИ БЎЙИЧА АМУДАРЁ ТУМАН СУДИ ТОМОНИДАН КОРРУПЦИЯГА ҚАРШИ ЙИҒИЛИШ ВА САЙЁР СУД ТАШКИЛ ЭТИЛДИ

Барча соҳаларда бўлгани каби суд тизимида ҳам коррупциявий ҳолатларни ўз вақтида аниқлаш, олдини олиш, уларга чек қўйиш, бу иллатнинг оқибатларини, шунингдек, коррупцияга имкон берувчи сабаб ва шароитларни бартараф этиш энг муҳим ва долзарб вазифа ҳисобланади.

Айниқса, бу жараёнда фаол аҳоли вакилларининг иштирокини таъминлаш, уларнинг ҳуқуқий саводхонлигини ошириш, жамиятда коррупцияга нисбатан муросасизлик кайфиятини уйғотиш коррупциянинг олдини олишга қаратилган вақт ва натижадорлик нуқтаи назаридан анча самарали ҳисобланади. Шу боис аҳоли билан юзма-юз, ошкора ва очиқ мулоқот тарзидаги учрашувлар, сайёр суд мажлислари муҳим аҳамиятга эга. Бу борада Жиноят ишлари бўйича Амударё туман суди томонидан амалга оширилаётган сайёр суд мажлислари, кенг аҳоли қатлами иштирокидаги ҳуқуқий саводхонлик бўйича давра суҳбатлари ўзининг ижобий самарасини бермоқда.

Жорий йилнинг 6 октябрь куни туман Ички ишлар бўлими биносининг мажлислар залида Жиноят ишлари бўйича Амударё туман судининг тергов судьяси Донахон Юсупова раислигида бўлиб ўтган йиғилишда ҳам коррупцияга қарши курашишда бу иллатни келтириб чиқарувчи омилларни бартараф қилиш, коррупциявий ҳолатларнинг олдини олиш ва уларга чек қўйиш, бу борада фуқаролар онгида коррупцияга нисбатан муросасизлик туйғусини шакллантиришга қаратилган масалалар атрофлича муҳокама қилинди.

Йиғилишда Жиноят ишлари бўйича Амударё туман судининг тергов судьяси вазифасини вақтинча бажарувчи Ансатбай Қаражанов, Дўстлик маҳалласи ҳудудида истиқомат қилувчи аҳоли вакиллари, шунингдек, маъмурий ҳуқуқбузарлик содир этган шахслар иштирок этдилар.

Тергов судьяси вазифасини вақтинча бажарувчи Ансатбай Қаражанов Ўзбекистон Республикаси Президентининг “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Фармони ижросини таъминлаш бўйича судлар томонидан амалга оширилаётган тарғибот-ташвиқот ишлари хусусида батафсил сўз юритди.

Шунингдек, коррупция давлат ва жамият тараққиёти учун энг жиддий хавф-хатарлардан бири эканлигини, бу иллатга қарши курашишда аҳоли ва давлат хизматчилари ҳамжиҳатлик ва якдиллик билан ҳаракат қилиши зарурлигини таъкидлаб, “Коррупцияга қарши курашиш тўғрисида”ги Қонуннинг мазмун-моҳияти тўғрисида кенг тушунчалар берди.

Сайёр суд мажлисида Амударё тумани Ички ишлар бўлими томонидан тақдим қилинган жами 18 та маъмурий иш очиқлик ва шаффофлик тамойиллари асосида, аҳоли вакиллари иштирокида кўриб чиқилди. Унга кўра, Ўзбекистон Республикаси Маъмурий жавобгарлик тўғрисидаги кодексининг тегишли моддаларида кўрсатилган маъмурий ҳуқуқбузарлик ҳолатларини содир этган шахсларга нисбатан тўпланган маъмурий иш материаллари атрофлича муҳокама этилди ҳамда ҳуқуқбузар шахсларга нисбатан қонунда назарда тутилган жазолар тайинланиб, адолатли қарорлар қабул қилинди.

Сайёр суд мажлиси ҳамда суд муҳокамасининг бу каби ошкоралик принципи асосида ўтказилиши аҳолининг одил судлов тўғрисидаги ахборотга бўлган эҳтиёжини қондиришга қаратилган муҳим қадам ҳамда ислоҳотларнинг амалдаги натижасидир.

РОБИЯ ЙЎЛДОШЕВА.