AHOLI VA QIShLOQ XOʻJALIGINI ROʻYXATGA OLIShGA TAYYoRGARLIK KOʻRISh BOʻYIChA SEMINAR OʻTKAZILDI

Joriy yilning 19-sentyabr kuni Oʻzbekiston Respublikasi Prezidentining “Aholi va qishloq xoʻjaligini roʻyxatga olish tadbirini oʻtkazish toʻgʻrisida”gi Farmoni qabul qilingan edi. Mazkur farmonga koʻra Oʻzbekistonda 2026-yil 15-yanvardan 28-fevralgacha aholi va qishloq xoʻjaligini roʻyxatga olish tadbiri oʻtkaziladi. Bu jarayon mamlakatimizning ijtimoiy-iqtisodiy rivojlanishini strategik rejalashtirishda muhim ahamiyatga ega.

Roʻyxatga olish orqali respublikamizda 38 million aholining yoshi, oilaviy holati, taʼlim darajasi, migratsiya jarayonlari, ish bilan bandligi va daromad manbalari haqida yagona maʼlumotlar bazasi shakllanadi. Shu bilan birga, qishloq xoʻjaligida yerdan foydalanish, chorvachilik koʻrsatkichlari aniqlanadi.

Tadbir ikki bosqichda amalga oshiriladi. Avvalgi 17 kun davomida fuqarolar maxsus portal orqali onlayn roʻyxatdan oʻtishlari mumkin. Keyingi bosqichda esa “Mahalla yettiligi” va boshqa faollar uyma-uy yurib, maʼlumot toʻplaydilar. Hozirda joylarda mazkur jarayonga tayyorgarlik ishlari olib borilmoqda. Mahallalarda, korxona va tashkilotlarda hamda taʼlim muassasalarida aholiga roʻyxatga olishning mazmun-mohiyati va maqsadlari haqida tushuntirishlar berilmoqda.

Joriy yilning 22-oktyabr sanasida Amudaryo tuman hokimligining majlislar zalida Prezidentimizning yuqoridagi Farmoni va Hukumat qarori ijrosini taʼminlashga bagʻishlangan seminar boʻlib oʻtdi. Seminarda tumandagi fuqarolarning oʻzini-oʻzi boshqarish organlari rahbarlari, mutasaddi tashkilotlarning masʼul xodimlari va ommaviy axborot vositalari vakillari ishtirok etdilar.

Seminarda asosiy eʼtibor Amudaryo tumanining demografik holatini belgilash, aholining yoshi, oilaviy holati, taʼlim darajasi, migratsiya jarayonlari, ish bilan bandlik darajalari hamda daromad manbalari haqidagi yagona va yaxlit maʼlumotlar bazasini shakllantirish, tuman qishloq xoʻjaligi sohasida yerdan unumli foydalanish va chorvachilik yoʻnalishidagi asosiy koʻrsatkichlarni aniqlash hamda yagona tizimga olish masalalariga qaratildi.

Seminarda roʻyxatga olish tadbirini oʻtkazishga tayyorgarlik koʻrish, aholining barcha qatlamlari orasida, korxona va tashkilotlarda, shuningdek, taʼlim-tarbiya muassasalarida roʻyxatga olish ishlarining mazmun-mohiyati, davlat va jamiyat taraqqiyotidagi ahamiyati, roʻyxatga olishdan koʻzlangan asosiy maqsadlar haqida keng tushuntirishlar olib borish zarurligi qayd etildi.

Taʼkidlanganidek, roʻyxatga olish jarayonida yigʻilgan maʼlumotlar tuman hududlarini ijtimoiy-iqtisodiy rivojlantirish orqali yangi ish oʻrinlarini yaratish, onalik va bolalikni muhofaza qilish, daromadi past oilalarni izchil qoʻllab-quvvatlash va ijtimoiy yordam koʻrsatish boʻyicha kelajakda ishlab chiqiladigan dasturlar va rejalar uchun asosiy manba boʻlib xizmat qiladi. Shu bilan birga tumanning investitsiyaviy jozibadorligini oshirish, tadbirkorlikni yanada rivojlantirish, pirovardida kambagʻallikka keskin barham berish imkonini yaratadi.

Bundan tashqari, aholi va qishloq xoʻjaligini roʻyxatga olish natijalari milliy barqaror rivojlanish maqsadlarini baholash, xalqaro reytinglarda mamlakatimizning oʻrnini yuksaltirish, xorijiy investorlarni jalb qilish va turizm salohiyatini oshirishda ham muhim ahamiyat kasb etadi.

Seminarda “Mahalla yettiligi”aʼzolari va tegishli mutasaddilarga roʻyxatga olish jarayonida eʼtibor qaratish lozim boʻlgan muhim jihatlar haqida maʼlumotlar berildi. Ishtirokchilarning bergan savollariga tashkilotchilar batafsil javob berdilar. Seminar soʻngida fuqarolar yigʻinlari vakillariga joylarda aholi bilan uchrashuvlar oʻtkazib, roʻyxatga olish jarayoni haqida batafsil tushuntirishlar berish vazifasi topshirildi.