Ўзбекистон Экологик партиясининг туман Кенгаши томонидан йил давомида 20 дан ортиқ экорейдлар ўтказилди

Эко партия – 22 12 2025

Бугунги глобал иқлим ўзгаришлари шароитида сиёсий майдонда экологик кун тартибини илгари сурувчи кучларга бўлган эҳтиёж ҳар қачонгидан ҳам ортган. Ўзбекистон Экологик партиясининг ташкил топганига қисқа вақт бўлган эса-да, у жамиятда ўз ўрни ва сўзига эга сиёсий тузилмага айланиб улгурди. Хусусан, партиянинг Амударё тумани ташкилоти томонидан 2025 йил давомида амалга оширилган ишлар сарҳисоби бунинг яққол далилидир.

Маълумки, Ўзбекистон Республикаси Экологик партияси 2019 йил 8 январь куни Ўзбекистон Экологик ҳаракати негизида ташкил топган эди. Ўтган давр мобайнида партия нафақат парламентда, балки маҳаллий кенгашларда ҳам фаол иш олиб борувчи, атроф-муҳит муҳофазасига дахлдор масалаларни дадил кўтариб чиқувчи ҳақиқий халқчил кучга айланди. Бугунги кунда партиянинг Амударё тумани бўлими сафида 5 минг нафардан зиёд аъзоларнинг мавжудлиги, аҳолининг ушбу сиёсий кучга бўлган ишончи ва хайрихоҳлиги тобора ортиб бораётганидан далолат беради.

2025 йил партиянинг туман ташкилоти учун сермаҳсул ва қизғин фаолият йили бўлди, десак муболаға бўлмайди. Рақамларга мурожаат қиладиган бўлсак, йил давомида умумий ҳисобда 167 та турли форматдаги тадбирлар ташкил этилди. Бу тадбирлар шунчаки ҳисобот учун эмас, балки аниқ мақсадларга йўналтирилгани билан аҳамиятлидир.

Айни кунларда ҳам партиянинг туман Кенгаши раҳбарияти партиядан сайланган депутатлар ва партия фаоллар билан ҳамкорликда жойларда бўлиб, аҳолининг экологик маданиятини янада юксалтириш, ҳудудларни ободонлаштириш ва тозаликка риоя қилишни тарғиб қилиб, экологик барқарорликни таъминлашга муносиб ҳисса қўшўмоқдалар.

Партия фаолиятининг устувор йўналишларидан бири — ёш авлодда экологик маданиятни шакллантиришдир. Йил давомида ёшлар иштирокида ўтказилган 34 та тадбир давомида ўқувчи ва талабаларга она табиатни асраш, сув ва табиий ресурслардан оқилона фойдаланиш кўникмалари сингдирилди.

Шунингдек, партия қошидаги “Аёллар қаноти” фаолияти ҳам таҳсинга сазовор. “Аёллар ва экология муаммолари” мавзусида ташкил этилган 32 та учрашув ва давра суҳбатларида хотин-қизларнинг экологик тарбиядаги ўрни, оилаларда санитария-гигиена ҳолатини яхшилаш ва чиқиндиларни қайта ишлаш масалалари муҳокама қилинди.

Атроф-муҳит мусаффолигини таъминлашда назорат тадбирларининг ўрни беқиёс. Шу мақсадда туман партия ташкилоти ташаббуси билан 20 дан ортиқ экорейдлар ўтказилди. Ушбу рейдлар давомида ноқонуний чиқинди ташлаш, дарахтларни рухсатсиз кесиш ва браконьерлик ҳолатларига қарши курашилди.

Мамлакатимизда кенг қулоч ёйган “Яшил макон” умуммиллий лойиҳаси ҳам партиямизнинг доимий диққат марказида бўлди. Йил давомида ушбу дастур доирасида 50 дан ортиқ акциялар ташкил этилиб, минглаб манзарали ва мевали дарахт кўчатлари экилди. Бу ҳаракатлар Оролбўйи минтақасида экологик барқарорликни таъминлашга қўшилган муносиб ҳиссадир.

Сиёсий партиянинг кучи унинг халқ билан мулоқотида намоён бўлади. 2025 йил давомида партиянинг туман кенгашига жисмоний ва юридик шахслардан жами 28 та мурожаатлар келиб тушган бўлиб, уларнинг аксарияти ижобий ечимини топди. Бу эса партиянинг халқ ичига чуқур кириб бораётгани ва фуқароларнинг экологик ҳуқуқларини ҳимоя қила олаётганидан нишонадир.

Партия гуруҳи аъзоларининг маҳаллий Кенгашдаги фаолияти ҳам алоҳида эътирофга лойиқ. Депутатлар томонидан тумандаги долзарб экологик муаммолар юзасидан 7 та масала доимий комиссия муҳокамасига, энг долзарб 3 та масала эса Халқ депутатлари туман Кенгаши сессиясига олиб чиқилди. Ушбу ташаббуслар натижасида ҳудуд экологиясини яхшилашга қаратилган муҳим қарорлар қабул қилинди.

Хулоса ўрнида айтганда, Ўзбекистон Экологик партияси Амударё тумани ташкилоти 2025 йилда амалий ишлар ва реал натижаларга таянган ҳолда фаолият юритди. Бу саъй-ҳаракатлар туманда экологик вазиятни соғломлаштириш, аҳоли саломатлигини муҳофаза қилиш ва келажак авлодга обод ва яшил ватан қолдиришдек эзгу мақсадга хизмат қилмоқда.

Саъдулла  СОДИҚОВ,  Ўзбекистон  Экологик партияси  Амударё  туман   Кенгаши  раиси