Ижтимоий ҳимоя — инсонпарварлик, меҳр-мурувват, тенглик ва адолат масаласидир

Ижтимоий ҳимоя айрим одамлар назарида ногиронлиги бўлган шахслар, кам таъминланган оилалар, кекса ёшдаги одамларнинг ҳаёти билан боғлиқдек кўринади. Аслида эса ижтимоий ҳимоя таълим, соғлиқни сақлаш, шунингдек, ижтимоий ҳаётнинг турли жабҳаларига кириб бормоқда.

Хусусан, ногиронлиги бўлган болалар инклюзив таълимга жалб қилиниб, соғлиқни сақлашда ногиронлиги бўлган, муҳтож шахсларга протез мосламалари ва реабилитация воситаларини навбат кутмасдан ваучер асосида, 20 фоиз рағбатлантириш сифатида тақдим этиш, якка-ёлғиз яшовчи, шунингдек, ўзгалар парваришига муҳтож фуқароларга комплекс индивидуал хизматлар кўрсатишга алоҳида эътибор қаратилмоқда.

Бу борада Манғит шаҳрининг Чордара маҳалла фуқаролар йиғинида аҳолининг ижтимоий ҳимояга муҳтож қатламини қўллаб-қувватлаш, уларга ижтимоий ёрдам ва хизматлар кўрсатиш ишлари намунали йўлга қўйилган.

Айни пайтда маҳалла ҳудудидаги 666 та хонадон таркибида 1012 та оила мавжуд бўлиб, бу оилаларда 3650 нафар аҳоли истиқомат қилади. Маҳалла хонадонлари обод, ҳар бир оила тинч-тотув яшашини таъминлаш мақсадида, аҳоли ҳаёти ва турмуш шароитлари “Инсон” ижтимоий хизмат кўрсатиш маркази Амударё туман бўлимининг маҳаллада фаолият олиб борувчи ижтимоий ходими томонидан “Маҳалла еттилиги” аъзолари билан ҳамкорликда индивидуал ёндашув асосида ўрганилиб, ижтимоий ҳимояга муҳтож фуқаролар рўйхати шакллантирилди.

Ўрганишлар натижасида 148 нафар ногиронлиги бўлган шахслар, 73 нафар кам таъминланган оилалар мавжудлиги аниқланиб, алоҳида тизимга олинди.

Кўрилган чора-тадбирлар натижасида протез мосламалари ва реабилитация воситаларига муҳтож 17 нафар ногиронлиги бўлган шахслар ваучер асосида протез мосламалари билан таъминланди. Ўзгалар парваришига муҳтож кексалар ва ногиронлиги бўлган шахслар билан ишлашиш бўйича кўрилган чоралар натижасида улардан 13 нафарига қаровчи ижтимоий хизмат ассистенти бириктирилди. Камбағаллик реестрига киритилган муҳтож оилаларга ҳомийлар бириктирилиб, оилалар ҳар томонлама қўллаб-қувватланди.

Мамлакатимиз ижтимоий сиёсатида устуворлик касб этган “Инсон қадри учун!” тамойили бугунги кунда халқимиз ҳаётида ўз ифодасини топмоқда. “Темир дафтар”, “Аёллар дафтари”, “Ёшлар дафтари” каби ташаббуслар аҳолининг турли қатламларини ижтимоий қўллаб-қувватлашга қаратилгани бу борадаги ишларни юксак сифат даражасига кўтарди. Айниқса, 2021 йилдан бошлаб ижтимоий хизматлар ягона реестри жорий этилгани аҳолининг ижтимоий ҳолатини чуқур таҳлил қилиш ва аниқ ёрдам кўрсатиш имконини бермоқда.

Чордара маҳалласи ҳудудида истиқомат қилувчи 148 нафар ногиронлиги бор бўлган фуқаролар ҳамда 73 та кам таъминланган оилаларни нафақат ижтимоий қўллаб-қувватлаш, балки турли байрам саналари муносабати билан уларни йўқлаб бориш, байрамона совғалар улашиш орқали маънавий рағбатлантириб, хуш кайфият бағишлашга ҳам алоҳида эътибор қаратилади. Чунки ижтимоий ҳимоя фақат давлат томонидан бериладиган нафақа ёки моддий ёрдам кўрсатишдангина иборат эмас. Агар ҳар бир юртдош, ҳар бир раҳбар, қўни-қўшни атрофидаги эҳтиёжманд инсонларга меҳр-оқибат, мурувватли бўлсалар — бу ҳар қандай моддиятдан кўра кучлироқ таъсирга эга бўлади.

Жамиятда ижтимоий адолат, тенг имкониятлар, меҳр ва эътибор муҳитини яратиш ҳар биримизнинг зиммамиздаги фуқаролик бурчимиздир. Зеро, ижтимоий ҳимоя — бу фақат тизим эмас, балки юрак амри билан қилинадиган ҳақиқий инсонпарварлик, меҳр-мурувват, тенглик ва адолат масаласидир.

Гулбаҳор ХИДИРОВА, Чордара МФЙ комплекс ижтимоий хизмат кўрсатиш ходими.