ЭЛ-ЮРТ ОСОЙИШТАЛИГИ ПОСБОНИ
Амударёлик Азимжон Матюсупов Ички ишлар органи ходими бўлишни орзу қилганида ҳали умумтаълим мактабининг бошланғич синф ўқувчиси эди. Адабиёт дарсларида "Менинг орзуим" мавзусида иншо ёзганида ҳар доим эл-юрт осойишталиги посбони — милиционер бўлиш, она Ватанини, халқини турли хавф-хатарлардан ҳимоя қилиш, жиноятчиликнинг олдини олиш борасидаги орзулари хусусида тўлқинланиб ёзарди. Инсоннинг кўнглида бирор бир касбга нисбатан меҳр ва иштиёқ бўлса, бу туйғу уни орзуларнинг ойдин йўллари томон етаклайди. Азимжоннинг Ички ишлар органи ходимлари фаолиятига бўлган қизиқишлари, бу касбга нисбатан беқиёс меҳр ва иштиёқи уни болалигидан қалбида ардоқлаган осойишталик посбони бўлишдек эзгу орзулари йўлига бошлади.
Амударё тумани Мактабгача ва мактаб таълими бўлими тасарруфидаги 21-сонли умумтаълим мактабини фақат аъло баҳоларга тамомлаган Азимжон Матюсупов 2007-2011 йилларда Ажиниёз номидаги Нукус давлат педагогика институтининг тарих факультетида миллий истиқлол ғояси ва маънавият асослари йўналишида таҳсил олди. Мамлакатимиз ва дунё халқлари тарихини пухта биладиган, қолаверса, миллий истиқлол ғояси ва маънавият асослари йўналишида чуқур билимга эга мутахассис, албатта, Ички ишлар органлари учун сув билан ҳаводек зарур. Чунки соҳада нафақат жиноятчиликка қарши кураш олиб борилади, балки фуқаролар онгида миллий истиқлол ғояларини шакллантириш ҳам муҳим аҳамият касб этади.
ФИДОКОРОНА ХИЗМАТ ЙЎЛИ
Азимжон Матюсупов 2014 йилда Беруний тумани Ички ишлар бўлимининг туманлараро Қўриқлаш бўлими 1-сонли милиция отряди таркибидаги 2-взводи милиционери сифатида илк меҳнат фаолиятини бошлаган куниданоқ аҳоли билан мулоқот ва иш жараёнида миллий-маънавий қадриятларга таянди ва бунинг самарасини ўз иш жараёнида намоён эта олди. У қаерда, қайси ҳудудда ишлашидан қатъий назар, касбий фаолиятини бекаму кўст адо этишга интилди ҳамда бунинг уддасидан чиқди.
Азимжон Матюсупов 2015-2017 йилларда Амударё туман Ички ишлар бўлими ҳузуридаги Қўриқлаш бўлими 1-сонли взвод милиционери, 2017-2022 йилларда Амударё туман Ички ишлар бўлимининг ҳуқуқбузарликлар профилактикаси бўлинмаси таянч пунктлари профилактика инспектори лавозимларида халқ тинчлиги ва осойишталигини сақлашдек машаққатли, шу билан бирга масъулиятли вазифани сидқидилдан адо этди. 2022 йилдан бери у туман Ички ишлар бўлими ҳуқуқбузарликлар профилактикаси бўлинмаси таянч пунктларининг профилактика катта инспектори лавозимида Чойкўл овули ҳудудида жиноятчилик ва ҳуқуқбузарликларнинг олдини олиш, овул аҳолисининг осойишталигини таъминлаш борасида самарали фаолият юритиб келмоқда.
“ХАВФСИЗ ҲУДУД” ТАМОЙИЛИ АСОСИДА
Азимжон Матюсуповнинг профилактика инспектори сифатида амалга оширадиган фаолият кўлами анчагина кенг. Хусусан, овул ҳудудидаги умумтаълим мактаблари ўқувчиларининг сабабсиз дарс қолдириб, кўча-кўйларда бекор юришларининг олдини олиш мақсадида 22-, 59- ва 42-сонли мактабларда тез-тез бўлиб, маънавий-маърифий, тарбиявий мавзуларда суҳбатлар ўтказади. “Маҳалла еттилиги” аъзолари билан ҳамкорликда мактаблараро спорт мусобақалари, туманимиздан етишиб чиққан таниқли шоир ва ёзувчилар билан учрашувлар, ҳуқуқшунослар иштирокида ҳуқуқий саводхонлик, китобхонлик кечалари ташкил этади.
Айниқса, "Хавфсиз ҳудуд", "Хавфсиз хонадон" тадбирларини амалга оширишдаги узвийлик туфайли овулда 2025 йилнинг ўтган даври мобайнида биронта ҳам жиноят содир этилмади. Натижада Чойкўл овули жиноятчилик ва ҳуқуқбузарликлардан холи, хавфсиз “яшил” ҳудудлар тоифасига киритилди.
Ҳар бир хонадоннинг хавфсизлиги, фаровон ва ободлиги мазкур хонадонларда истиқомат қилувчи фуқароларнинг ўзаро аҳилликда, тинч-тотув ҳаёт кечиришларига боғлиқ. Шу боис, Азимжон Матюсупов “Маҳалла еттилиги” аъзолари билан ҳамкорликда мунтазам равишда ўтказилиб келинаётган “Хавфсиз хонадон” профилактик тадбири доирасида хонадонларга кириб бориб, уларнинг турмуш тарзи, қандай ишлар билан машғул бўлишаётгани, уларни қийнаб келаётган муаммоларни ўрганади. Ўрганишлар жараёнида аниқланган муаммоларга ижобий ечим топиш чораларини кўради.
Унинг иш кунлари ана шу зайлда, ҳамиша халқ орасида, эл-юрт тинчлиги ва осойишталигини таъминлашдек машаққатли ва шарафли вазифани адо этиш йўлида беором ўтади. Бундайин ҳаловатсиз кечадиган меҳнат онлари Азимжон Матюсуповнинг тақдирига айланган. Ана шу машаққатли касби туфайли у эл аро ҳурмат, эътибор ва обрў топди, хизмат мавқеида майор даражасига етишди. Тақдирнинг бу шарафли туҳфаси оилавий ҳаётида ҳам ўз аксини топди. Умр йўлдоши, 21-сонли мактаб ўқитувчиси Гулноза Юлдашева билан биргаликда бунёд этган оила бўстонида 3 ўғил ва бир қизни ақлли, билимдон инсонлар қилиб вояга етказишмоқда.
Ҳар гал 25 октябрь санаси – Ички ишлар органлари ходимлари кунида Азимжон Матюсуповнинг хонадони ҳамкасблари, дўстлари ташрифидан файзга тўлади. Унинг барча яқинлари бу кунни Азимжон билан биргаликда алоҳида қувонч билан нишонлайдилар. Чунки эл-юрт тинчлиги ва осойишталиги посбонлари барча учун бирдай қадрли. Биз ҳам милиция майори Азимжон Матюсуповни касб байрами муносабати билан чин дилдан муборакбод этамиз ҳамда оилавий бахт, шарафли ва машаққатли касбий фаолиятида муваффақият, мустаҳкам соғлик тилаймиз.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
