ЖИНОЯТ ИШЛАРИ БЎЙИЧА ТУМАН СУДИ ТОМОНИДАН КОРРУПЦИЯГА ҚАРШИ КУРАШ БЎЙИЧА САЙЁР УЧРАШУВ ВА САЙЁР СУД МАЖЛИСИ ЎТКАЗИЛДИ

Жиноят ишлари бўйича Амударё туман суди томонидан коррупцияга қарши қаратилган ташкилий чора-тадбирлар доирасида аҳоли билан сайёр учрашувлар ҳамда сайёр суд мажлисларини ўтказишга алоҳида эътибор қаратилмоқда.

Ана шундай тадбирлардан навбатдагиси Жиноят ишлари бўйича Амударё туман судининг тергов судьяси вазифасини вақтинча бажарувчи Ансатбай Қаражанов томонидан туман Ички ишлар бўлими биносининг мажлислар залида, шу ҳудудда истиқомат қилувчи фуқаролар иштирокида ўтказилди.

Фуқаролар билан юзма-юз, очиқ ва ошкора мулоқот тарзидаги мазкур сайёр учрашувда Жиноят ишлари бўйича Амударё туман судининг тергов судьяси вазифасини вақтинча бажарувчи Ансатбай Қаражанов Ўзбекистон Республикаси Президентининг “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Фармонида белгиланган вазифалар хусусида тадбир иштирокчиларига батафсил маълумот ва тушунчалар берди.

Хусусан, коррупция давлат ва жамият тараққиёти учун энг жиддий хавф-хатарлардан бири эканлигини аҳоли ва давлат хизматчилари онгига сингдириш орқали бу хавфли иллатга барҳам бериш, “Коррупцияга қарши кураш тўғрисида”ги Ўзбекистон Республикаси Қонунининг мазмун-моҳияти ва ундан келиб чиқадиган вазифалар борасида сўз юритди.

Шу билан бирга сайёр учрашувда фуқароларга коррупцияга қарши курашда қонунийлик; фуқаролар ҳуқуқлари, эркинликлари ва қонуний манфаатларининг устуворлиги; очиқлик ва шаффофлик; тизимлилик; давлат ва фуқаролик жамиятининг ҳамкорлиги; коррупциянинг олдини олишга доир чора-тадбирлар устуворлиги; жавобгарликнинг муқаррарлиги тўғрисида ҳам кенг тушунчалар берилди.

Учрашув давомида сайёр суд мажлиси ташкил қилиниб, унда Амударё тумани Ички ишлар бўлими томонидан тақдим қилинган жами 36 та ҳуқуқбузарлик ҳолати бўйича ишлар кўриб чиқилди.

Ўзбекистон Республикаси Маъмурий жавобгарлик тўғрисидаги Кодексининг тегишли моддаларида кўрсатилган маъмурий ҳуқуқбузарликларни содир этган шахсларга нисбатан тўпланган маъмурий иш материаллари ушбу ҳуқуқбузарликларни содир этган фуқароларнинг яқинлари ва маҳалладошлари иштирокида кўриб чиқилди. Ҳуқуқбузар деб топилган шахсларга нисбатан қонунда назарда тутилган жазолар тайинланиб, суд томонидан адолатли қарорлар қабул қилинди.

Учрашув ва сайёр суд мажлисида фуқаролар ҳам фаол иштирок этишиб, ҳуқуқбузарлик ҳолатларини содир этган шахсларга жамиятда юриш-туриш қоидаларига қатъий амал қилиш, атрофидаги одамларга тўғри, оқилона муносабатда бўлиш, бир-бировга нисбатан ҳурмат назари билан қараш зарурлиги миллий-маънавий қадриятларимизга хослиги ҳақида маслаҳатлар бердилар ҳамда коррупцияга қарши кураш борасидаги ўз фикр-мулоҳазалари ҳамда таклифларини билдирдилар. Шунингдек, улар ҳар бир фуқаро ҳалол меҳнат қилиш орқали мамлакатимизни коррупциядан холи, барча соҳалари барқарор ривожланган жамиятга айлантиришдек эзгу ишда ҳамжиҳатлик билан ҳаракат қилиши зарурлигини таъкидладилар.

РАВШАН БАҲРОМОВ.