QORAQALPOGʻISTON MUSULMONLARI QOZIYoTI IShChI GURUHI AMUDARYo TUMANIDA XAYR-SAXOVAT TADBIRLARINI AMALGA OShIRDI

Islom dini taʼlimotida ogʻir vaziyatga tushib qolgan insonlar holidan xabar olish, muhtoj va nogironligi bor boʻlgan fuqarolarni qoʻllab-quvvatlash maqsadida  xayr-ehson tadbirlarini amalga oshirish eng xayrli va savob amallardan sanaladi.

Qoraqalpogʻiston Musulmonlari Qoziyoti tomonidan Respublika hududlaridagi masjidlar imom-xatiblari hamda tumanlar bosh imom-xatiblari ishtirokida muntazam ravishda xayr-ehson tadbirlari tashkil etilib, savobli amallarning ahamiyati yuzasidan joylardagi imom-xatiblarga zarur koʻrsatmalar berib boriladi. Bu boradagi ishlarni yanada takomillashtirish va Respublika hududlaridagi jomʼe masjidlari faoliyatini zamon talablari darajasida tashkil etish maqsadida nufuzli imom-xatiblardan iborat ishchi guruhi tuzilib, mazkur ishchi guruh aʼzolari bilan joylarga chiqqan holda xayr-saxovat tadbirlari amalga oshirilmoqda.

Qoraqalpogʻiston Respublikasi Qoziyoti qozisining oʻrinbosari Ikram Sherniyazov rahbarligidagi 14 kishidan iborat ishchi guruh Amudaryo tumanida boʻlishib, tumanda faoliyat olib borayotgan jomʼe masjidlari imom-xatiblari bilan uchrashib, muloqotda boʻldilar.

Tumandagi “Yusuf eshon bobo” jomʼe masjidida boʻlib oʻtgan uchrashuvda Amudaryo tumanida faoliyat yuritayotgan imom-xatiblar faoliyatini yanada samarali tashkil etish masalasi muhokama qilindi. Tumanning bosh imom-xatibi Abdurahmon Matsapayev mazkur uchrashuvni oʻtkazishdan koʻzlangan maqsad ehtiyojmand, ogʻir vaziyatlarga tushib qolgan va bemor insonlar holidan xabar olish va ularni qoʻllab-quvvatlash orqali ijtimoiy faolligini oshirishdan iborat ekanligi toʻgʻrisida soʻz yuritdi. Shu bilan birga, Amudaryo tumanidagi jomʼe masjidlarining imom-xatiblari tomonidan amalga oshirilayotgan xayr-saxovat ishlari haqida batafsil maʼlumotlar berdi.

Shundan soʻng, Qoraqalpogʻiston Respublikasi Qoziyoti qozisining oʻrinbosari Ikram Sherniyazov rahbarligidagi ishchi guruh aʼzolari tumandagi 14 ta mahallalarga borib, har bir mahalladan 5 tadan kam taʼminlangan va nogironligi bor oilalar holidan xabar oldilar. Har bir oila aʼzolari bilan samimiy muloqotda boʻldilar va ularni qiynab kelayotgan dard-u tashvishlarini tingladilar.

Tadbir davomida mahallalarda istiqomat qiluvchi 70 ta kam taʼminlangan, ehtiyojmand oilalar holidan xabar olinib, ularga jami 11 million soʻmlik sovgʻalar berildi.

Ishchi guruh aʼzolari tomonidan amalga oshirilgan bu kabi xayr-saxovat tadbirlari kam taʼminlangan va bemor fuqarolar, shuningdek, ogʻir vaziyatga tushib qolgan shaxslar qalblariga taskin, koʻngillariga xushnudlik bagʻishlab, insonparvarlik va halollik, adolatparvarlik tamoyillariga asoslangan islomiy qadriyatlarga ishonch tuygʻularini yanada mustahkamladi.

ROBIYa YOʻLDOShEVA.