НИКОҲ ШАРТНОМАСИ — ОИЛА МУСТАҲКАМЛИГИ АСОСИ

Никоҳ — икки нафар мустақил шахс — эркак ва аёлнинг ўзаро розилиги билан тузиладиган оилавий муносабатларнинг биринчи ва энг муҳим шарти ҳисобланади. Расмий никоҳлангандан сўнг эр-хотиннинг бир оила бўлиб тинч-тотув яшаши улар ўртасидаги мулкий муносабатларга ҳам боғлиқ.

Мамлакатимизда ҳар бир оиланинг аҳил-иноқликда, жамиятнинг бахтли бир бўлаги сифатида фаровон ҳаёт кечиришларини таъминлашга қаратилган қонуний асослар яратилган. Хусусан, Оила кодексининг 29-моддасида никоҳланувчи шахсларнинг мулкий муносабатларини тартибга солиш, эр-хотиннинг никоҳда турган даврида ёки никоҳдан ажратилган тақдирдаги мулкий ҳақ-ҳуқуқлари ва мажбуриятлари никоҳ шартномасида белгиланган ўзаро келишувлар асосида ҳал этилиши белгилаб қўйилган. Унга кўра, никоҳ шартномаси эр-хотин ўртасидаги мулкий муносабатларни тартибга солади ва оиланинг мустаҳкамлигини таъминлайди. Шу билан бирга, оила мулкидан тўғри фойдаланиш эр-хотинни маънавиятли, тартибли оила жамоасини тузиб, одоб-ахлоқли фарзандлар тарбиялаш имконини яратади.

Амударё туман Фуқаролик ҳолати далолатномаларини ёзиш бўлими томонидан ёш оилалар билан ишлашиш, ёш никоҳланувчи шахсларни оилавий ҳаётга тайёрлаш борасида амалга оширилаётган барча ишларнинг мазмун-моҳиятида ҳар бир никоҳланувчи шахснинг зиммасидаги бурч ва мажбуриятларини англашларини таъминлаш, оиланинг муқаддаслигини чин дилдан эътироф этиб, биргаликда турмуш қуришга аҳдлашган фуқароларни маънавий қўллаб-қувватлашдек эзгу мақсад мужассам.

Туман ФҲДЁ бўлимига деярли ҳар куни ўнлаб никоҳланувчи шахслар ташриф буюришади. Уларнинг барчасига бўлим ходимлари томонидан расмий никоҳ тузилишининг аҳамияти, никоҳланувчилар ўртасида тузиладиган никоҳ шартномасининг афзалликлари тўғрисида зарур тушунчалар ва тавсиялар берилади.

Жорий йилнинг 6 ноябрь санасида бўлиб ўтган “Никоҳ шартномаси — оила мустаҳкамлиги асоси” мавзусидаги маънавий-маърифий тадбирда ҳам никоҳланувчи шахсларнинг ҳуқуқ ва мажбуриятлари хусусида атрофлича сўз юритилди.

Тадбирда Амударё туман ФҲДЁ бўлими мудираси Моҳира Эшмуродова, хусусий амалиёт билан шуғулланувчи нотариус Бибизуҳра Бекимбетова, янги ҳаёт остонасига қадам қўяётган келин-куёвлар ва расмий никоҳларини қайд қилдириш учун ФҲДЁ бўлимига мурожаат қилган фуқаролар иштирок этдилар.

Тадбирда ФҲДЁ бўлими мудираси Моҳира Эшмуродова никоҳланувчи шахсларга никоҳ шартномаси тузиш йўл-йўриқлари, шунингдек, бу расмий ҳужжатнинг оилада ўзаро аҳиллик, ишонч ва фаровонликни таъминлашдаги аҳамияти, эр-хотиннинг оила мулкидан оқилона фойдаланиш борасидаги мажбуриятлари, шунингдек, никоҳ шартномасини тузиш қоидалари хусусида батафсил маълумотлар берди.

Хусусий амалиёт билан шуғулланувчи нотариус Бибизуҳра Бекимбетова никоҳ шартномаси қандай шартлар асосида тузилиши ва амал қилиш муддатлари ҳақида зарур маълумотларни тақдим этди. Шу билан бирга иштирокчиларни қизиқтирган саволларга батафсил жавоблар берди.

Таъкидланганидек, никоҳ шартномаси томонларнинг хоҳишига кўра, эркак ва аёлнинг никоҳ шартномаси тузишга розилиги асосида, шартномани имзолашда иккаласи ҳам иштирок этиб, нотариал тасдиқланган тақдирда ҳақиқий ҳисобланади ва оилада мулкий муносабатларни бир умр тартибга солиб туради. Агар эр-хотин никоҳдан ажратилган тақдирда никоҳ шартномасида қайд этилган мол-мулк эр-хотин ўртасида суд орқали қонуний тақсимланиши учун шароит яратади.

“Никоҳ шартномаси — оила мустаҳкамлиги асоси” мавзусидаги мазкур маънавий-маърифий тарғибот тадбири янги оила қуриш истагидаги никоҳланувчи ёшларнинг оила деб аталмиш муқаддас даргоҳга ўзлари учун умр йўлдоши сифатида танлаган инсон билан ўзаро ишонч, ҳурмат ва аҳиллик мезонларига қатъий амал қилган ҳолда илк қадам қўйиш ҳақиқий маънодаги бахт эканлигини англаб етишларида муҳим аҳамиятга эга бўлди.

РОБИЯ ЙЎЛДОШЕВА.