Yangiobod mahallasida sayyor sud oʻtkazildi

Sud tizimining ochiqlik va oshkoralik printsipi aholining odil sudlov toʻgʻrisidagi axborotga boʻlgan ehtiyojini qondirishga, shu bilan birga sud jarayonlariga nisbatan ishonchini mustahkamlashga qaratilgan. Bu borada sudlar tomonidan bevosita aholi bilan yuzma-yuz, ochiq va oshkora tarzda oʻtkazilayotgan sayyor sud majlislari muhim ahamiyat kasb etmoqda. Chunki bunday sayyor sud majlislarida jabrlanuvchi va javobgar shaxslarning yaqin qarindoshlari, mahalladoshlari, ularning qonuniy vakillari ishtiroki ham taʼminlanib, jarayonning byurokratik toʻsiqlardan xoli, haqiqat va adolat tamoyillariga muvofiq amalga oshirilishi aholining sudlarga boʻlgan ishonchini mustahkamlamoqda.

Jinoyat ishlari boʻyicha Amudaryo tuman sudi tomonidan tumanning olis qishloq va mahallalarida aholi vakillari ishtirokida oʻtkazilayotgan ana shunday sayyor sud majlislari tuman aholisining nafaqat sud jarayonlariga boʻlgan ishonchini, balki ularning huquqiy savodxonligini ham oshirish imkonini bermoqda.

Joriy yilning 8-oktyabr sanasida Mangʻit shahrining Yangiobod mahallasi maʼmuriy binosida boʻlib oʻtgan sayyor sud majlisi ham ochiqlik va oshkoralik, adolat tamoyillari asosida, byurokratik toʻsiqlardan xoli oʻtkazilgani muhim ahamiyat kasb etdi.

Sayyor sud majlisida Jinoyat ishlari boʻyicha Amudaryo tuman sudi raisi Jasurbek Baltabayev, sudya yordamchisi Elyor Jumaniyozov, Amudaryo tuman prokurorining katta yordamchisi R. Temirbayev ishtirok etdilar.

Ochiq sayyor sud majlisida Oʻzbekiston Respublikasi Jinoyat kodeksining tegishli moddasi bilan ayblanuvchi fuqaroga qarshi ochilgan jinoyat ishi boʻyicha yarashuvni tasdiqlash masalasi javobgarning mahalladoshlari, yaqin qarindoshlari va qonuniy vakillari guvohligida koʻrib chiqildi. Jarayonda jabrlanuvchi gumon qilinuvchi bilan yarashganligi, yetkazilgan zarar qoplanganligi inobatga olinib, Oʻzbekiston Respublikasi Jinoyat protsessual kodeksining tegishli moddasi tartibida fuqaroga nisbatan ochilgan jinoyat ishi tomonlarning yarashuvi munosabati bilan tugatildi va mahkum jinoiy javobgarlikdan ozod qilindi.

Shuningdek, ochiq sayyor sud majlisi davomida Oʻzbekiston Respublikasi Jinoyat kodeksining tegishli moddasi tartibida ilgari jinoyat sodir qilib, hozirgi kunda tuzalish yoʻliga qatʼiy oʻtgan hamda oʻrnatilgan tartib-qoida talablarini bajargan, shuningdek, mehnatga halol munosabatda boʻlgan 3 nafar mahkumga nisbatan qoʻllanilgan jinoiy jazolar atroflicha muhokama qilinib, ularga belgilangan jazoning oʻtalmay qolgan qismini oʻtashdan muddatidan ilgari shartli ravishda ozod qilindilar.

Hayot turli baland-pastliklardan iborat. Irodasizlik, yengil hayot kechirishga odatlanish hamisha insonni xato yoʻllarga yetaklaydi. Ochiq sayyor sud majlisida boshlari egik holda, mahalladoshlari, oʻz yaqinlari, qolaversa, insonparvarlik, kechirimlilik tamoyillariga asoslangan davlatimiz qonunlari qarshisida qayta jinoyatga qoʻl urmaslikka soʻz berayotgan, jinoiy jazodan muddatidan oldin ozod etilgan yurtdoshlarimizga xalq guvohligida ishonch bildirildi.

Yangiobod mahallasi fuqarolar vakillarining faol ishtirokida oʻtkazilgan ochiq sayyor sud majlisi har qanday holatdagi huquqbuzarliklarga nisbatan jazo muqarrarligi, mehnatga halol munosabatda boʻlishning ijtimoiy-maʼnaviy jihatdan inson kamolotida juda katta ahamiyatga egaligi bilan muhim huquqiy-tarbiyaviy ahamiyat kasb etdi.

ROBIYa YOʻLDOShEVA.