САРИҚ КАСАЛЛИГИДАН ЭҲТИЁТ БЎЛИНГ!

Юқумли касалликлар инсон саломатлигини хавф остида қолдириб, жиддий зиён етказади ва кўплаб асоратлар келтириб чиқаради. Шу боис, Амударё тумани Санитария-эпидемиологик осойишталик ва жамоат саломатлиги бўлими шифокорлари томонидан фасллар алмашиши муносабати билан кузатиладиган юқумли касалликлар тарқалишининг олдини олиш мақсадида тизимли ишлар олиб борилмоқда.

Шундай бўлса-да, халқ орасида “ифлос қўллар касаллиги” ва “сариқ касаллик” номини олган вирусли гепатит А ва гепатит Е касаллигига қарши амалга оширилаётган чора-тадбирларга қарамасдан, аҳоли орасида ушбу касалликка чалиниш ҳолатларининг кузатилаётгани сир эмас.

КАСАЛЛИКНИНГ ЮҚИШ САБАБЛАРИ ВА БЕЛГИЛАРИ

Касаллик кўпроқ 2 ёшдан 15 ёшгача бўлган болалар орасида учрамоқда ва ҳақиқатдан ҳам қуйидаги омиллар натижасида келиб чиқади:

Болаларнинг қўлларини ювмасдан овқатланишлари.

Мева-сабзавотларни тоза сувда ювмай истеъмол қилишлари.

Қайнатилмаган сувни ичишлари.

Туриб қолган очиқ сув ҳавзаларида чўмилишлари.

Усти дастурхон билан ёпилмаган, пашшалар қўнган озиқ-овқат маҳсулотларини истеъмол қилишлари.

Вирусли гепатит касаллиги вирусини юқтириб олган беморда:

Ҳолсизлик, иштаҳа йўқолиши, кўнгил айниши;

Баъзи ҳолатларда қайт қилиш, ҳарорат кўтарилиши;

Уйқучанлик, гриппга ўхшаш ҳолатлар;

Кўз оқи, пастки қовоқ шиллиқ пардаси, тирноқ ва терининг сарғайиши, пешобининг ранги қизариши каби ҳолатлар кузатилади.

ПРОФИЛАКТИКА ВА ЭМЛАШ ИШЛАРИ

Ҳар қандай касалликни даволагандан кўра, унинг олдини олишга қаратилган чора-тадбирлар муҳим аҳамиятга эга. Шу боис, бўлим шифокорлари томонидан соҳа мутахассислари ва аҳоли кенг қатлами орасида тушунтириш-тарғибот ва профилактик тадбирлар ўтказилиб, касалликка қарши мавсумий эмлаш ишларига алоҳида эътибор қаратилаётгани ўз ижобий самарасини бермоқда.

Амударё тумани Санитария-эпидемиологик осойишталик ва жамоат саломатлиги бўлимининг эпидемиология ва иммунопрофилактика бўлими мудираси Гулшод Тажибоева раҳбарлигидаги эпидемиолог-шифокорлар томонидан тизимли равишда профилактик чора-тадбирлар амалга ошириб келинмоқда.

Жорий йилнинг 9 ойи давомида:

2974 нафар чақалоқлар, 3654 нафар болалар вирусли гепатитга қарши эмланди.

Оилавий поликлиникалар, Кўп тармоқли марказий поликлиникаларда вирусли гепатитнинг В ва С турларини аниқлаш бўйича бепул скрининг тестлари ўтказилмоқда. Жорий йилнинг шу давригача 7400 нафар фуқаро ўз розилигига кўра, бепул скрининг тестдан ўтказилди.

ВАКЦИНАЦИЯ

Туманга вирусли гепатит А касаллигига қарши 6 ёшли болаларни эмлаш учун давлат томонидан 3760 доза вакцина етказиб берилди.

Кам таъминланган, ижтимоий ҳимояга муҳтож оилаларнинг фарзандларини эмлаш мақсадида 500 доза 0,5 мл “ОЛВАХТАР –ХАВ” вакцинаси етказилди.

Умумий ҳисобда 3760 нафар 6 ёшдаги болалар ва 18 ёшгача бўлган, ижтимоий ҳимояга муҳтож оилаларнинг фарзандларига гепатит А касаллигига қарши эмлаш ишлари олиб борилди.

Ота-оналар ҳисобидан 50 нафар бола вирусли гепатит А касаллигига қарши вакцина билан эмланди.

Амалга оширилаётган чора-тадбирларнинг барчаси туман аҳолиси, айниқса, ёш болалар орасида вирусли гепатит касаллиги тарқалишининг олдини олишга қаратилгани билан жуда муҳим ижтимоий аҳамиятга эга.

Гулшод Тажибоева, Амударё туман Санитария-эпидемиологик осойишталик ва жамоат саломатлиги бўлимининг

эпидемиология ва иммунопрофилактика бўлими мудираси.

Комила Оллоёрова, Гулмира Низомиддинова, бўлимнинг эпидемиолог-шифокорлари.