АҲОЛИ ВА ҚИШЛОҚ ХЎЖАЛИГИНИ РЎЙХАТГА ОЛИШГА ТАЙЁРГАРЛИК КЎРИШ БЎЙИЧА СЕМИНАР ЎТКАЗИЛДИ

Жорий йилнинг 19 сентябрь куни Ўзбекистон Республикаси Президентининг “Аҳоли ва қишлоқ хўжалигини рўйхатга олиш тадбирини ўтказиш тўғрисида”ги Фармони қабул қилинган эди. Мазкур фармонга кўра Ўзбекистонда 2026 йил 15 январдан 28 февралгача аҳоли ва қишлоқ хўжалигини рўйхатга олиш тадбири ўтказилади. Бу жараён мамлакатимизнинг ижтимоий-иқтисодий ривожланишини стратегик режалаштиришда муҳим аҳамиятга эга.

Рўйхатга олиш орқали республикамизда 38 миллион аҳолининг ёши, оилавий ҳолати, таълим даражаси, миграция жараёнлари, иш билан бандлиги ва даромад манбалари ҳақида ягона маълумотлар базаси шаклланади. Шу билан бирга, қишлоқ хўжалигида ердан фойдаланиш, чорвачилик кўрсаткичлари аниқланади.

Тадбир икки босқичда амалга оширилади. Аввалги 17 кун давомида фуқаролар махсус портал орқали онлайн рўйхатдан ўтишлари мумкин. Кейинги босқичда эса “Маҳалла еттилиги” ва бошқа фаоллар уйма-уй юриб, маълумот тўплайдилар. Ҳозирда жойларда мазкур жараёнга тайёргарлик ишлари олиб борилмоқда. Маҳаллаларда, корхона ва ташкилотларда ҳамда таълим муассасаларида аҳолига рўйхатга олишнинг мазмун-моҳияти ва мақсадлари ҳақида тушунтиришлар берилмоқда.

Жорий йилнинг 22 октябрь санасида Амударё туман ҳокимлигининг мажлислар залида Президентимизнинг юқоридаги Фармони ва Ҳукумат қарори ижросини таъминлашга бағишланган семинар бўлиб ўтди. Семинарда тумандаги фуқароларнинг ўзини-ўзи бошқариш органлари раҳбарлари, мутасадди ташкилотларнинг масъул ходимлари ва оммавий ахборот воситалари вакиллари иштирок этдилар.

Семинарда асосий эътибор Амударё туманининг демографик ҳолатини белгилаш, аҳолининг ёши, оилавий ҳолати, таълим даражаси, миграция жараёнлари, иш билан бандлик даражалари ҳамда даромад манбалари ҳақидаги ягона ва яхлит маълумотлар базасини шакллантириш, туман қишлоқ хўжалиги соҳасида ердан унумли фойдаланиш ва чорвачилик йўналишидаги асосий кўрсаткичларни аниқлаш ҳамда ягона тизимга олиш масалаларига қаратилди.

Семинарда рўйхатга олиш тадбирини ўтказишга тайёргарлик кўриш, аҳолининг барча қатламлари орасида, корхона ва ташкилотларда, шунингдек, таълим-тарбия муассасаларида рўйхатга олиш ишларининг мазмун-моҳияти, давлат ва жамият тараққиётидаги аҳамияти, рўйхатга олишдан кўзланган асосий мақсадлар ҳақида кенг тушунтиришлар олиб бориш зарурлиги қайд этилди.

Таъкидланганидек, рўйхатга олиш жараёнида йиғилган маълумотлар туман ҳудудларини ижтимоий-иқтисодий ривожлантириш орқали янги иш ўринларини яратиш, оналик ва болаликни муҳофаза қилиш, даромади паст оилаларни изчил қўллаб-қувватлаш ва ижтимоий ёрдам кўрсатиш бўйича келажакда ишлаб чиқиладиган дастурлар ва режалар учун асосий манба бўлиб хизмат қилади. Шу билан бирга туманнинг инвестициявий жозибадорлигини ошириш, тадбиркорликни янада ривожлантириш, пировардида камбағалликка кескин барҳам бериш имконини яратади.

Бундан ташқари, аҳоли ва қишлоқ хўжалигини рўйхатга олиш натижалари миллий барқарор ривожланиш мақсадларини баҳолаш, халқаро рейтингларда мамлакатимизнинг ўрнини юксалтириш, хорижий инвесторларни жалб қилиш ва туризм салоҳиятини оширишда ҳам муҳим аҳамият касб этади.

Семинарда “Маҳалла еттилиги”аъзолари ва тегишли мутасаддиларга рўйхатга олиш жараёнида эътибор қаратиш лозим бўлган муҳим жиҳатлар ҳақида маълумотлар берилди. Иштирокчиларнинг берган саволларига ташкилотчилар батафсил жавоб бердилар. Семинар сўнгида фуқаролар йиғинлари вакилларига жойларда аҳоли билан учрашувлар ўтказиб, рўйхатга олиш жараёни ҳақида батафсил тушунтиришлар бериш вазифаси топширилди.