АМУДАРЁ ТУМАНИ АДЛИЯ БЎЛИМИ КОРРУПЦИЯГА ҚАРШИ КУРАШДА ЕТАКЧИ

Жамиятимизнинг турли жабҳаларида чуқур илдиз отган коррупция иллатига қарши курашишда Адлия вазирлиги ва унинг ҳудудлардаги қуйи ташкилотлар томонидан ҳам самарали ишлар амалга оширилмоқда. Вазирлик ходимлари иштирокида ўтказилаётган тарғибот тадбирларида ОАВ билан ҳамкорлик муҳим аҳамият касб этмоқда. Амударё телевидениеси таҳририятининг Олий Мажлис ҳузуридаги Жамоат фондининг Қорақалпоғистон Республикаси бўлинмаси томонидан молиялаштирилган “Коррупция — давлат ва жамият тараққиётига таҳдид” номли грант лойиҳаси доирасидаги ҳамкорлик ҳам бунинг ёрқин исботидир.

Адлия бўлими ходимлари томонидан жорий йилнинг ўтган 9 ойи давомида бўлим ҳуқуқшунослари томонидан жами 4 минг 237 маротаба тарғибот ишлари амалга оширилган. Қолаверса, 4000 нафардан ортиқ фуқароларнинг ҳуқуқий муаммолари ижобий ҳал этилган. Судларга жисмоний ва юридик шахсларнинг манфаатини кўзлаб, 20 дан ортиқ даъво аризалари киритилган ва 400 миллион сўмдан ортиқ қарздорлик ундириб берилган. Фуқароларнинг мурожаатларини ўрганиш ва мониторинг қилиш давомида 907 та қонунбузилиш ҳолатлари аниқланиб, уларни бартараф этиш чоралари кўрилган.

Фуқаролик ҳолати далолатномаларини ёзиш бўлими томонидан эса ўтган 9 ой давомида 131 та фуқаролик ҳолати далолатномаларига ўзгартириш, тузатишлар киритилиб, такрорий гувоҳномалар расмийлаштириб берилган. Шунингдек, ўз вақтида туғилиши қайд қилинмаган болаларга ҳужжатлар тўпланишида амалий ёрдам кўрсатиш орқали туғилганлиги қайд қилиниб, гувоҳномалар берилган. 109 нафар фуқарога Мустақил давлатлар ҳамдўстлиги давлатларидан гувоҳнома ва маълумотномалар олишда амалий ёрдам кўрсатилган.

Давлат хизматлари маркази ва Ягона интерактив давлат хизматлари портали орқали жорий йилнинг 9 ойи давомида аҳолига 61 минг 128 та турли хил йўналишлардаги давлат хизматлари кўрсатилган. Туманнинг олис ҳудудларига чиққан ҳолда сайёр давлат хизматларини кўрсатиш амалиёти мунтазам йўлга қўйилган бўлиб, жорий йилнинг 9 ойи давомида сайёр тартибда 4 минг 171 та давлат хизматлари кўрсатилган.

Юридик хизмат кўрсатиш маркази томонидан эса 2025 йил бошидан бери келиб тушган жами 68 минг 178 та ҳужжат лойиҳалари ўрганилиб, уларнинг 67 минг 665 тасига ижобий, 14 тасига салбий хулосалар берилган. 499 та ҳужжат лойиҳалари эса қайта кўриб чиқиш учун рад қилинган.

Туман Адлия бўлими ва унга қарашли тузилмаларда амалга оширилаётган чора-тадбирларнинг барчаси аҳолига сифатли давлат хизматларини кўрсатиш, ҳуқуқий маслаҳат ва тавсиялар бериш, аҳоли онгида коррупция иллатига нисбатан муросасизлик туйғусини шакллантиришга қаратилгани билан муҳим аҳамият касб этмоқда.

Робия ЙЎЛДОШЕВА.