ҚОРАҚАЛПОҒИСТОН МУСУЛМОНЛАРИ ҚОЗИЁТИ ИШЧИ ГУРУҲИ АМУДАРЁ ТУМАНИДА ХАЙР-САХОВАТ ТАДБИРЛАРИНИ АМАЛГА ОШИРДИ
Ислом дини таълимотида оғир вазиятга тушиб қолган инсонлар ҳолидан хабар олиш, муҳтож ва ногиронлиги бор бўлган фуқароларни қўллаб-қувватлаш мақсадида хайр-эҳсон тадбирларини амалга ошириш энг хайрли ва савоб амаллардан саналади.
Қорақалпоғистон Мусулмонлари Қозиёти томонидан Республика ҳудудларидаги масжидлар имом-хатиблари ҳамда туманлар бош имом-хатиблари иштирокида мунтазам равишда хайр-эҳсон тадбирлари ташкил этилиб, савобли амалларнинг аҳамияти юзасидан жойлардаги имом-хатибларга зарур кўрсатмалар бериб борилади. Бу борадаги ишларни янада такомиллаштириш ва Республика ҳудудларидаги жомъе масжидлари фаолиятини замон талаблари даражасида ташкил этиш мақсадида нуфузли имом-хатиблардан иборат ишчи гуруҳи тузилиб, мазкур ишчи гуруҳ аъзолари билан жойларга чиққан ҳолда хайр-саховат тадбирлари амалга оширилмоқда.
Қорақалпоғистон Республикаси Қозиёти қозисининг ўринбосари Икрам Шерниязов раҳбарлигидаги 14 кишидан иборат ишчи гуруҳ Амударё туманида бўлишиб, туманда фаолият олиб бораётган жомъе масжидлари имом-хатиблари билан учрашиб, мулоқотда бўлдилар.
Тумандаги “Юсуф эшон бобо” жомъе масжидида бўлиб ўтган учрашувда Амударё туманида фаолият юритаётган имом-хатиблар фаолиятини янада самарали ташкил этиш масаласи муҳокама қилинди. Туманнинг бош имом-хатиби Абдураҳмон Матсапаев мазкур учрашувни ўтказишдан кўзланган мақсад эҳтиёжманд, оғир вазиятларга тушиб қолган ва бемор инсонлар ҳолидан хабар олиш ва уларни қўллаб-қувватлаш орқали ижтимоий фаоллигини оширишдан иборат эканлиги тўғрисида сўз юритди. Шу билан бирга, Амударё туманидаги жомъе масжидларининг имом-хатиблари томонидан амалга оширилаётган хайр-саховат ишлари ҳақида батафсил маълумотлар берди.
Шундан сўнг, Қорақалпоғистон Республикаси Қозиёти қозисининг ўринбосари Икрам Шерниязов раҳбарлигидаги ишчи гуруҳ аъзолари тумандаги 14 та маҳаллаларга бориб, ҳар бир маҳалладан 5 тадан кам таъминланган ва ногиронлиги бор оилалар ҳолидан хабар олдилар. Ҳар бир оила аъзолари билан самимий мулоқотда бўлдилар ва уларни қийнаб келаётган дард-у ташвишларини тингладилар.
Тадбир давомида маҳаллаларда истиқомат қилувчи 70 та кам таъминланган, эҳтиёжманд оилалар ҳолидан хабар олиниб, уларга жами 11 миллион сўмлик совғалар берилди.
Ишчи гуруҳ аъзолари томонидан амалга оширилган бу каби хайр-саховат тадбирлари кам таъминланган ва бемор фуқаролар, шунингдек, оғир вазиятга тушиб қолган шахслар қалбларига таскин, кўнгилларига хушнудлик бағишлаб, инсонпарварлик ва ҳалоллик, адолатпарварлик тамойилларига асосланган исломий қадриятларга ишонч туйғуларини янада мустаҳкамлади.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
