Қорақалпоғистонда "Фуқаролик жамияти ҳафталиги" бошланди
Мамлакатимизда фуқаролик жамияти институтларининг ролини янада ошириш ва уларни давлат томонидан қўллаб-қувватлаш тизимини мустаҳкамлаш борасидаги ислоҳотлар доирасида 2025 йил 17 ноябрь куни Қорақалпоғистон Республикасида “Фуқаролик жамияти ҳафталиги”га старт берилди. Ушбу мулоқот майдонининг асосий мақсади соҳада амалга оширилган ишларни таҳлил қилиш ва уни янада ривожлантириш бўйича таклифлар ишлаб чиқишдан иборат. Таъкидлаш жоизки, Президентнинг махсус фармонига мувофиқ, мазкур ҳафталик ҳар йили декабрь ойининг биринчи ҳафтасида ўтказилиши белгиланган.
Ҳафталик доирасида 17 ноябрь куни Қорақалпоғистон Республикаси Адлия вазирлигида юзга яқин соҳа вакиллари иштирокида “Фуқаролик жамияти институтлари билан очиқ мулоқот ва миллий форуми” ўтказилди. Форумда Қорақалпоғистон Республикаси Жўқорғи Кенгесининг қўмита раиси Шарапат Отемисов сўзга чиқиб, йиғилганларни фуқаролик жамияти ҳафталиги билан табриклаб бугунги форумни очиб берди.
Форумда соҳага доир миллий қонунчилик, нодавлат нотижорат ташкилотларининг молиявий барқарорлиги, унинг фаолиятида фуқаролар иштироки ва жамоатчилик назорати, давлат ва фуқаролик жамияти институтлари ўртасидаги ҳамкорлик ҳамда фуқаролик жамияти институтларининг салоҳиятини ошириш ва рақамлаштириш каби мавзулар муҳокама қилинди.
Таъкидланганидек, сўнгги йилларда Ўзбекистонда фуқаролик жамияти институтлари учун том маънода янги давр бошланди. 2023 йилда қабул қилинган янги таҳрирдаги Ўзбекистон Республикаси Конституциясида жамоат бирлашмалари ва бошқа нодавлат нотижорат ташкилотлари, фуқароларнинг ўзини ўзи бошқариш органлари, оммавий ахборот воситалари фуқаролик жамиятининг асосини ташкил этиши белгилаб қўйилди. Биргина жорий йилда соҳага оид 20 га яқин норматив-ҳуқуқий ҳужжат қабул қилинди , шу жумладан, 2025 йил 21 августдаги қонун билан фуқаролик жамияти институтлари фаолиятига доир 10 та қонунга ўзгартиришлар киритилди.
Соҳани молиявий қўллаб-қувватлаш тизими ҳам тубдан такомиллаштирилди. Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди қайта ташкил этилиб, Фонд маблағларини бошқариш учун Олий Мажлис Сенатининг 8 нафар аъзоси ва Қонунчилик Палатасининг 8 нафар депутатидан иборат Парламент комиссияси фаолияти йўлга қўйилди. Натижада, жорий йилда фуқаролик жамияти институтларини қўллаб-қувватлашга 1 триллион 200 миллиард сўм маблағ жалб қилинди. Хусусан, Қорақалпоғистон Республикасида Жамоат фонди томонидан 2 та давлат ижтимоий буюртмаси ва 19 та давлат гранти лойиҳалари 3 млрд 724 млн сўмлик маблағ эвазига молиялаштирилиб, уларнинг 14 таси муваффақиятли якунланди.
Форум доирасида Олий Мажлис ҳузуридаги Жамоат фонди Қорақалпоғистон Республикаси бўлинмаси билан давлат ташкилотлари ўртасида ҳамкорлик меморандумлари имзоланди. Шунингдек, форумнинг Республика босқичида иштирок этиш учун делегатлар сайланиб, оммавий ахборот воситалари вакилларига ҳафталик давомида ўтказиладиган тадбирлар ҳақида батафсил маълумотлар берилди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
