SARIQ KASALLIGIDAN EHTIYoT BOʻLING!

Yuqumli kasalliklar inson salomatligini xavf ostida qoldirib, jiddiy ziyon yetkazadi va koʻplab asoratlar keltirib chiqaradi. Shu bois, Amudaryo tumani Sanitariya-epidemiologik osoyishtalik va jamoat salomatligi boʻlimi shifokorlari tomonidan fasllar almashishi munosabati bilan kuzatiladigan yuqumli kasalliklar tarqalishining oldini olish maqsadida tizimli ishlar olib borilmoqda.

Shunday boʻlsa-da, xalq orasida “iflos qoʻllar kasalligi” va “sariq kasallik” nomini olgan virusli gepatit A va gepatit Ye kasalligiga qarshi amalga oshirilayotgan chora-tadbirlarga qaramasdan, aholi orasida ushbu kasallikka chalinish holatlarining kuzatilayotgani sir emas.

KASALLIKNING YuQISh SABABLARI VA BELGILARI

Kasallik koʻproq 2 yoshdan 15 yoshgacha boʻlgan bolalar orasida uchramoqda va haqiqatdan ham quyidagi omillar natijasida kelib chiqadi:

Bolalarning qoʻllarini yuvmasdan ovqatlanishlari.

Meva-sabzavotlarni toza suvda yuvmay isteʼmol qilishlari.

Qaynatilmagan suvni ichishlari.

Turib qolgan ochiq suv havzalarida choʻmilishlari.

Usti dasturxon bilan yopilmagan, pashshalar qoʻngan oziq-ovqat mahsulotlarini isteʼmol qilishlari.

Virusli gepatit kasalligi virusini yuqtirib olgan bemorda:

Holsizlik, ishtaha yoʻqolishi, koʻngil aynishi;

Baʼzi holatlarda qayt qilish, harorat koʻtarilishi;

Uyquchanlik, grippga oʻxshash holatlar;

Koʻz oqi, pastki qovoq shilliq pardasi, tirnoq va terining sargʻayishi, peshobining rangi qizarishi kabi holatlar kuzatiladi.

PROFILAKTIKA VA EMLASh IShLARI

Har qanday kasallikni davolagandan koʻra, uning oldini olishga qaratilgan chora-tadbirlar muhim ahamiyatga ega. Shu bois, boʻlim shifokorlari tomonidan soha mutaxassislari va aholi keng qatlami orasida tushuntirish-targʻibot va profilaktik tadbirlar oʻtkazilib, kasallikka qarshi mavsumiy emlash ishlariga alohida eʼtibor qaratilayotgani oʻz ijobiy samarasini bermoqda.

Amudaryo tumani Sanitariya-epidemiologik osoyishtalik va jamoat salomatligi boʻlimining epidemiologiya va immunoprofilaktika boʻlimi mudirasi Gulshod Tajiboyeva rahbarligidagi epidemiolog-shifokorlar tomonidan tizimli ravishda profilaktik chora-tadbirlar amalga oshirib kelinmoqda.

Joriy yilning 9 oyi davomida:

2974 nafar chaqaloqlar, 3654 nafar bolalar virusli gepatitga qarshi emlandi.

Oilaviy poliklinikalar, Koʻp tarmoqli markaziy poliklinikalarda virusli gepatitning V va S turlarini aniqlash boʻyicha bepul skrining testlari oʻtkazilmoqda. Joriy yilning shu davrigacha 7400 nafar fuqaro oʻz roziligiga koʻra, bepul skrining testdan oʻtkazildi.

VAKTsINATsIYa

Tumanga virusli gepatit A kasalligiga qarshi 6 yoshli bolalarni emlash uchun davlat tomonidan 3760 doza vaktsina yetkazib berildi.

Kam taʼminlangan, ijtimoiy himoyaga muhtoj oilalarning farzandlarini emlash maqsadida 500 doza 0,5 ml “OLVAXTAR –XAV” vaktsinasi yetkazildi.

Umumiy hisobda 3760 nafar 6 yoshdagi bolalar va 18 yoshgacha boʻlgan, ijtimoiy himoyaga muhtoj oilalarning farzandlariga gepatit A kasalligiga qarshi emlash ishlari olib borildi.

Ota-onalar hisobidan 50 nafar bola virusli gepatit A kasalligiga qarshi vaktsina bilan emlandi.

Amalga oshirilayotgan chora-tadbirlarning barchasi tuman aholisi, ayniqsa, yosh bolalar orasida virusli gepatit kasalligi tarqalishining oldini olishga qaratilgani bilan juda muhim ijtimoiy ahamiyatga ega.

Gulshod Tajiboyeva, Amudaryo tuman Sanitariya-epidemiologik osoyishtalik va jamoat salomatligi boʻlimining

epidemiologiya va immunoprofilaktika boʻlimi mudirasi.

Komila Olloyorova, Gulmira Nizomiddinova, boʻlimning epidemiolog-shifokorlari.