Нукусда Британия тажрибаси орқали ер унумдорлигини тиклаш йўллари муҳокама этилди

Оролбўйи минтақасида ерларнинг деградацияси ва чўлланиш муаммоси кескин тус олаётган бир пайтда Қорақалпоғистон Республикасида тупроқ унумдорлигини қайта тиклаш ва сув ресурсларидан оқилона фойдаланиш йўлларини излаш муҳим устувор вазифага айланмоқда. Қорақалпоғистон қишлоқ хўжалиги ва агротехнологиялар институтида айни шу долзарб мавзуга бағишланган муҳим илмий-амалий тадбир – “Олти дюйм тупроқ” номли ҳужжатли фильм тақдимоти бўлиб ўтди.

Тадбирда Буюк Британиянинг Тошкентдаги элчихонаси вакиллари, Қорақалпоғистон Республикаси Вазирлар Кенгашининг Ташқи беғараз кўмак маблағларини жалб этиш ва донорлар билан ишлаш бўлими масъуллари, Қишлоқ хўжалиги вазирлиги ходимлари, соҳавий илмий-тадқиқот институтлари мутахассислари, шунингдек, институтнинг профессор-ўқитувчилари, докторантлар ва фаол талаба-ёшлар иштирок этди. Халқаро ҳамкорлик доирасидаги бундай мулоқотлар минтақадаги экологик хавфсизликни таъминлашга қаратилган ягона ёндашувни шакллантиришда муҳим аҳамиятга касб этди.

Мазкур тақдимотдан кўзланган асосий мақсад — деградацияга учраган ерларнинг унумдор қатламини қайта тиклаш бўйича Буюк Британиянинг илғор, инновацион тажрибасини чуқур ўрганиш ҳамда уни Қорақалпоғистоннинг шўрланган ва қурғоқчил шароитида қўллаш имкониятларини атрофлича муҳокама қилишдан иборатдир. “Олти дюйм тупроқ” фильми айнан тупроқнинг ҳаётий аҳамияти ва уни сақлаш усулларига бағишланган бўлиб, у глобал иқлим ўзгаришлари фонида маҳаллий аграр секторни барқарор ривожлантиришга ундайди.

Тадбир давомида иштирокчилар экологик муаммолар, тупроқ ресурсларининг самарали бошқаруви, барқарор қишлоқ хўжалиги амалиётлари ҳамда халқаро ҳамкорлик истиқболлари ҳақида фаол фикр алмашишди. Олимлар ва мутахассислар Оролбўйи минтақасидаги тупроқ шўрланиши ва чўлланиш жараёнларига қарши курашишда хорижий инновацияларни қўллашнинг аҳамиятини алоҳида қайд этиб, бунинг учун фан ва амалиёт ўртасидаги интеграцияни кучайтириш лозимлигини таъкидлашди.

Фильмда ёритилган илғор тажрибалар ва инновацион ёндашувлар институт олимлари ва талабаларида катта қизиқиш уйғотди. Институт ректори Бердияр Жоллибеков бошчилигида ўтказилган муҳокамада иштирокчилар бу тажрибани Қорақалпоғистоннинг тупроқ-иқлим шароитида қандай қилиб муваффақиятли жорий этиш мумкинлиги ҳақида ўз фикр-мулоҳазаларини билдирдилар.

Хусусан, асосий эътибор қурғоқчиликка чидамли, кам сув талаб қиладиган навларни жорий этиш, сувни тежовчи агротехнологияларни кенг қўллаш ва тупроқни ҳимоя қилишнинг органик усулларини ривожлантиришга қаратилди. Бу каби очиқ мулоқотлар ёш олимлар ва талабаларни глобал муаммоларга маҳаллий ечим топишга ундаши билан бирга, келгусидаги илмий-тадқиқот ишлари учун янги, амалиётга йўналтирилган мавзулар ва йўналишлар очиб бериши билан ҳам аҳамиятлидир.

Тадбир якунлангандан сўнг, институт ректори Бердияр Жоллибеков Буюк Британиянинг Тошкентдаги элчихонаси вакилларини институтдаги янги, замонавий лабораториялар билан таништирди. Ушбу лабораториялар тупроқ таркибини аниқ таҳлил қилиш ва илмий ҳамкорлик учун мустаҳкам пойдевор бўлиб хизмат қилиши таъкидланди.

Қорақалпоғистон қишлоқ хўжалиги ва агротехнологиялар институтида ўтказилган ушбу тадбир Қорақалпоғистоннинг экологик ва қишлоқ хўжалиги соҳасидаги халқаро ҳамкорлик алоқаларини янада мустаҳкамлаб, минтақанинг яшил иқтисодиётга ўтишини янада жадаллаштириш ва бу жараёнда илмий асосланган тажрибаларни амалиётга кенг жорий этишга хизмат қилади.