Янгиобод маҳалласида сайёр суд ўтказилди

Суд тизимининг очиқлик ва ошкоралик принципи аҳолининг одил судлов тўғрисидаги ахборотга бўлган эҳтиёжини қондиришга, шу билан бирга суд жараёнларига нисбатан ишончини мустаҳкамлашга қаратилган. Бу борада судлар томонидан бевосита аҳоли билан юзма-юз, очиқ ва ошкора тарзда ўтказилаётган сайёр суд мажлислари муҳим аҳамият касб этмоқда. Чунки бундай сайёр суд мажлисларида жабрланувчи ва жавобгар шахсларнинг яқин қариндошлари, маҳалладошлари, уларнинг қонуний вакиллари иштироки ҳам таъминланиб, жараённинг бюрократик тўсиқлардан холи, ҳақиқат ва адолат тамойилларига мувофиқ амалга оширилиши аҳолининг судларга бўлган ишончини мустаҳкамламоқда.

Жиноят ишлари бўйича Амударё туман суди томонидан туманнинг олис қишлоқ ва маҳаллаларида аҳоли вакиллари иштирокида ўтказилаётган ана шундай сайёр суд мажлислари туман аҳолисининг нафақат суд жараёнларига бўлган ишончини, балки уларнинг ҳуқуқий саводхонлигини ҳам ошириш имконини бермоқда.

Жорий йилнинг 8 октябрь санасида Манғит шаҳрининг Янгиобод маҳалласи маъмурий биносида бўлиб ўтган сайёр суд мажлиси ҳам очиқлик ва ошкоралик, адолат тамойиллари асосида, бюрократик тўсиқлардан холи ўтказилгани муҳим аҳамият касб этди.

Сайёр суд мажлисида Жиноят ишлари бўйича Амударё туман суди раиси Жасурбек Балтабаев, судья ёрдамчиси Элёр Жуманиёзов, Амударё туман прокурорининг катта ёрдамчиси Р. Темирбаев иштирок этдилар.

Очиқ сайёр суд мажлисида Ўзбекистон Республикаси Жиноят кодексининг тегишли моддаси билан айбланувчи фуқарога қарши очилган жиноят иши бўйича ярашувни тасдиқлаш масаласи жавобгарнинг маҳалладошлари, яқин қариндошлари ва қонуний вакиллари гувоҳлигида кўриб чиқилди. Жараёнда жабрланувчи гумон қилинувчи билан ярашганлиги, етказилган зарар қопланганлиги инобатга олиниб, Ўзбекистон Республикаси Жиноят процессуал кодексининг тегишли моддаси тартибида фуқарога нисбатан очилган жиноят иши томонларнинг ярашуви муносабати билан тугатилди ва маҳкум жиноий жавобгарликдан озод қилинди.

Шунингдек, очиқ сайёр суд мажлиси давомида Ўзбекистон Республикаси Жиноят кодексининг тегишли моддаси тартибида илгари жиноят содир қилиб, ҳозирги кунда тузалиш йўлига қатъий ўтган ҳамда ўрнатилган тартиб-қоида талабларини бажарган, шунингдек, меҳнатга ҳалол муносабатда бўлган 3 нафар маҳкумга нисбатан қўлланилган жиноий жазолар атрофлича муҳокама қилиниб, уларга белгиланган жазонинг ўталмай қолган қисмини ўташдан муддатидан илгари шартли равишда озод қилиндилар.

Ҳаёт турли баланд-пастликлардан иборат. Иродасизлик, енгил ҳаёт кечиришга одатланиш ҳамиша инсонни хато йўлларга етаклайди. Очиқ сайёр суд мажлисида бошлари эгик ҳолда, маҳалладошлари, ўз яқинлари, қолаверса, инсонпарварлик, кечиримлилик тамойилларига асосланган давлатимиз қонунлари қаршисида қайта жиноятга қўл урмасликка сўз бераётган, жиноий жазодан муддатидан олдин озод этилган юртдошларимизга халқ гувоҳлигида ишонч билдирилди.

Янгиобод маҳалласи фуқаролар вакилларининг фаол иштирокида ўтказилган очиқ сайёр суд мажлиси ҳар қандай ҳолатдаги ҳуқуқбузарликларга нисбатан жазо муқаррарлиги, меҳнатга ҳалол муносабатда бўлишнинг ижтимоий-маънавий жиҳатдан инсон камолотида жуда катта аҳамиятга эгалиги билан муҳим ҳуқуқий-тарбиявий аҳамият касб этди.

РОБИЯ ЙЎЛДОШЕВА.