Асосий фанлар олимпиадасининг туман босқичи бошланди
Амударё туманида 2025-2026 ўқув йилининг энг нуфузли интеллектуал тадбирларидан бири – асосий фанлар олимпиадасининг туман босқичи бошланди.
14 октябрь куни 1-сонли мактабда олимпиада туман босқичининг тантанали очилиш маросими бўлиб ўтди. Маросимда Қорақалпоғистон Республикаси Таълим маркази директори Наргиза Матлатипова, Қорақалпоғистон Республикаси Мактабгача ва мактаб таълими вазирлиги масъул ходими Фазилат Зарипова, туман ихтисослаштирилган мактабидан масъул ходим Муҳайё Таирова, туман Мактабгача ва мактаб таълими бўлими бошлиғи Ялғашбой Шамуратов ва бўлим масъуллари иштирок этишди.
Тадбирда сўзга чиққан масъуллар олимпиаданинг ёшлар ҳаётидаги аҳамиятини таъкидлаб, ўқувчиларга мазкур билимлар беллашувида омад ва муваффақият тиладилар ва иштирокчиларни ҳалоллик ҳамда адолат тамойилларига қатъий риоя этишга чақирдилар.
Олимпиада Ўзбекистон Республикаси Мактабгача ва мактаб таълими вазирлигининг 2025 йил 18 сентябрдаги ҳамда Қорақалпоғистон Республикаси мактабгача ва мактаб таълими вазирлигининг 2025 йил 23 сентябрдаги буйруқлари асосида ташкил этилмоқда. Туман Мактабгача ва мактаб таълими бўлими тасарруфидаги умумий ўрта таълим мактаблари ўқувчилари ўртасидаги беллашувлар 14–23 октябрь кунлари 1-сонли мактабда ўтказилиши белгиланган.
Бу йилги олимпиадада тумандаги 86 та умумий ўрта таълим мактабларидан жами 2774 нафар 9-10-11-синф ўқувчилари иштирок этмоқда. Ўқувчилар 15 та фан йўналиши бўйича ўз билимларини синовдан ўтказишади.
Фанлар олимпиадаси шартли равишда икки гуруҳга ажратилган. Яъни математика, информатика, кимё, биология ва физика фанларидан иштирок этаётган ўқувчилар I гуруҳга, тарих, география, рус тили, ҳуқуқ, инглиз тили, қорақалпоқ тили, она тили ва адабиёт, ўзбек тили, қозоқ тили ва адабиёти, қорақалпоқ тили ва адабиёти каби фанлар бўйича иштирокчилар эса II гуруҳга киритилган.
Жорий йилги олимпиаданинг асосий янгилиги ва афзаллиги I гуруҳ фанлари бўйича ўтказиладиган синовлар билан боғлиқдир. Ушбу фанлар бўйича беллашувлар 14–18 октябрь кунлари онлайн шаклда ўтказилмоқда. Энг муҳими, ўқувчилар олимпиада натижаларини синов якунида шу вақтнинг ўзидаёқ билиб олиш имкониятига эга бўлдилар. Бу шаффофликни ошириш ва натижаларни тезкор эълон қилишга хизмат қилади.
II гуруҳ фанлари бўйича синовлар эса анъанавий тест кўринишида 20–23 октябрь кунлари ўтказилиши режалаштирилган.
Олимпиаданинг туман босқичи ғолиблари кейинги – ҳудудий босқичда Амударё тумани шарафини ҳимоя қилиш имкониятига эга бўладилар. Ҳудудий босқич шаҳарлар ва туманлараро беллашувлар ғолиблари иштирокида ўтказилади. Бундай кенг қамровли беллашувлар энг билимли ва иқтидорли ўқувчиларни саралаб олишга хизмат қилади. Қолаверса, мазкур олимпиада ўқувчиларнинг билим ва салоҳиятини синовдан ўтказиш, иқтидорли ёшларни аниқлаш ва уларни қўллаб-қувватлашда муҳим восита бўлиши шубҳасиз.
Фурсатдан фойдаланиб, асосий фанлар олимпиадасининг туман босқичида иштирок этаётган барча ўқувчи-ёшларга омад ва зафарлар тилаймиз! Ғолибларнинг эса кейинги босқичларда ҳам муваффақиятли иштирок этиб, туманимиз шарафини муносиб ҳимоя қилишларига тилакдошмиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
